Արաքսիա Սվաջյանն անդրադարձել է նոր դասագրքերի ստեղծման գործընթացին

Մայիսի 17, 2023

Հարցազրույցներ, ելույթներ

ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանը լրագրողների հետ հանդիպման ընթացքում պատասխանել է մի շարք հարցերի:

Վերջին դասի առթիվ դպրոցներում իրականացվող դրամահավաքների վերաբերյալ

Նախարարի տեղակալի խոսքով՝ ԿԳՄՍ նախարարությունն ահազանգեր է ստանում դպրոցներում իրականացվող դրամահավաքների վերաբերյալ և միջոցներ ձեռնարկում՝ դրանք բացառելու համար:

«Ահազանգեր ենք ստանում ծնողներից, որոնք արդարացիորեն մտահոգված են դպրոցներում իրականացվող դրամահավաքների առնչությամբ: Բնականաբար, մեր կողմից միջոցներ են ձեռնարկվում այդ գործընթացների վերահսկողության և նմանատիպ երևույթները բացառելու համար: Այդուհանդերձ, շատ հաճախ նախաձեռնությունը հենց ծնողներինն է լինում: Հասկանալի է՝ յուրաքանչյուր ծնողի համար տոն է իր երեխայի թե՛ դպրոց ընդունվելը, թե՛ դպրոց ավարտելը: Բայց պետք է հասկանալ՝ արդյոք դա բովանդակայի՞ն տոն է, ու պետք է ուրախանալ և արձանագրել երեխայի հաջողությունը, թե՞ պետք է դա վերածել խնջույքի: Այստեղ նաև գործընթացն արժևորելուն և այն համապատասխան կերպով կազմակերպելուն է վերաբերում, ինչում ծնողները մեծ դերակատարություն ունեն»,- ասել է ԿԳՄՍ նախարարի տեղակալ Արաքսիա Սվաջյանը՝ նշելով, որ առաջնային խնդիրը հանրային գիտակցության փոփոխությունն է, որպեսզի բացառվեն անհարկի, կրթության բովանդակությանը ոչ հարիր միջոցառումները:

Նրա խոսքով՝ ուսումնական տարվա ավարտին ընդառաջ նախարարությունը շրջաբերականներ է ուղարկել հանրակրթական դպրոցներ՝ դրամահավաքները բացառելու հորդորով ու պահանջով: Ինչ վերաբերում է ահազանգերին հետևողական լինելուն, Արաքսիա Սվաջյանն ընդգծել է. «Այս պահին հստակ վիճակագրություն չեմ կարող ներկայացնել, թե քանի դպրոցում և որքան գումար է հավաքվում, բայց միանշանակ է՝ չի եղել որևէ հայտ կամ բողոք, որը նախարարությունը ստացել է և հետևողական արձագանք ցույց չի տվել»,- նշել է Արաքսիա Սվաջյանը:

Նոր դասագրքերի ստեղծման մասին

Նախարարի տեղակալ Արաքսիա Սվաջյանը, անդրադառնալով նոր դասագրքերի ստեղծման մրցույթին, նշել է՝ դասագիրքը պետք է համապատասխանի հանրակրթության պետական չափորոշչի, կրթության կառավարման լիազորված մարմնի կողմից հաստատված տվյալ առարկայի չափորոշչի ու ծրագրի պահանջներին և ներկայացնի առարկայի կամ դրա` համապատասխան դասարանի համար նախատեսված մասի (եթե դասագիրքը կազմված է մեկից ավելի իրար շարունակող մասերից) հիմնական բովանդակությունը:

«Իսկ գործող դասագրքերը, որոնք կիրառվում են այն դասարաններում, որտեղ դեռ չի ներդրվելու նոր չափորոշիչը, ցուցակագրվել են, քանի որ դասագրքերի օգտագործման ժամկետներ կան: Բոլոր այն դասագրքերը, որոնց ժամկետներն արդեն լրացել են, բայց 1-2 տարի կիրառման կարիք ունեն, վերահրատարկվելու են՝ առանց խմբագրման աշխատանքների՝ մինչև համապատասխան դասարաններում ևս կներդրվի նոր չափորոշիչն ու կստեղծվեն նոր դասագրքեր»,- նշել է ԿԳՄՍ նախարարի տեղակալը:

Արաքսիա Սվաջյանը տեղեկացրել է՝ 2024/25 ուսումնական տարվանից սկսած՝ հանրակրթության պետական չափորոշիչը ներդրվելու է ևս 4 դասարաններում, և առաջիկայում արդեն կմեկնարկեն այդ դասարանների դասագրքերի ստեղծման մրցույթի նախապատրաստական աշխատանքները:

Նյութի աղբյուրը. ՀՀ կրթության, գիտության, մշակույթի և սպորտի նախարարություն