Սերը մեր դպրոցում

Փետրվարի 15, 2023

Դպրոցական անցուդարձ

Անթաքույց փաստ է, որ սիրով կատարված ամեն բան արդյունավետ է ավելի: Պատահական չէ, որ դպրոցի աշակերտական խորհուրդը հենց այս օրը նշանավորել է տարիներ ի վեր, որպես ինքնակառավարման օր:

Դպրոցի ավանդույթի համաձայն, նախապես համակարգված գրաֆիկով ընտրում են ուսուցիչներն իրենց փոխարինողներին, աշխատում նրանց հետ օրվա դասացուցակին համապատասխան, ապա հաստատվում է տնօրենի կողմից:

Մեր իրականության այս անպաճույճ մթնոլորտում, հիրավի, սիրո դեֆիցիտ է, ուստի օրը հնարավորինս լցվեց սիրով և բոլոր աշխատանքների պաշտոնակատարները մեծ եռանդով ու խանդավառությամբ ավարտին հասցրեցին իրենց վրա դրված պարտականությունները:

Օրվա վերջում ամփոփիչ հանդիպում կազմակերպվեց դպրոցի ուսուցչանոցում, որի ընթացքում աշակերտ-ուսուցիչները և աշակերտ-տնօրենությունը վերլուծեցին կատարված աշխատանքները, գնահատեցին ծավալը, ուսուցչի մասնագիտության նրբությունները, հայտնեցին թե՛ ցանկություն մասնագիտության ընտրության, թե՛ մտավախություն (որ չեն կարող լինել ուսուցիչ):

Դպրոցի ուսմասվար Ալինա Մկրտչյանը մանրամասն անդրադարձ կատարեց աշակերտական ինքնավարությանը, իր պաշտոնին փոխարինող, աշակերտական խորհրդի նախագահ, ԿԳՄՍ նախարարին կից ԱԽ-ի անդամի թեկնածու Հրաչյա Փարամազյանի համապատասխանությունը զբաղեցրած պաշտոնին, նշեց թերացումները և շնորհակալ եղավ դաստիարակչական աշխատանքների կազմակերպիչ Հասմիկ Մեսրոպյանին աշխատանքի որակն ու ծավալը իր պատասխանատվության ներքո պահելու համար:

Դպրոցի տնօրեն Սիրանուշ Հարությունյանը երախտագիտությամբ շնորհավորեց բոլորին օրվա կապակցությամբ, հայտնեց իր գոհունակությունն աշակերտակենտրոն գործառույթի վերաբերյալ և պատրաստակամությունը ամեն կրեատիվ նախաձեռնության համար պայման ստեղծելուն:

Ուշագրավ է, որ իր ներկայությամբ օրը պատվել է Սյունիքի մարզպետի աշխատակազմի կրթության մշակույթի սպորտի վարչության պետ Մերի Գանդալյանը: Ճիշտ է այցելության նպատակն աշխատանքային այլ բովանդակություն ուներ, սակայն հերթապահ ինքնավարները մեծ զգոնությամբ ու ոգևորվածությամբ ընդունեցին, ճանապարհեցին հյուրերին:

Կապանի N 5 հիմնական դպրոց