Ըմբշամարտի ԵԱ. Մալխաս Ամոյանը եզրափակչում է, Մանվել Խաչատրյանը կպայքարի բրոնզե մեդալի համար

Փետրվարի 13, 2024

Սպորտային լուրեր

Հունահռոմեական ոճի ըմբիշ, աշխարհի ու Եվրոպայի չեմպիոն Մալխաս Ամոյանը Ռումինիայի մայրաքաղաք Բուխարեստում ընթացող Եվրոպայի առաջնությունում դուրս է եկել եզրափակիչ և կպայքարի հաղթողի տիտղոսի համար:

Կիսաեզրափակչում 77 կգ քաշային հայ ըմբիշը գոտեմարտել է Մոլդովայի ներկայացուցիչ Ալեքսանդրին Գուտուի հետ և 2:1 հաշվով առավելության հասել:

Ամոյանը պայքարը սկսել է 1/8 եզրափակչից, որտեղ 10:1 հաշվով փայլուն հաղթանակ է տարել իտալացի Ռիկարդո Վիտո Աբրեսցիայի նկատմամբ: Քառորդ եզրափակչում արդեն Ամոյանը 3:2 հաշվով առավելության է հասել անկախ երկրների դրոշի ներքո հանդես եկող ռուսաստանցի Ադլետ Տյուլուբաևի նկատմամբ:

Եզրափակչում Մալխաս Ամոյանի մրցակիցը կլինի աշխարհի առաջնության բրոնզե մեդալակիր, Եվրոպայի կրկնակի փոխչեմպիոն, թուրք Յունուս Բասարը:

Հայաստանի մյուս ներկայացուցիչ, 55 կգ քաշային Մանվել Խաչատրյանը, որը նորամուտն է նշում Հայաստանի մեծահասակների հավաքականի կազմում, կպայքարի Եվրոպայի առաջնության բրոնզե մեդալի համար: Կիսաեզրափակչում հայ ըմբիշը մրցել է Մոլդովայի ներկայացուցիչ Արտյոմ Դիլյանուի հետ և 2:2 հաշվով ցավալի պարտություն է կրել:

Խաչատրյանը պայքարը սկսել է քառորդ եզրափակչից, որտեղ մրցել է Եվրոպայի գործող չեմպիոն, թուրք Ադեմ Բուրակ Ուզունի հետ և կամային տպավորիչ հաղթանակ տարել՝ 13:5 հաշվով:

Այսօր՝ փետրվարի 13-ին, պայքարի դուրս կգա Հայաստանի ևս 5 ներկայացուցիչ:

60 կգ քաշային Գևորգ Ղարիբյանը 1/8 եզրափակչում ուժերը կչափի Հունաստանի ներկայացուցչի հետ: 67 կգ քաշային Սլավիկ Գալստյանը նույն փուլում կմրցի շվեդ Նիկլաս Օեհլենի հետ: 72 կգ քաշային Աշոտ Խաչատրյանը մեկնարկային գոտեմարտում կմրցի խորվաթ Դոմինիկ Էտլինգերի հետ:

Այսօր մրցագորգ դուրս կգան նաև Կարեն Խաչատրյանն (82 կգ) ու Արթուր Ալեքսանյանը (97 կգ). նրանց մրցակիցները դեռևս հայտնի չեն:

Նյութի աղբյուրը. ՀՀ կրթության, գիտության, մշակույթի և սպորտի նախարարություն