Ծանրամարտի ԱԱ․ Անդրանիկ Կարապետյանը 12-րդ, Վարդան Մանուկյանը՝ 16-րդ տեղերն են զբաղեցրել

Դեկտեմբերի 12, 2022

Սպորտային լուրեր

Կոլումբիայի մայրաքաղաք Բոգոտայում շարունակվում է ծանրամարտի աշխարհի առաջնությունը։ Հայաստանի ներկայացուցիչներից այսօր պայքարի են դուրս եկել 89 կգ քաշային Անդրանիկ Կարապետյանը և Վարդան Մանուկյանը։

Անդրանիկ Կարապետյանը, հանդես գալով A խմբում, երկամարտի 352 կգ (166+186) արդյունքով զբաղեցրել է 12-րդ հորիզոնականը: Նա պոկում վարժությունում գլխավերևում պահել է 166 կգ կշռող ծանրաձողը և գրավել է 5-րդ տեղը, իսկ հրում վարժությունում 186 կգ արդյունքով զբաղեցրել է 19-րդ հորիզոնականը։ Վարդան Մանուկյանը ելույթ է ունեցել B խմբում և երկամարտի 345 կգ (155+190) արդյունքով զբաղեցրել է 16-րդ հորիզոնականը:

Այս քաշային կարգում աշխարհի չեմպիոն է հռչակվել Վենեսուելան ներկայացնող Ջովանի Կեյդոմար Սանչեսը՝ երկամարտի 385 կգ (175+210) արդյունքով։

Հիշեցնենք՝ Հայաստանի ներկայացուցիչներից առաջինը մրցահարթակ էր դուրս եկել 59 կգ քաշային Իզաբելլա Յայլյանը՝ երկամարտի 205 կգ (90+115) արդյունքով զբաղեցնելով 18-րդ հորիզոնականը:

Այսօր՝ Երևանի ժամանակով 01։30-ին, մրցահարթակը կտրամադրվի 96 կգ քաշային ծանրորդներին: Հայաստանի մարզական պատիվը կպաշտպանեն Հակոբ Մկրտչյանը և Դավիթ Հովհաննիսյանը:

Դեկտեմբերի 13-ին աղջիկների մրցավեճում պայքարի դուրս կգան 76 կգ քաշայիններ Տաթև Հակոբյանը և Միլենա Խաչատրյանը, իսկ տղամարդկանց պայքարում՝ Սամվել Գասպարյանը (102 կգ): Լիանա Գյուրջյանը (81 կգ) և Հռիփսիմե Խուրշուդյանը (87 կգ) մրցահարթակ դուրս կգան դեկտեմբերի 15-ին:

Մրցումային վերջին օրը հարթակը կտրամադրվի գերծանր քաշային ծանրորդներին: Հայաստանի հավաքականի կազմում մեդալների համար կպայքարեն Վարազդատ Լալայանը և Սիմոն Մարտիրոսյանը (+109 կգ):

Աշխարհի առաջնության +109 կգ քաշային կարգում Բահրեյնի հավաքականի կազմում կմասնակցի նաև օլիմպիական փոխչեմպիոն, աշխարհի և Եվրոպայի փոխչեմպիոն, Հայաստանի հավաքականի նախկին անդամ Գոռ Մինասյանը:

Հիշեցնենք՝ աշխարհի առաջնությունը վարկանիշային է Փարիզի 2024 թվականի Օլիմպիական խաղերի համար: ԱԱ-ում յուրաքանչյուր երկիր քաշային յուրաքանչյուր կարգում իրավունք ունի հայտավորելու միայն երկու մասնակցի:

Նյութի աղբյուրը. ՀՀ կրթության, գիտության, մշակույթի և սպորտի նախարարություն