ԿՐԹԱԿԱՆ
ՖՈՐՈՒՄ
ՖՈՐՈՒՄ
ՊԱՇԱՐՆԵՐԻ
ՇՏԵՄԱՐԱՆ
ՇՏԵՄԱՐԱՆ
ՀԵՌԱՎԱՐ
ՈՒՍՈՒՑՈՒՄ
ՈՒՍՈՒՑՈՒՄ
ԻՆՏԵՐԱԿՏԻՎ
ՈՒՍՈՒՑՈՒՄ
ՈՒՍՈՒՑՈՒՄ
ԿԿՏ
ՀԱՄԱԿԱՐԳ
ՀԱՄԱԿԱՐԳ
Նախադպրոցական կրթական ծրագրեր և ծառայություններ իրականացնող կազմակերպությունները մինչև 2023 թվականի դեկտեմբերի 30-ը պետք է դիմեն ՀՀ կրթության, գիտության, մշակույթի և սպորտի նախարարություն՝ գործունեության լիցենզավորման նպատակով:
Գործընթացը սկսվում է համապատասխան կրթական ծրագրի ներկայացմամբ, որը սահմանված կարգով կտրամադրվի մասնագիտական փորձաքննության: Ներկայացված ծրագրի դրական եզրակացության առկայության պարագայում կազմակերպություններն, ըստ սահմանված պահանջների, կարող են լիցենզավորվել:
Այս մասին ՀՀ կրթության, գիտության, մշակույթի և սպորտի նախարարությունում հրավիրված մամուլի ասուլիսի ընթացքում հայտարարել է նախարարի տեղակալ Արաքսիա Սվաջյանը՝ անդրադառնալով նախադպրոցական ծառայությունների լիցենզավորման վերաբերյալ օրենսդրական պահանջին և հանրակրթության ոլորտին առնչվող մի շարք այլ հարցերի:
Ինչպե՞ս պետք է իրականացվի լիցենզավորման գործընթացը
««Նախադպրոցական կրթության մասին» օրենքում կատարված փոփոխությունների համաձայն՝ լիցենզավորման պահանջը վաղուց էր դրված թե՛ ծրագրեր, և թե՛ ծառայություններ մատուցող կազմակերպությունների առջև: Համապատասխան բոլոր ենթաօրենսդրական ակտերը մշակված են, ծրագրերի օրինակելի ձևերը կան, որին համապատասխան՝ կազմակերպությունները պետք է դիմեն, որպեսզի կարողանան մինչև դեկտեմբերի 30-ը լիցենզավորման գործընթացն անցնել, ինչը հնարավորություն կտա գործունեություն ծավալել 2024 թվականին»,- ասել է Արաքսիա Սվաջյանը՝ հորդորելով նախադպրոցական ծառայություններ մատուցող բոլոր կազմակերպություններին դիմել սահմանված ժամկետում:
Նախարարի տեղակալը մտահոգություն է հայտնել լիցենզավորման համար դիմելիության ակտիվությունից. նախադպրոցական ծառայությունների լիցենզավորման համար ներկայացված դիմումներն այս պահին բավարար չեն: Ըստ Ա. Սվաջյանի՝ նախարարությունը վերջին փուլում ստացել է ընդամենը 9 հայտ, մինչդեռ ՀՀ պետական եկամուտների կոմիտեի տրամադրած տվյալներով առկա է նախադպրոցական ոլորտում գործող առնվազն 320 կազմակերպություն:
Նրա խոսքով՝ լիցենզավորման գործընթաց սկսելու առաջին նախապայմանը ծրագիրն է. «Պետք է ներկայացվի՝ ինչ ծրագիր է իրականացվում, որը մենք կուղարկենք մասնագիտական փորձաքննության: Եթե ծրագիրն, ըստ ԿԶՆԱԿ-ի եզրակացության, համապատասխանում է պետության կողմից առաջադրված չափանիշներին և համահունչ է նախադպրոցական կրթության պետական չափորոշչին, ապա՝ երաշխավորվում է: Հաջորդաբար լիցենզավորման համար անհրաժեշտ բոլոր փաստաթղթերի ներկայացման դեպքում կազմակերպությունը ստանում է արտոնագիր»:
