Նոր համագործակցություն՝ «Արհեստական բանականության (ԱԲ) սերունդ» փորձարարական կրթական ծրագրի շրջանակում

Նոյեմբերի 20, 2023

Լուրեր կազմակերպություններից

ՀՀ կրթության, գիտության, մշակույթի և սպորտի նախարարության ու Հայաստանի գիտության և տեխնոլոգիաների հիմնադրամի (FAST) համագործակցությամբ սեպտեմբերից Հայաստանի 16 ավագ դպրոցներում մեկնարկել է «Արհեստական բանականության (ԱԲ) սերունդ» փորձարարական կրթական ծրագիրը։

Այն դպրոցների շուրջ 400 աշակերտի համար հասանելի է դարձնում խորացված մաթեմատիկայի, Python ծրագրավորման լեզվի անվճար ուսուցումը՝ ստեղծելով Հայաստանում ապագա նորարարների սերնդի ձևավորումը խթանող որակյալ մասնագիտական և կրթական ուղի, ինչպես նաև լրացնելով ոլորտում ԱԲ մասնագետների բացը։

Ծրագրի շրջանակում ԿԳՄՍ նախարարի տեղակալ Արաքսիա Սվաջյանն այսօր մասնակցել է «ԱԲ կրթության խթանումը Հայաստանում» խորագրով քննարկմանը, որի նպատակն էր ընդհանուր հարթակ ձևավորել տեխնոլոգիական և պետական կառույցների ներկայացուցիչների համար և մեկտեղել ջանքերը Հայաստանում արհեստական բանականության ոլորտում կրթության զարգացման ուղղությամբ։

Քննարկմանը ներկա են եղել Բարձր տեխնոլոգիական արդյունաբերության նախարար Ռոբերտ Խաչատրյանը, նախարարի տեղակալ Դավիթ Սահակյանը, FAST հիմնադրամի տնօրեն Արմեն Օրուջյանը, ոլորտի ներկայացուցիչներ:

Հանդիպմանը ներկայացվել են շահագրգիռ տարբեր կողմերի հետ համագործակցության տեսլականը, այդ ուղղությամբ «Արհեստական բանականության սերունդ» ծրագրում գործընկերներ, հովանավորներ ներգրավելու հնարավորությունները։

ԿԳՄՍ նախարարի տեղակալ Արաքսիա Սվաջյանը նշել է, որ բարեփոխումների այս փուլում վերանայվում են կրթության բովանդակությունը, գիտելիքի գնահատման նոր մոտեցումները, դասավանդման մեթոդաբանությունը և այլն. «Ավագ դպրոցի յուրաքանչյուր սովորող պետք է հնարավորություն ունենա ուսումնասիրելու այն առարկաները, որոնք իրեն առավել հետաքրքիր են, և պատրաստվում է ապագայում մասնագիտական կրթություն ստանալ: Այս առումով չափազանց կարևորում ենք այն օժանդակ ծրագրերը, որոնք օգնում են պետական քաղաքականությունն ավելի հասցեական և թիրախային իրականացնել: Վստահաբար կարող ենք արձանագրել, որ «Արհեստական բանականության (ԱԲ) սերունդ» ծրագիրն արդեն իսկ մեծ հետաքրքրություն է ձեռք բերել դպրոցների շրջանում»:

Արաքսիա Սվաջյանը հավելել է, որ ոլորտի զարգացման ուղղությամբ մի շարք ծրագրեր են իրականացվում, այդ թվում՝ բնագիտական առարկաներ դասավանդող ուսուցիչներն այս տարվանից 25 տոկոս հավելավճար են ստանում, մինչև 2026 թ. ՀՀ բոլոր դպրոցները կհագեցվեն բնագիտամաթեմատիկական լաբորատորիաներով և այլն:

ԲՏԱ նախարար Ռոբերտ Խաչատրյանը ևս կարևորել է դպրոցական տարիքից սովորողների՝ արհեստական բանականությանն առնչվելն ու ճիշտ պատկերացումներ ձևավորելը:

«Արհեստական բանականությունը հզոր գործիք է, որը կարող է ստեղծել և՛ բարիք, և՛ չարիք: Պարզապես պետք է սովորողներին ճիշտ ուղղորդել՝ դրա կիրառմամբ դրական արդյունքներ ունենալու նպատակով: Այն մեր կյանքի մի մասն է դառնալու, և պետք է հնարավորինս պատրաստ լինենք փոփոխություններին, քանի որ դրանով զգալի ռիսկեր կարող ենք նվազեցնել»,- ասել է ԲՏԱ նախարարը:

Հանդիպմանը Բարձր տեխնոլոգիական արդյունաբերության նախարարության և Հայաստանի գիտության և տեխնոլոգիաների հիմնադրամի միջև կնքվել է փոխըմբռնման հուշագիր՝ ոլորտի ռեսուրսների համախմբման և «ԱԲ սերունդ» ծրագրի դպրոցները համապատասխան գործիքակազմով ապահովելու նպատակով:

Նյութի աղբյուրը. ՀՀ կրթության, գիտության, մշակույթի և սպորտի նախարարություն