Հայաստանի մարմնամարզության ֆեդերացիայի նախագահ Գագիկ Վանոյանը, հավաքականի գլխավոր մարզիչ Հակոբ Սերոբյանը, մարմնամարզիկներ Արթուր Դավթյանն ու Հարություն Մերդինյանն այսօր լրագրողների հետ հանդիպման ընթացքում անդրադարձել են Եվրոպայի 2027 թվականի առաջնության՝ Երևանում անցկացմանը:
Ֆեդերացիայի նախագահ Գագիկ Վանոյանի խոսքով՝ միջազգային ֆեդերացիային դիմել են ՀՀ կառավարության առաջարկությամբ և աջակցությամբ. «Միշտ ցանկացել ենք Հայաստանում որևէ բարձրակարգ միջազգային մրցաշար անցկացնել՝ հատկապես հաշվի առնելով այն, որ մարմնամարզությունում լավ արդյունքներ ենք գրանցում: Հասկանում ենք, որ առաջնության անցկացումը հսկայական ծախսերի հետ է կապված: Պետք է ունենանք առնվազն մեկ միջազգային կարգի մարզադպրոց, նոր մարզագույք՝ ամեն գործիքից 4 հավաքածու: Ի պատիվ ՀՀ կառավարության՝ կարողացանք իրականություն դարձնել մեր մեծ երազանքը: Եվրոպայի առաջնության անցկացումը բազմաթիվ հարցեր կլուծի նաև մարզաձևի ապագայի համար: Վստահ եմ՝ այս մրցաշարը լավագույններից մեկն է լինելու»:
Գագիկ Վանոյանը նշել է, որ 2027 թվականին Եվրոպայի առաջնությունն անցկացնելու հայտ էին ներկայացրել նաև Գերմանիան և Անգլիան: Ընդունող երկրի առջև դրվել են հստակ պահանջներ, որոնք պետք է կատարվեն:
Ֆեդերացիայի նախագահն ընդգծել է՝ առաջնության ավարտից հետո մարզագույքն առավելագույնս արդյունավետ բաշխվելու է նաև ՀՀ մարզերում: Հիմնական մրցաշարն անցկացվելու է Կ. Դեմիրճյանի անվան մարզահամերգային համալիրում: Մարզումային համալիրը կլինի առանձին, իսկ նախամրցումայինը` կրկին կլինի համալիրում:
Հավաքականի գլխավոր մարզիչ Հակոբ Սերոբյանի խոսքով՝ սա երազանքի իրականացում է. «Արդյունքներ գրանցեցինք Եվրոպայի և աշխարհի առաջնություններում, Օլիմպիական խաղերում և հիմա հասել ենք այս կետին: Եվրոպայի առաջնության անցկացումը մեծ իրադարձություն է: Սրանով լուծում ենք նաև մարմնամարզության ապագայի հարցը, քանի որ մոտ 20 տարի որևէ խնդիր չենք ունենա մարզագույքի առումով»:
Մարմնամարզության աշխարհի չեմպիոն, Օլիմպիական խաղերի բրոնզե մեդալակիր Արթուր Դավթյանը ևս մեծ իրադարձություն է համարում Երևանում 2027 թվականի մարմնամարզության Եվրոպայի առաջնության անցկացումը.
«Միշտ հայրենիքից դուրս ենք մասնակցում մրցաշարերի, և առաջին անգամ է, որ մրցելու ենք մեր երկրում: Մեր մարզաձևի համար այս առաջնությունը շատ կարևոր է»,- ասել է Արթուր Դավթյանը՝ կարևորելով նաև այն հանգամանքը, որ նոր մարզագույքը հետագայում ծառայելու է երիտասարդ սերնդին:
Եվրոպայի չեմպիոն Հարություն Մերդինյանը վստահություն է հայտնել, որ մարզիկները կրկնակի պատասխանատվությամբ են մոտենալու Երևանում կայանալիք առաջնությանը և ամբողջ թիմով փորձելու են լավագույնս հանդես գալ: Փորձառու մարզիկը դեռևս վստահ չէ իր մասնակցության հարցում: Մերդինյանի խոսքով՝ եթե այդ տարիքում իրեն լավ զգա, ունենա լավ մարզավիճակ և վարժությունները կատարի նույնքան լավ, որքան հիմա, գուցե մասնակցի Երևանում կայանալիք Եվրոպայի առաջնությանը:
Հիշեցնենք՝ Հայաստանի մարմնամարզության ֆեդերացիայի նախաձեռնությամբ և ՀՀ կառավարության աջակցությամբ մարմնամարզության Եվրոպայի կանանց և տղամարդկանց 2027 թվականի առաջնությունը կանցկացվի Երևանում:
Նյութի աղբյուրը. ՀՀ կրթության, գիտության, մշակույթի և սպորտի նախարարություն
ՀՊՉ նոր պահանջների համատեքստում մեր առաջնային խնդիրն է սովորողների մոտ ձևավորել ոչ թե պատրաստի գիտելիք վերարտադրելու, այլ ինքնուրույն, քննադատաբար մտածելու և սեփական դիրքորոշումն արտահայտելու կարողունակություններ: Հաճախ ենք հանդիպում իրավիճակի, երբ…
Խաղային մեթոդների կիրառումը տարրական դասարաններում՝ որպես ուսուցման արդյունավետության բարձրացման միջոց Մեթոդական հոդված Ներածություն Ժամանակակից կրթական գործընթացում կարևոր խնդիրներից է սովորողների ակտիվ ներգրավվածության ապահովումը, հետաքրքրության խթանումը և ուսումնական նյութի արդյունավետ յուրացումը:…
«Անհայտ բաղադրիչի գտնելը» թեմայի շրջանակում երկրորդ դասարանի սովորողների համար թղթից պատրաստել եմ դիդակտիկ մոդել՝ թվային բուրգ: Մոդելի միջոցով երեխաները ակնառու կերպով տեսնում են առաջադրանքի լուծման ամբողջ ընթացքը: Առանձին թղթե մոդելը…
Գրական ստեղծագործության ուսումնասիրությունը չպետք է սահմանափակվի միայն ընթերցանությամբ և բովանդակության վերաբերյալ հարցերին պատասխանելով: Կարևոր է, որ սովորողները կարողանան խորությամբ ընկալել բնագիրը, բացահայտել նրա գլխավոր ասելիքը, գաղափարական առանցքն ու հեղինակի ուղերձը,…
Գրականություն` առանց սահմանների. Ինչպե՞ս դասական տեքստերը դարձնել կենդանի և կիրառելի ապագայի քաղաքացու համար «Գրականությունը ժամանակի մեջ ճանապարհորդություն է, բայց նրա վերջնակետը միշտ մարդու սիրտն է»: Հաճախ մենք՝ հայոց լեզվի և…