Պարզաբանելով հարցը, թե ինչ է լինելու այն դեպքում, եթե 2024 թվականի հունվարի մեկի դրությամբ կազմակերպությունը հասցրած չլինի արտոնագրվել, նախարարի տեղակալը նշել է. «Հաշվի առնելով, որ քիչ ժամանակ է մնացել՝ հիմա քննարկում ենք տարբերակ, ըստ որի՝ կազմակերպությունը կհամարվի լիցենզավորման գործընթացում, եթե մինչև դեկտեմբերի 30-ը դիմել է, սակայն դեռևս չի հասցրել ստանալ արտոնագիր: Մինչև 2023 թ. դեկտեմբերի 30-ը լիցենզավորման համար հայտ չներկայացրած կազմակերպությունները 2024 թ. հունվարին կարող են ստուգումների ենթարկվել ՊԵԿ-ի կողմից. սահմանված են տույժեր, ընդհուպ մինչև գործունեության դադարեցման արգելք»:
Ինչպիսի՞ ծրագրեր կարող են ներկայացվել
«Նախադպրոցական ոլորտում ցանկացած գործունեություն պետք է հիմնված լինի նախադպրոցական կրթության չափորոշչի վրա: Ներկայացվող ծրագրերը կարող են լինել ամբողջական, այսպես կոչված՝ մանկապարտեզին բնորոշ ծրագիր, որն իր հերթին կարող է լինել հեղինակային, այլընտրանքային, միջազգային և այլն: Բոլոր ձևաչափերն ընդունելի են: Մենք ունենք նաև նախադպրոցական ծառայություններ հասկացությունը, որն ավելի կարճաժամկետ՝ օրվա ընթացքում մինչև 4 ժամ տևողությամբ ծրագրերին է վերաբերում, այսպես կոչված՝ զարգացման կենտրոններին»:
Ըստ փոխնախարարի՝ զարգացման կենտրոնները նախկինում չէին լիցենզավորվում: Սակայն առկա էին իրավիճակներ, երբ նման կենտրոնները ոչ թե օրական 3-4 ժամ զբաղվածություն էին ապահովում երեխաների համար, այլ փաստացի իրականացնում էին նախադպրոցական կրթություն: Արաքսիա Սվաջյանը պարզաբանել է՝ արդյոք շարունակելո՞ւ է գործել նախադպրոցական ծրագրի և ծառայության տարբերակումը, ինչպես նաև՝ արդյոք նո՞ւյնն են լինելու լիցենզավորման պահանջները: Փոխնախարարի խոսքով՝ որոշակի տարբերություններ կլինեն: Եթե կազմակերպությունն իրականացնում է ամբողջական կրթական ծրագիր՝ 8 ժամ տևողությամբ, բնականաբար պետք է ստանա լիցենզիա՝ մանկապարտեզի կամ նախակրթարանի համար՝ ապահովելով տվյալ գործունեության համար սահմանված լիցենզավորման պայմաններն ու պահանջները /շենքային պայմաններ, սանիտարական նորմեր, մասնագիտական անձնակազմի որակավորման պահանջներ և այլն/: Մինչև 4 ժամ տևողությամբ ծրագրեր իրագործելու դեպքում՝ կազմակերպությունը կարող է լիցենզավորվել որպես նախադպրոցական ծառայություն մատուցող, որի համար սահմանված են այլ պայմաններ և պահանջներ:
«Բնականաբար, ըստ ծրագրերի, տարբեր են նաև սահմանված պայմանները և պահանջները», - շեշտել է Արաքսիա Սվաջյանը:
Ասուլիսի ընթացքում նախարարի տեղակալը պատասխանել է լրագրողների հարցերին, մասնավորապես՝ անդրադառնալով նոր դասագրքերի բաշխմանը, ուսուցիչների կամավոր ատեստավորմանը, տրասնպորտային ծախսերի փոխհատուցմանը, կրթական հաստատություններում բուլինգի դրսևորումներին, Լեռնային Ղարաբաղից բռնի տեղահանված աշակերտների և մանկավարժների ՀՀ դպրոցներում ներգրավմանը և մի շարք այլ խնդիրների:
Նյութի աղբյուրը. ՀՀ կրթության, գիտության, մշակույթի և սպորտի նախարարություն
