Քննարկվել է աշխատանքի վրա հիմնված ուսումնառության հայեցակարգը

Նոյեմբերի 15, 2022

Լուրեր կազմակերպություններից

Այսօր տեղի է ունեցել աշխատանքի վրա հիմնված ուսումնառության (ԱՀՈՒ) հայեցակարգը մշակող աշխատանքային խմբի ընդլայնված հանդիպումը, որին մասնակցել և ողջույնի խոսքով հանդես է եկել ԿԳՄՍ նախարարի տեղակալ Ժաննա Անդրեասյանը:

Աշխատանքային խմբում ներգրավվել են նախնական արհեստագործական և միջին մասնագիտական կրթության հաստատությունների, գործատուների, ՀՀ կրթության, գիտության, մշակույթի և սպորտի, աշխատանքի և սոցիալական հարցերի, էկոնոմիկայի նախարարությունների, ՀՀ պետական եկամուտների կոմիտեի, Կրթության ազգային հիմնադրամի, ՀՀ առևտրաարդյունաբերական պալատի, ոլորտում ակտիվ տեղական ու միջազգային կազմակերպությունների ներկայացուցիչներ:

ԿԳՄՍ նախարարի տեղակալ Ժաննա Անդրեասյանը, ողջունելով քննարկման մասնակիցներին, բարձր է գնահատել Եվրոպական կրթական հիմնադրամի ցուցաբերած աջակցությունը Հայաստանի մասնագիտական կրթության և ուսուցման (ՄԿՈՒ) բարեփոխումներին:

«Ուրախ եմ, որ այսօր հնարավորություն ունենք ևս մեկ անգամ քննարկելու համատեղ մշակված հայեցակարգը, որով նախանշվում են գործողությունների պլանը և ճանապարհային քարտեզը, հատկապես ԱՀՈՒ փորձարկման և ներդրման առումով: Ավելի քան 15 ՄԿՈՒ հաստատություններում հաջողությամբ փորձարկվել են ԱՀՈՒ երկարաժամկետ և կարճաժամկետ ծրագրեր, որը մեզ հիմք է տալիս այդ փորձը տարածել այլ ուսումնարաններում և քոլեջներում»,- նշել է նախարարի տեղակալը:

Ժաննա Անդրեասյանը շեշտել է, որ աշխատանքի վրա հիմնված ուսումնառության ինստիտուցիոնալացման նպատակով մշակվում է նաև համապատասխան օրենսդրական փոփոխությունների փաթեթ: Ըստ այդմ՝ ոլորտային նոր օրենքի և ենթաօրենսդրական ակտերի միջոցով կսահմանվեն ԱՀՈՒ-ի ներդրման նպաստավոր պայմաններ: Այս գործընթացում կարևոր է հատկապես մասնավոր հատվածի հետ համագործակցությունը՝ նոր բիզնես գործընկերներ գտնելու համատեքստում: Ըստ փոխնախարարի՝ ՄԿՈՒ ոլորտը ներկա մարտահրավերներում առանցքային դեր ունի՝ մարդկային կապիտալի և տնտեսության զարգացմանը նպաստելու, համայնքային համաչափ զարգացումը խրախուսելու տեսանկյունից։

Փոխնախարարը նշել է, որ ԱՀՈՒ ձևերի ներդրումը նախատեսված է «ՀՀ կառավարության 2021-2026 թվականների» և ներկայումս Ազգային ժողովում քննարկվող «ՀՀ կրթության՝ մինչև 2030 թվականը զարգացման պետական» ծրագրերում։ Նրա խոսքով՝ աշխատանքի վրա հիմնված ուսումնառությունը մեծ դերակատարում ունի կրթություն-աշխատաշուկա անցումը հեշտացնելու տեսանկյունից:

Եվրոպական կրթական հիմնադրամի փորձագետ Արայիկ Նավոյանը ներկայացրել է ԱՀՈՒ ոլորտում իրականացված աշխատանքները և իրավիճակը, մշակվող փաստաթղթում կատարված փոփոխությունները և հաստատման ժամանակացույցը:

Այնուհետև, ծավալվել է աշխատանքային քննարկում մի շարք հարցերի շուրջ, որոնք վերաբերել են նախնական և միջին մասնագիտական կրթության ոլորտում հետագա համագործակցությանը, մասնավորապես աշխատանքի վրա հիմնված ուսուցմանը, որակի ապահովման համակարգի զարգացմանը, ֆինանսական միջոցների ներգրավմանը, ՄԿՈՒ ոլորտում մարդկային կապիտալի զարգացմանը, ինչպես նաև գերազանցության կենտրոնների հզորացմանը:

Հանդիպման նպատակն էր հիմնական շահակիցների հետ քննարկել Հայաստանում ԱՀՈՒ քաղաքականության մշակման հիմնական ուղղությունները, հասկանալ ԱՀՈՒ հետագա զարգացման հնարավորությունները և մարտահրավերները, ինչպես նաև լրացուցիչ անգամ շեշտել դրա անհրաժեշտությունը միջին մասնագիտական և արհեստագործական կրթության ոլորտում: Այս համատեքստում կարևորվել է «Հայաստանում աշխատանքի վրա հիմնված ուսումնառության զարգացման հայեցակարգ և 2023-2026 թթ. գործողությունների ցանկ» փաստաթղթի ամբողջացումը:

Հանդիպմանը մասնակցել են ԿԳՄՍ նախարարության նախնական (արհեստագործական) և միջին մասնագիտական վարչության պետի պաշտոնակատար Արմենուհի Պողոսյանը, Եվրոպական կրթական հիմնադրամի փորձագետներ Ֆլորիանա Ֆոլիսին և Քրիստիանա Բուրզցիոն, հիմնադրամի հայաստանյան գրասենյակի, ուսումնարանների, քոլեջների և սոցիալական գործընկեր կազմակերպությունների ներկայացուցիչներ:

Նշենք, որ սկսած 2019 թ․ ԿԳՄՍ նախարարությունը տարբեր շահագրգիռ կողմերի համագործակցությամբ և Եվրոպական կրթական հիմնադրամի (ԵԿՀ) աջակցությամբ մշակել է «Հայաստանում աշխատանքի վրա հիմնված ուսումնառության զարգացման հայեցակարգը և 2019-2025 թթ. գործողությունների ցանկը», որն արդեն ամփոփման փուլում է և բավարարում է այն պահանջներին, որոնցով սահմանված են ոլորտի կարևորագույն թիրախները:

ԿԳՄՍՆ հետ համագործակցելով՝ «Գերմանիայի միջազգային համագործակցության ընկերության՝ GIZ-ի կողմից իրականացվող «Մասնավոր հատվածի զարգացում և մասնագիտական կրթություն և ուսուցում Հարավային Կովկասում» (ՄՀԶ ՄԿՈՒ) ծրագրի շրջանակում իրականացվում է ՄԿՈՒ ոլորտի իրավական դաշտի և ԱՀՈՒ ներդրմանը միտված օրենքների վերանայման առաջարկների մշակում:

Նյութի աղբյուրը. ՀՀ կրթության, գիտության, մշակույթի և սպորտի նախարարություն