Ակադեմիական փոխճանաչման և շարժունության ազգային տեղեկատվական կենտրոն (ԱՓՇԱՏԿ) հիմնադրամի նախաձեռնությամբ «Էլիտ պլազա» բիզնես կենտրոնում տեղի է ունեցել «Փախստականները և որակավորումների ճանաչումը» թեմայով սեմինար-քննարկում, որը նպատակ ուներ ներկայացնել փախստականների կրթական որակավորումների ճանաչման միջազգային մարտահրավերները և դրանց հաղթահարման ուղղությամբ ձեռնարկվող քայլերը: ՀՀ կրթության և գիտության նախարարության արտաքին կապերի և սփյուռքի վարչության պետ Ա. Պապոյանն իր խոսքում նշել է, որ փախստականների որակավորումների ճանաչումը կրթական լուրջ հիմնահարց է և այս առումով փորձագետների առաջարկությունը կարևոր է գործնական քայլերի առաջարկ ձևավորելու նպատակով:
ԱՓՇԱՏԿ տնօրեն Գայանե Հարությունյանն իր ելույթում անդրադարձել է Լիսաբոնի ճանաչման կոնվեցիային, որը կարգավորում է կրթական որակավորումների ճանաչման միջազգային գործընթացը. «Որակավորումներ ասելով սովորաբոր հասկանում ենք բոլոր տեսակի կրթական ավարտական փաստաթղթերը՝ դիպլոմներ, վկայագրեր, վկայականներ, դասընթացի մասնակցության վերաբերյալ հավաստագրեր, որոնք շնորհվում են շրջանավարտներին: Լիսաբոնի կոնվենցիան վավերացրել են 54 եվրոպական երկրներ, քանի որ փաստաթուղթը վերաբերում է ՅՈՒՆԵՍԿՈ-ի կողմից սահմանված Եվրոպական տարածքի երկրներին: Լիսաբոնի կոնվեցիան ընկած է նաև Բոլոնիայի գործընթացի հիմքում»,- նշել է Գ. Հարությունյանը՝ հավելելով, որ ՀՀ-ն ևս միացել է այդ միջազգային փաստաթղթին: Սահմանված է հետևողական վերահսկողություն, թե ինչպես է Լիսաբոնի գործընթացն իրականացվում ազգային մակարդակներում: Ըստ բանախոսի՝ կոնվենցիայի 7-րդ հոդվածը վերաբերում է փախստականների կրթական որակավորումների ճանաչմանը: Ըստ այդմ սահմանվում է, որ կոնվենցիային միացած երկրները պարտավոր են ստեղծել փախստականների կրթական որակավորումների ճանաչման ազգային մեխանիզմներ: Կատարված առաջին հետազոտությունը ցույց է տալիս, որ միայն 8 երկրներ են մշակել ներքին ազգային ընթացակարգեր՝ գնահատելու փախստականների որակավորումները, 6 երկրներում կան ինստիտուցիոնալ ընթացակարգեր, իսկ 37 երկրներում, այդ թվում նաև Հայաստանում ընդհանրապես կոնվենցիայի 7-րդ հոդվածի կիրարկման ուղղությամբ քայլեր չեն ձեռնարկվել: Ըստ բանախոսի՝ 2016 թվականի փետրվարին Լիսաբոնի կոնվենցիայի 7-րդ նստաշրջանում ընդունվել է հայտարարություն՝ փախստականների կրթական որակավորումների ճանաչման վերաբերյալ, ինչպես նաև առաջարկություն է եղել մշակել միասնական փաստաթուղթ, որը կարող է հիմք ընդունվել բոլոր երկրների համար:
Սեմինարի ընթացքում անդրադարձ է եղել նաև ՀՀ-ում փախստականների որակավորումների ճանաչման մեխանիզմների ստեղծման նախադրյալներին: Նշենք, որ միջոցառումը կազմակերպվել է՝ ԵՄ ֆինանսավորմամբ:
Ընթերցանությունը մտածողության և մտավոր զարգացման աղբյուրներից մեկն է:
Վ.Ա. Սուխոմլինսկի
ՀՀ կրթության և գիտության նախարարության «Ընտանիք» մանկապատանեկան ստեղծագործական կենտրոնը հունիս-սեպտեմբեր ամիսներին իրականացրեց «Ընթերցանությունը՝ զարգացման աղբյուր» խորագրով փառատոն:
Ծրագրի նպատակն էր սաների մոտ զարգացնել ընթերցելու մշակույթ, ամրապնդել սերը ընթերցանության հանդեպ, դեռահասների մոտ ձևավորել գրադարան հաճախելու և ընթերցասրահներից օգտվելու մշակույթ, նպաստել սան-գրադարան կապերի ստեղծմանն ու ամրապնդմանը, ինչպես նաև համալրել կենտրոնի գրադարանը նոր գրքերով:
Ծրագիրը մեկնարկել էր դեռևս հունիս ամսին հայտարարված գրքահավաքով և «Գիրքը և ես» խորագրով ստեղծագործական մրցույթով, որին ներկայացվել էին դեկորատիվ- կիրառական արվեստի բազմաոճ աշխատանքներ: Մրցույթի արդյունքներն ամփոփվեցին սեպտեմբերի 20-ին մասնագիտական գնահատող հանձնախմբի կողմից:
