Հերթական դասը ՏՀՏ կիրառմամբ

Ապրիլի 14, 2017

Դպրոցական անցուդարձ ՏՀՏ նորություններ

Նորագույն տեխնոլոգիաներն հսկայական քայլերով ակտիվորեն մուտք են գործում կրթական ոլորտները և թելադրում ժամանակի պահանջներով կազմակերպել ուսման գործընթացը, որում հատկապես դրսևորվում են նորարար և ստեղծագործ ուսուցիչների մտավոր և կառուցողական աշխատանքները։ Այս ուղղորդվածությամբ ընթացավ հերթական դասը Գուգարքի հիմնական դպրոցի 2-րդ դասարանում «Մաթեմատիկա» առարկայից՝ բազմավաստակ ուսուցչուհի Սվետլանա Քոչինյան ի մատուցմամբ։

Դասը նվիրված էր «Բազմապատկում և բաժանում» թեմայի ամփոփմանը։ Երեխաների ճամփորդությունն սկսվեց Թվերի կախարդական աշխարհից տեղափոխվեց սիրելի մուլտհերոսներ՝ մկնիկ Միտի և Լեոպոլդ կատվի հարցերի և առաջադրանքների աշխարհը։ Մեկը մեկին էին հաջորդում հարցերն ու երեխաների սպառիչ պատասխանները, որոնք արժանանում էին հերոսների խրախուսանքին։ Ամփոփվեց 1-10 թվերի բազմապատկման ու բաժանման հետ կապված դեպքերը, խաղերով և դիդակտիկ նյութերով ներկայացվեց առանձին դեպքերը, հատկապես 9-ի բազմապատկումն ու բաժանումը։ Ապա չարաճճի Մաշան խնձորենու ծառի վրա գրված օրինակներով մտքի մարզանք «կատարեց»՝ դրսևորելով մեծագույն աչալրջություն։

Այնուհետ երեխաները լսեցին «Հեքիաթ 0 -մասին», որտեղ բարի ու աշխատասեր թվերը դժվարությունների միջոցով անցան անապատը, որտեղով հոսում էին Գումարում, Հանում, Բազմապատկում և Բաժանում գետերը, և հասան Թագուհի Թվաբանության երկիրը, իսկ Թագուհին 0-ին հաշտեցրեց թվերի հետ և բոլորին աշխատանք տվեց՝ ներկայացնելով 10-ի բազմապատկումը։

Դասը շարունակվեց հաջորդ տեսասահիկի ցուցադրմամբ, որտեղ համակարգված ձևով ներկայացվեց ամբողջ թեման։ Տրվեցին առաջադրանքներ և Զատկական խնդիրներ՝ թեմայի վերաբերյալ։ Դասն ամփոփվեց Քառաբաժան մեթոդով և անդրադարձով։

Գեղեցիկ, դաստիարակող և ուսուցանող տեսադաս, որը լավ տրամադրություն և հաճելի պահեր պարգևեց և երեխաներին, և դասին բոլոր ներկա գտնվողներին։

Շնորհակալություն ընկեր Քոչինյանին՝ նման բազմաբովանդակ ու տպավորիչ դաս ներկայացնելու համար։

Գուգարքի հիմնական դպրոց