Մեծմասրիկցի աշակերտները նախագծային աշխատանքի շրջանակում հարցազրույց են վերցրել Ժաննա Անդրեասյանից

Դեկտեմբերի 18, 2023

Լուրեր կազմակերպություններից

Գեղարքունիքի մարզի Մեծ Մասրիկի միջնակարգ դպրոցի 7ա դասարանի աշակերտները «Հայոց պատմություն» առարկայի նախագծային աշխատանքի շրջանակում հարցազրույց են վարել ԿԳՄՍ նախարար Ժաննա Անդրեասյանի հետ:

Հանդիպումը տեղի է ունեցել առցանց ձևաչափով:

Ըստ աշակերտների՝ նախագծի նպատակն է հավաքել Մեծ Մասրիկ համայնքում Լեռնային Ղարաբաղից բռնի տեղահանված հայրենակիցների վերաբերյալ տեղեկություններ, ուսումնասիրել, վերլուծել և այդպիսով նաև բարձրացնել իրենց ինքնակրթության մակարդակը:

Աշակերտների տեղեկացմամբ՝ խումբը բաժանվել է երկու մասի՝ հետազոտողներ և լրագրողներ, և վերջիններս նախագծի շրջանակում հետաքրքրվել են ԿԳՄՍ նախարարից՝ ինչ ծրագրեր են իրականացվում՝ աջակցելու մեր հայրենակիցներին:

Նախարար Ժաննա Անդրեասյանը ողջունել է աշակերտներին և նրանց նախաձեռնությունը, որն իրականացվում է հանրակրթության նոր չափորոշչի շրջանակում՝ որպես մեծ թիմով նախագծեր անելու և կարևոր արժեքների մասին դասեր սերտելու հնարավորություն:

Անդրադառնալով Լեռնային Ղարաբաղից բռնի տեղահանված հայրենակիցների կրթության աջակցման ծրագրերին՝ նախարարը նշել է.

«Մեր հայրենակիցներն աջակցության կարիք ունեն, և պետությունն այդ ուղղությամբ բազմաթիվ ծրագրեր է իրականացնում: 17000-ից ավելի աշակերտ այսօր սովորում է ՀՀ դպրոցներում, ընդհանուր առմամբ 400 ուսուցիչ աշխատում է հանրակրթության համակարգում: Մեր բոլոր ջանքերը պետք է ուղղենք աջակցության այլ ծրագրերի իրականացմանը ևս»:

Նախարարը շնորհակալություն է հայտնել բոլոր աշակերտներին ԼՂ-ից բռնի տեղահանված իրենց հասակակիցներին ջերմորեն ընդունելու, դասերը լրացնելու հարցում օգնելու, նոր պարագաներ տրամադրելու և ցուցաբերած հոգատարության համար:

«Դժվար օրերը մեզ սովորեցնում են ամենակարևոր արժեքները՝ ծանր պահին հասնել միմյանց, օգնել, թեթևացնել մեկս մյուսի բեռը: Այդ որակները հնարավորություն են տալիս ավելի լավ հասարակություն կառուցելու»,- ասել է նախարարը և պատմել Գորիս այցի շրջանակում երիտասարդների ու պատանիների հետ հանդիպումների մասին։

«Գորիսում ձեր հասակակիցներն առաջինն են դիմավորել մեր հայրենակիցներին: Նրանք ահռելի աշխատանք են կատարել և ինչպես պատմում էին՝ մեծ փորձ են ձեռք բերել և այդ օրերին մարդկային արժեքների մասին ավելի մեծ դասեր են քաղել, քան երբևէ»:

Ժաննա Անդրեասյանը հետաքրքրվել է՝ արդյոք Մեծ Մասրիկի միջնակարգ դպրոցում կա՞ն Լեռնային Ղարաբաղից բռնի տեղահանված սովորողներ: Ըստ մեծմասրիկցի աշակերտների՝ իրենց դպրոցում 2020 և 2023 թվականների պատերազմներից հետո սովորում է շուրջ 40 տեղահանված աշակերտ, և ընդհանուր առմամբ Լեռնային Ղարաբաղից 150 մարդ է բնակվում Մեծ Մասրիկում:

Նրանք տեղեկացրել են, որ ունեցել են տարաբնույթ հանդիպումներ և պատրաստել են իրազեկող պաստառ և թռուցիկներ:

Նախագծային խմբի ղեկավար ուսուցչի խոսքով՝ աշխատանքի վերջնարդյունքն աշակերտների համար պետք է լինի Արցախի բարբառի, մշակույթի, ավանդույթների, խոհանոցի բացահայտումը, որոնք այժմ ուսումնասիրման փուլում են: Նա նաև նշել է, որ դպրոցում ձևավորվել է ծնողների հետ կայուն և լավ համագործակցային մթնոլորտ՝ լիարժեք և ամբողջապես իրացնելու աշակերտների կրթության իրավունքը:

Հանդիպման ավարտին աշակերտները խոստացել են նախագծային աշխատանքն ավարտելուց հետո ամփոփիչ սահիկաշարը ներկայացնել նախարարին:

Նյութի աղբյուրը. ՀՀ կրթության, գիտության, մշակույթի և սպորտի նախարարություն