Կայացել է Հայաստանի բռնցքամարտի ֆեդերացիայի 18-րդ արտահերթ համաժողովը

Հունվարի 31, 2023

Սպորտային լուրեր

ՀՀ կրթության, գիտության, մշակույթի և սպորտի նախարարի տեղակալ Կարեն Գիլոյանը մասնակցել է Հայաստանի բռնցքամարտի ֆեդերացիայի 18-րդ արտահերթ համաժողովին:

Համաժողովի օրակարգում ներառված էին ՀՀ բռնցքամարտի ֆեդերացիայի նախագահի՝ 2021/22 թթ․հաշվետվության և 2023 թվականի գործունեության ներկայացման, բռնցքամարտի ֆեդերացիայի անդամ տարածքային կառույցների՝ մարզային ֆեդերացիաների հիմնադրման, 2023 թվականի ապրիլին Երևանում կայանալիք Եվրոպայի երիտասարդական առաջնության նախապատրաստման ու կազմկոմիտեի ստեղծման նպատակով թեկնածուների առաջադրման, ՀՀ առաջնությունների, մրցավարության և միջազգային մրցաշարերի պատշաճ նախապատրաստության ու մասնակցության հետ կապված հարցեր։

ԿԳՄՍ նախարարի տեղակալը բարձր է գնահատել ֆեդերացիայի աշխատանքն ու ձեռքբերումները. «Այն, որ բռնցքամարտում դրական տեղաշարժն առկա է, աներկբա է ու լրացուցիչ ապացույցների կարիք չունի։ 2022 թվականը շատ հաջող տարի էր ինչպես հայկական սպորտի, այնպես էլ, մասնավորապես, հայկական բռնցքամարտի համար, և դրա վկայությունը տարբեր մարզաձևերում նվաճված 307 մեդալներն են: Բռնցքամարտում ևս մեծ հաջողություններ ունեցանք, իսկ դա հնարավոր չէր լինի, եթե չլինեին մարզիչների քրտնաջան աշխատանքը, մարզիկների նվիրված մարզումները, ֆեդերացիայի հսկայածավալ աշխատանքը, Կառավարության ներդրումը սպորտում՝ առհասարակ և բռնցքամարտում՝ մասնավորապես»:

Հայաստանի բռնցքամարտի ֆեդերացիայի նախագահ Հովհաննես Հովսեփյանի խոսքով՝ ֆեդերացիայի առջև հետագայում ավելի մեծ արդյունքներ գրանցելու խնդիր է դրված: «Մենք դեռ էլի սառույցներ ու կարծրատիպեր պետք է կոտրենք, մասնավորապես՝ պետք է ունենանք աշխարհի չեմպիոններ, քանի որ ունենք այսպիսի բռնցքամարտիկներ: Եվ ինչո՞ւ ոչ, արդեն օլիմպիական իրատեսական ոսկու մասին էլ ենք մտածում։ Այս տարվա Եվրոպական խաղերում նաև օլիմպիական վարկանիշեր են խաղարկվելու։ Ազգային հավաքականի գլխավոր մարզչի առջև Եվրոպական խաղերում առավելագույն թվով ուղեգրեր նվաճելու առաջադրանք է դրված»,-նշել է նա:

Անդրադառնալով Երևանում ապրիլին կայանալիք Եվրոպայի երիտասարդական առաջնությանը՝ Հովհաննես Հովսեփյանը նշել է, որ նախապատրաստական աշխատանքներն ընթանում են՝ ըստ նախատեսված ծրագրի: Ինչ վերաբերում է առաջնության անցկացման վայրին, ապա ներկայում քննարկվում է «Միկա» մարզադահլիճի տարբերակը:

Համաժողովի ընթացքում բարձրաձայնվել և քննարկվել են նաև Հայաստանի առաջնություներին և մրցավարությանը, միջազգային ստուգատեսներին ՀՀ հավաքական թիմերի պատշաճ մասնակցությանը վերաբերող բազմաթիվ հարցեր։

Ֆեդերացիայի նախագահը տեղեկացրել է, որ Հայաստանի առաջնության ժամանակ լինելու են բողոքարկման նոր ձևաչափ ու հանձնաժողով։

Նշենք՝ բռնցքամարտի Հայաստանի մեծահասակների առաջնությունը, որն ընտրական է լինելու ազգային հավաքականները ձևավորելու համար, կմեկնարկի այսօր՝ հունվարի 31-ին, «Դինամո» մարզահամալիրում:

Մարտին բռնցքամարտի կանանց հավաքականը մասնակցելու է Հնդկաստանում կայանալիք աշխարհի առաջնությանը, իսկ տղամարդկանց աշխարհի առաջնությունը տեղի է ունենալու մայիսին՝ Ուզբեկստանում:

Նյութի աղբյուրը. ՀՀ կրթության, գիտության, մշակույթի և սպորտի նախարարություն