Գիտելիքը հաղթանակ է

Հունվարի 27, 2023

Դպրոցական անցուդարձ

Հայ ազգն իր պատմության ողջ ընթացքում երազել է անկախ պետականության ու այն պահպանող բանակ ունենալու մասին:

1992 թվականի հունվարի 28-ին, արդեն պատմական դարձած որոշումն ընդունվեց:

Ունեցանք հաղթանակած բանակ:

... Անպարտելի մեր բանակը պարտվեց...

-Գիտելիքներով օժտված մարդիկ անպարտելի են, միաձայն հնչեց 5-րդ «բ» դասարանի հանդիպմանը:

-Միայն գիտելիքներով կարելի է հասնել հաղթանակի,- գոհունակությամբ հաստատեց հանդիպման բանախոս, դպրոցի երևելի շրջանավարտ, 44 -օրյա պատերազմի մասնակից, ԵՊՀ Արևելագիտության ֆակուլտետի գերազանց ուսանող Դավիթ Սարգսյանը:

Բանակի օրվան ընդառաջ, միջոցառումների շրջանակում «Արիության դասը» կրում էր «Գիտելիքը հաղթանակ է» վերնագիրը:

Հայոց լեզվի և գրականության ուսուցչուհի Ա. Հայրապետյանը, դասղեկ Ա. Քարամյանը և ԴԱԿ Հ. Մեսրոպյանը հանդես եկան օրվա խորհրդին նվիրված հաղորդումով՝ կարևորելով կրթության դերը երկրի անվտանգության ապահովման գործում, իսկ նախկին աշակերտ Դավիթ Սարգսյանը ներկայացրեց դրվագներ Արցախյան գոյամարտից, այսօրվա շրջափակված Արցախում բնակվող երեխաների կրթության խախտված իրավունքից, հզոր բանակից, ապահովության ու խաղաղության հասնելու ճանապարհից:

Հինգերորդցիների հետ, կողք- կողքի նստել էին 2-րդ «ա» դասարանի փոքրիկները, ովքեր լուսավոր հայացքներով ունկնդրեցին բազում հայրենասիրական բանաստեղծություններ, ասույթներ, թևավոր խոսքեր, գեղեցիկ կատարումներ:

«Մեր հայրենիքը կփրկի ազգային նկարագիր ու ոգեղեն կամք ունեցող սերունդը, ով զինված է գիտելիքներով»: Այս լեյտմոտիվով ավարտվեց Արիության դասը:

Կապանի N 5 հիմնական դպրոց