Լեզուների եվրոպական օրվան նվիրված միջոցառման ընթացքում ամփոփվել է «Համերաշխության լեզու» խորագիրը կրող նախագիծը

Նոյեմբերի 16, 2022

Մշակութային լուրեր Միջազգային լուրեր

Հայաստանում Եվրոպական միության պատվիրակության ղեկավար, դեսպան Անդրեա Վիկտորինը ՀՀ-ում ԵՄ անդամ երկրների դեսպանների և ԱԳ նախարարի տեղակալ Պարույր Հովհաննիսյանի հետ մասնակցել է Լեզուների եվրոպական օրվան նվիրված միջոցառմանը:

Միջոցառման ժամանակ ներկայացվել է նաև ՀՀ ԿԳՄՍ նախարարի տեղակալ Արթուր Մարտիրոսյանի ողջույնի խոսքը, որում մասնավորապես կարևորվել է Հայաստանի դպրոցներում, բուհերում, լեզվամշակութային ինստիտուտներում Լեզուների եվրոպական օրվան նվիրված միջոցառումների կազմակերպումը: «Լեզուների եվրոպական օրը նշելն արդեն կայացած ավանդույթ է մեր երկրում, որն առաջնահերթություն է նաև ԿԳՄՍ նախարարության համար: Այսօրինակ միջոցառումները հնարավորություն են ընձեռում բարձրացնելու իրազեկությունը լեզուների ուսուցման և լեզվական բազմազանության մասին, որոնք էլ նպաստում են լեզվական բազմազանության խթանմանը, միջմշակութային կապերի ամրապնդմանը, համերաշխության տարածմանը»,- նշված է խոսքում:

Հայաստանում ԵՄ պատվիրակությունը «ԱՐԻ» գրականության հիմնադրամի հետ այս տարի իրականացրել է Լեզուների եվրոպական օրվան նվիրված «Համերաշխության լեզու» խորագրով նախագիծը, որին մասնակցել են գրողներ ԵՄ անդամ, ինչպես նաև Արևելյան գործընկերության երկրներից։ Նախագծի պահանջներին համապատասխանող աշխատանքները ներառվել են գրքույկում, նկարահանվել է կարճամետրաժ ֆիլմ:

Նշենք, որ Լեզուների եվրոպական օրը նշվում է 2001 թ., այն հռչակվել է Եվրոպայի խորհրդի կողմից, որի հիմնական նպատակն է խրախուսել տարբեր լեզուների ուսումնասիրությունը:

Ընդ որում՝ եվրոպական լեզուներ հասկացությունը դիտարկվում է ավելի լայն իմաստով, քան միայն Եվրամիության անդամ պետությունների պաշտոնական լեզուների ամբողջականությունը: Եվրախորհրդի անդամ երկրների կողմից կոչ է արվում սովորել մեկից ավելի լեզուներ՝ խրախուսելով բազմալեզվությունը որպես համաեվրոպական միտում:

Նյութի աղբյուրը. ՀՀ կրթության, գիտության, մշակույթի և սպորտի նախարարություն