Փառատոնի շրջանակներում սեպտեմբերի 4-ից 9-ը Շիրակի մարզի Աշոցք, Գոգհովիտ, Երազգավորս, Թորոսգյուղ, Ցողամարգ գյուղական համայքներում և «Ընտանիք» կենտրոնում անցկացվեց «Ընթերցանությունը՝ զարգացման աղբյուր» թեմայով սեմինարներ: Քննարկվեցին նաև «Երբ և ինչպես է ստեղծվել գիրքը» և «Ընթերցանության դերը կյանքում» թեմաները: Հետաքրքիր և բուռն քննարկումներից հետո սաներն ընթերցեցին Խաչատուր Աբովյանի Ձու գողացողը պատմվածքը, վերլուծեցին և մեկնաբանեցին առակի բարոյախրատական իմաստն ու բովանդակությունը:
Ծրագրի շրջանակում Ընտանիք» կենտրոնի Շիրակի մարզի գյուղական համայնքներում և Գյումիրում գործող խմբակների դեռահասները սեպտեմբերի 19-ին այցելեցին Շիրակի մարզային և Մկրտիչ Արմենի անվան կենտրոնական գրադարաններ: Նրանք ծանոթացան գրքերի հսկայական պաշարին, գրադարանից օգտվելու կանոններին և հետաքրքրաշարժ ու ուսանելի տեղեկություններ ձեռք բերեցին գրքերի հավաքագրման վերաբերյալ: Սաները գրադարաններից հեռացան տպավորված, խորը մտորումներով և նորից վերադառնալու պատրաստակամությամբ։
Սեպտեմբերի 26-ին Անի թաղամասի Սբ. Հակոբ Մծբնեցի եկեղեցու բակում անցկացվեց մասսայական բացօթյա ընթերցանության փառատոն, որին ներկա էին գրողների միության Շիրակի մարզային բաժանմունքի ներկայացուցիչներ, գրադարանավարներ, մանկավարժներ, թաղամասի բնակիչներ, ծնողներ, սաներ, ինչպես նաև անցորդներ: Ներկաները դիտեցին ստեղծագործական մրցույթին ներկայացրած աշխատանքների ցուցահանդեսը և դեռահասների հետ մասնակից դարձան բացօթյա ընթերցանությանը:
Տարբեր տաղավարներում ներկայացված էին անգլերեն, ֆրանսերեն, հայերեն բազմաժանր, ինչպես նաև մանկական և հոգևոր գրականություն:
Ավագ և մատաղ սերնդի ներկայացուցիչները, կողք կողքի նստած, ընթերցում էին և մեկնաբանում միևնույն հեքիաթը յուրովի. մանուկն իր մաքուր ու անկեղծ հոգով ու վառ երևակայությամբ, ծերունին` իր կյանքի փորձով ու իմաստությամբ:
Անցորդների դրական արձագանքները և դրվատանքն ավելի ոգևորեցին ընթերցողներին: «Շատ գովելի նախաձեռնություն է, հաճելի է տեսնել տարբեր տարիքի մարդկանց ընթերցելիս: Անցնում էի և ուշադրությունս գրավեց գրքերի տաղավարները: Գտա նաև իմ նախընտրելի ստեղծագործություններից մեկը»,-կիսվեց իր տպավորություններով անցորդներից Աննա Ղազարյանը:
Փառատոնի շրջանակներում անցկացվեց նաև «Արագ ընթերցանության» մրցույթ, որտեղ մասնակիցները բուռն խանդավառությամբ և ակտիվությամբ ջանում էին կարդալ ամենաարագը, ընթեռնելին և հաղթել մրցույթում:
Մրցույթի հաղթող Գյումրու թիվ 11 հիմնական դպրոցի աշակերտ Անահիտ Վարդանյանը պարգևատրվեց մրցանակով:
Պարգևատրվեցին նաև ստեղծագործական մրցույթում աշխատանքներ ներկայացրած մասնակիցները: Փառատոնը եզրափակվեց կենտրոնի սաների գեղարվեստական ելույթներով:
Զ. Հովհաննիսյան
Ուսուցչի օրը, ուսուցիչներին նվիրված տոնը նշվում է ամեն տարի սկսած՝ 1994 թվականի հոկտեմբերի 5-ից։
Օրվա ընտրությունը կապված էր այն հանգամանքի հետ, որ 1966 թվականի հոկտեմբերի 5-ին Փարիզում ՅՈՒՆԵՍԿՈ-ի եւ Աշխատանքի միջազգային կազմակերպության կողմից հրավիրված համատեղ կոնֆերանսում ընդունվել է «Ուսուցչի կարգավիճակի հետ կապված ուղեցույց» (Recommendation concerning the Status of Teachers) վերտառությամբ փաստաթուղթը, ինչն էլ ուսուցիչների աշխատանքը կարգավորող առաջին միջազգային փաստաթուղթն էր:
Ըստ ՅՈՒՆԵՍԿՕ-ի՝ Ուսուցչի օրը խորհրդանշում է ուսուցիչների՝ կրթության և զարգացման բնագավառում ունեցած հսկայական ներդման ճանաչումը, ընդունումը և գնահատումը։
Ուսուցիչների տոնը նշվում է ավելի քան 100 երկրներում, այդ թվում նաև Հայաստանում:
Պորտալի նյութերը արտատպելու կամ օգտագործելու դեպքում հղումը ՀԱՅԿԱԿԱՆ ԿՐԹԱԿԱՆ ՄԻՋԱՎԱՅՐ -ին (www.armedu.am) պարտադիր է:
Պորտալը շահագործում է Կրթական տեխնոլոգիաների ազգային կենտրոնը (ԿՏԱԿ)
© Կրթական տեխնոլոգիաներին ազգային կենտրոն, 2007-2024