Հայ բռնցքամարտիկները շարունակում են ելույթներն աշխարհի առաջնությունում

Մայիսի 8, 2023

Սպորտային լուրեր

Ուզբեկստանի մայրաքաղաք Տաշքենդում շարունակվում է բռնցքամարտի աշխարհի առաջնությունը, որին մասնակցում են նաև հայ մարզիկները:

Հայ բռնցքամարտիկների ելույթներին մրցավայրից հետևում է ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը:

Այսօր՝ մայիսի 8-ին, Հայաստանի ներկայացուցիչներից առաջինը ռինգ է դուրս եկել Ռուսլան Ասլիկյանը: 54 կգ քաշայինների 1/16 եզրափակչում Ասլիկյանը մենամարտել է վենեսուելացի Ռիվաս Սեխունդոյի հետ և մրցավարների որոշմամբ 0-5 հաշվով պարտություն կրել:

Աշխարհի առաջնությունում իր երկրորդ մենամարտն է անցկացրել Հայաստանի մյուս ներկայացուցիչ, Եվրոպայի առաջնության բրոնզե մեդալակիր Նարեկ Մանասյանը: 92 կգ քաշայինների 1/8 եզրափակչում Մանասյանը մենամարտել է իրանցի Պուրիա Ամիրիի հետ և երեք ռաունդներում ունենալով բացահայտ առավելություն՝ 5:0 հաշվով հաղթանակ է տարել ու դուրս եկել քառորդ եզրափակիչ: Եվս մեկ հաղթանակ տանելու դեպքում Մանասյանն առնվազն բրոնզե մեդալ կապահովի:

Հաղթանակից հետո Մանասյանը կիսվել է տպավորություններով. «Առաջին ռաունդում մեծ առավելություն կար: Լսում էի մարզիչներին, որոնք ճիշտ ուղղումներ էին անում: Երկրորդ ռաունդից փոխեցի մարտավարությունն ու սկսեցի աշխատել ավելի ծանր հարվածների վրա: Երկրորդում էլ ունեցա առավելություն, իսկ երրորդ ռաունդում արդեն նպատակս հիմնականում վնասվածք չստանալն էր: Ինչ վերաբերում է քառորդ եզրափակչի մենամարտին, ապա կասեմ, որ ուսումնասիրել ենք մրցակցին և հնարավորինս լավ պատրաստվել: Պետք է աշխատեմ սխալներս շտկելու ուղղությամբ և շարժվեմ առաջ: Նպատակս ոսկե մեդալ նվաճելն է»:

Մանասյանն աշխարհի առաջնության մեկնարկում մենամարտել էր Կոնգոյի ներկայացուցիչ Վիլյամ Մբանգիի հետ և ժամանակից շուտ` 2-րդ ռաունդում, առավելության հասել մրցակցի նկատմամբ: Մանասյանը 3 անգամ նոկդաունի էր ենթարկել մրցակցին, ինչից հետո մրցավարը դադարեցրել էր մենամարտը։

Ավելի վաղ՝ մայիսի 6-ին, ԱԱ-ի քառորդ եզրափակիչ է դուրս եկել նաև Հայաստանի հավաքականի առաջատար, Օլիմպիական խաղերի բրոնզե մեդալակիր Հովհաննես Բաչկովը՝ 1/8 եզրափակչում 5:0 հաշվով առավելության հասնելով Թուրքիայի ներկայացուցիչ Կանլի Կագանի նկատմամբ:

Այսօր երեկոյան քառորդ եզրափակչի ուղեգրի համար կպայքարի նաև Եվրոպայի փոխչեմպիոն, 86 կգ քաշային Ռաֆայել Հովհաննիսյանը: Նրա մրցակիցը կլինի Թուրքիայի ներկայացուցիչ Հական Քոչը: Հայ բռնցքամարտիկն ԱԱ-ի մեկնարկում առավելության է հասել Իսրայելի ներկայացուցիչ Զակ Յանի նկատմամբ:

Հիշեցնենք՝ Հայաստանի հավաքականը Կարեն Աղամալյանի գլխավորությամբ աշխարհի առաջնությանը մասնակցում է 11 բռնցքամարտիկով: Հայ մարզիկներից պայքարը շարունակում է նաև Գուրգեն Մադոյանը (67 կգ):

ԱԱ-ի 1/16 եզրափակչում Մադոյանը մրցել է Տայպեյի ներկայացուցիչ Լին Յունի հետ և 5:0 հաշվով հաղթանակ տարել։ Երկրորդ ռաունդում նա նույնիսկ նոկդաունի է ենթարկել մրցակցին և դուրս է եկել 1/8 եզրափակիչ։

Հայաստանի մյուս ներկայացուցիչները պարտվել են տարբեր փուլերում:

48 կգ քաշային Բարեղամ Հարությունյանը 1/16 եզրափակչում 0:4 հաշվով զիջել է Կուբայի ներկայացուցիչ Ալեխանդրո Կլարոյին, 51 կգ քաշային Ռուդոլֆ Գարբոյանը նույն փուլում նույն հաշվով պարտվել է Տայպեի ներկայացուցիչ Պո-Վեյ Տուին։

Եվրոպայի փոխչեմպիոն, 57 կգ քաշային Արթուր Բազեյանը մեկնարկել է 1/16 եզրափակչից, որտեղ 5:0 հաշվով հաղթել է իրանցի Պոուրիա Աբդուլմալեկիերին, սակայն 1/8 եզրափակչում 1:4 հաշվով զիջել է Հորդանանի ներկայացուցչին:

Արթուր Ղազարյանը (60 կգ) 1/16 եզրափակչում նոկաուտով հաղթել է Բուրունդին ներկայացնող Մուհամեդ Նտունգիեբոսեին, սակայն հաջորդ փուլում զիջել է Զամբիայի ներկայացուցչին։

Համբարձում Հակոբյանը 80 կգ քաշայինների 1/16 եզրափակչում պարտվել է Չինաստանի ներկայացուցիչ Տ. Կե Թուոհետաերբիեին, իսկ աշխարհի փոխչեմպիոն Դավիթ Չալոյանը (92+ կգ) 1/16 եզրափակչում 0:5 հաշվով պարտվել է Չինաստանի ներկայացուցիչ Դանաբիեկե Բայկեվուզիին։

Նյութի աղբյուրը. ՀՀ կրթության, գիտության, մշակույթի և սպորտի նախարարություն