ԻՄՓԱՔԹ ակումբերի ցանցը համալրվեց ևս երկուսով Տավուշի մարզում

Մարտի 13, 2017

Լուրեր կազմակերպություններից

Վորլդ Վիժն Հայաստան միջազգային բարեգործական կազմակերպության գործունեության կարևոր ուղղություններից է երիտասարդների տարբեր կարողությունների զարգացումը, որը նախադրյալ է նրանց  հետագա  կենսակերպի ապահովման համար: Այս  նպատակի կյանքի կոչելուն է ուղղված ԻՄՓԱՔԹ երիտասարդական ակումբների ստեղծումը  երկրի տարբեր համայնքներում: Ակումբներն գործում են  ըստ  ոչ ֆորմալ ուսուցման մոդելի՝ համատեղելով կրթությունն ու խաղերը, որոնց օգնությամբ  հզորացվում են  կարողություններ ու գիտելիքներ  ակտիվ քաղաքացիության, առաջնորդության, աշխատունակության եւ սոցիալական ձեռներեցության ոլորտներում: Յուրաքանչյուր կրթական մոդուլի ավարտը նշանավորվում է  համայնքային ծառայության  ծրագրի իրականացմամբ: Տավուշի մարզի մի քանի համայնքներում մոտ երկու տարի է ինչ գործում են 6 ակումբներ, որոնց շնորհիվ  շատ երեխաներ ու երիտասարդներ ներգրավված են քաղաքացիական-հասարակական նախաձեռնություններում և բերում են  փոփոխություններ իրենց և համայնքի համար: «Ակտիվ քաղաքացիություն» եւ «Առաջնորդություն» մոդուլների    ուսուցանումը նպատակ ունեն անձի մոտ ձեւավորել քաղաքացուն հատուկ առողջ մտածելակերպ եւ վարքագիծ, իսկ «Աշխատունակություն» եւ «Սոցիալական ձեռներեցությունը»՝  սոցիալական, կազմակերպչական, գործարար ու ստեղծագործական ունակությունների կատարելագործում: Ակումբներում ներգրավվելով  մասնակիցների մոտ   արժեքներ են սերմանվում՝ հարգանք, ազնվություն, պատասխանատվություն և այլն:

Եվ ահա, Տավուշի մարզի Նոյեմբերյան ու Սարիգյուղ համայնքներում մարտին բացվեցին ԻՄՓԱՔԹ նոր ակումբներ, որոնք ղեկավարում են տարբեր մասնագիտոթյուն ունեցող երիտասարդներ, ովքեր վերապատրաստվել են նախապես: Ակումբներում ներգրավված են մոտ 18 երեխա: Առաջին հանդիպումների ընթացքում նոր անդամներին ներկայացվեցին ակումբի նպատակները, խնդիրները, գործունեության հիմնական ուղղությունները և այլ ակումբների փորձը: Ակումբները, որոնք գործում են դպրոցի տարածքում, նաև  կնպաստեն ներդպրոցական եւ համայնքային նախաձեռնություններում երեխաների մասնակցային ակտիվության աճին: Նոյեմբերյանի ԻՄՓԱՔԹ ակումբի անդամ, 12 ամյա Արփինեի համար նոր հնարավորություն է ստանալու նոր գիտելիքներ և հմտություններ.«Ցանկացել եմ մասնակցել ակումբ հանդիպումներին, որպեսզի հետո դառնամ առաջնորդ և հետաքրքիր ծրագրեր իրականացնեմ դպրոցում»:

ԻՄՓԱՔԹ  ծրագիրը մշակվել է Ռումինիայում «Նոր Հորիզոններ» հիմնադրամի կողմից և Հայաստանում իրականացվում է Վորլդ Վիժն Հայաստանի կողմից: 2017թ. դրությամբ ավելի քան 40 ակտիվ ԻՄՓԱՔԹ ակումբներ էին գործում  Հայաստանի 6 մարզերում, որոնք ունեն ավելի քան 600 անդամ: Նպատակն է համախմբել երիտասարդությանը  ԻՄՓԱՔԹ  խմբերում, աջակցել նրանց ձեռք բերել քաղաքացիական հասարակության և աշխատանքային շուկայում մրցունակ լինելու համար անհրաժեշտ կարողություններ:

ՎՎՀ Իջեւանի գրասենյակ