Ջ. Պուչչինիի «Տուրանդոտը» կհամալրի Հայաստանի օպերայի և բալետի ազգային թատրոնի հարուստ խաղացանկը

Հուլիսի 28, 2023

Մշակութային լուրեր

Ա. Սպենդիարյանի անվան օպերայի և բալետի ազգային ակադեմիական թատրոնում հուլիսի 29-ին՝ ժամը 19:00-ին, տեղի կունենա Ջ. Պուչչինիի «Տուրանդոտ» երեք գործողությամբ օպերայի առաջնախաղը:

Մշակութային այս իրադարձությանը նվիրված մամուլի ասուլիսին մասնակցել են ՀՀ ԿԳՄՍ նախարարի տեղակալ Ալֆրեդ Քոչարյանը, ներկայացման երաժշտական ղեկավար, ՀՀ վաստակավոր արտիստ Կարեն Դուրգարյանը, դիրիժոր Հարություն Արզումանյանը և բեմադրող ռեժիսոր Վյաչեսլավ Ստորոդուբցևը (ՌԴ):

Նախարարի տեղակալ Ալֆրեդ Քոչարյանը շնորհավորել է բոլորին առաջնախաղի կապակցությամբ և նշել, որ Պուչչինիի «Տուրանդոտ» օպերան լավագույն օպերային ներկայացնումներից է, և հատկանշական է, որ յուրաքանչյուր օպերային թատրոն ձգտում է այս բեմադրությունն ունենալ իր խաղացանկում:

«Սա միանշանակ կարևոր իրադարձություն է մեր երկրի մշակութային կյանքում: ԿԳՄՍ նախարարությունը բազմիցս աջակցել և շարունակելու է աջակցել նման ծրագրերի կյանքի կոչմանը: «Տուրանդոտ» ներկայացման համար նախարարության ֆինանսական աջակցությունը կազմել է 50 մլն դրամ: Նման բարձրակարգ ներկայացումները հարստացնում են մեր հասարակությունը, նոր հոգևոր լիցքեր հաղորդում, բարձրացնում հասարակության՝ արվեստի ընկալման մակարդակը, ինչպես նաև խթանում զբոսաշրջային հոսքերը»,- ընդգծել է նախարարի տեղակալը:

Անդրադառնալով ներկայացմանը՝ Ալֆրեդ Քոչարյանը մատնանշել է բեմադրության կարևորությունը միջազգային համագործակցության տեսանկյունից. «Ներկայացումը ստեղծագործական համագործակցության արդյունք է՝ մեր օպերային թատրոնի և ՌԴ արվեստի վաստակավոր գործիչ, արվեստագիտության թեկնածու, Նովոսիբիրսկի օպերայի և բալետի պետական ակադեմիական թատրոնի գլխավոր ռեժիսոր Վյաչեսլավ Ստարոդուբցևի, Սանկտ Պետերբուրգի Մարինյան թատրոնի Պրիմորսկիի բեմի գլխավոր դիզայներ Պյոտր Օկունևի, «Գաբաջյան նորաձևության տան» հետ: Նման համագործակցության ձևաչափն ապացուցել է, որ այն ոչ միայն կարևոր է, այլև նաև արդյունավետ և նոր շունչ կհաղորդի ստեղծագործական գործընթացներին»:

Նախարարի տեղակալը կրկին շնորհավորել է բոլորին առաջնախաղի կապակցությամբ և հույս հայտնել, որ բեմադրությունը կարժանանա հայաստանյան օպերային արվեստի սիրահարների բարձր գնահատականին:

Ներկայացման բեմադրող ռեժիսոր Վյաչեսլավ Ստորոդուբցևը նույնպես բարձր է գնահատել Հայաստանի և Նովոսիբիրսկի օպերայի և բալետի թատրոնների միջև համագործակցությունը և նշել, որ երկու կառույցների միջև փոխգործակցությունը երկար տարիների պատմություն ունի: Վյաչեսլավ Ստորոդուբցևը բարձր է գնահատել նաև Հայաստանի օպերայի թատրոնի երգիչների մասնագիտական պատրաստվածությունն ու պրոֆեսիոնալիզմը. ««Տուրանդոտ» օպերային ներկայացումը, ըստ իս, այս թատերախմբի համար իդեալական ընտրություն է: Դժվար է գտնել աշխարհում որևէ թատրոն, որն ունենա Տուրանդոտի դերերգի հինգ կատարող: Բոլոր դերակատարներն էլ շքեղ, արհեստավարժ և յուրօրինակ են, ինչը աննախադեպ է և դժվարացնում է ընտրությունը»:

Ներկայացման երաժշտական ղեկավար և դիրիժոր Կարեն Դուրգարյանը հավաստիացրել է՝ բավականին լուրջ աշխատանք է տարվել. կոստյումները որակյալ են, ներկայացումը՝ հարուստ. «Շնորհակալ եմ ՀՀ ԿԳՄՍ նախարարությանը աջակցության համար, ինչպես նաև Վյաչեսլավին և նրա թիմին. նրանք ցույց են տալիս, թե ինչպես պետք է աշխատեն պրոֆեսիոնալները: Այս ժամանակահատվածը մեզ համար կարևոր է. մեր գործընկերները, մեր երիտասարդ ուժերը կարող են սովորել, ինչը կօգնի ոչ միայն պահպանել ներկայացումը, այլև հաջորդ ներկայացումներում հաջողություններ գրանցել ու ձևավորել մեր աշխատանքային թիմը: Հուսամ՝ հանդիսատեսը կհավանի ներկայացումը, որը վառ է ու լուսավոր»:

Դիրիժոր Հարություն Արզումանյանը գլուխգործոց է համարում Պուչչինիի բոլոր օպերաները, բայց նրա ահռելի ժառանգության մեջ առանձնացնում «Տուրանդոտ» օպերան, որը կոմպոզիտորը չի հասցրել ավարտել: Այն ավարտին է հասցրել նրա համախոհն ու աշակերտը՝ Ալֆանոն: Երևանյան բեմադրության մեջ միայն այն հատվածն է ընդգրկվել, որը գրել է Պուչչինին: «Բարդագույն օպերա է: Ի տարբերություն Պուչչինիի մյուս օպերաների, որոնցում երգչախումբը քիչ է ընդգրկված, «Տուրանդոտը» հիմնված է երգչախմբի վրա: Ռեժիսորն էլ այնպես է բեմադրել, որ երգչախումբն աշխատի ակտիվ ու հետաքրքիր: Բարդագույն դեր են կատարում երգչախմբի արտիստները՝ խաղալով և գործողության կարևոր մաս լինելով»,- ընդգծել է դիրիժորը:

«Տուրանդոտ» օպերան հիմնական երկացանկի ամենահանճարեղ ստեղծագործություններից է, որը առաջին անգամ կհամալրի Հայաստանի օպերայի և բալետի ազգային թատրոնի հարուստ խաղացանկը: Ներկայացմանը ընդգրկված են ինչպես թատրոնի անվանի, այնպես էլ երիտասարդ լավագույն մեներգիչները, թատրոնի երգչախումբը, սիմֆոնիկ նվագախումբը:

Նյութի աղբյուրը. ՀՀ կրթության, գիտության, մշակույթի և սպորտի նախարարություն