«Մեր տունը» դասի ամփոփում

Նոյեմբերի 10, 2022

Դպրոցական անցուդարձ

Լճաշեն գյուղի Ա.Տեր-Գրիգորյանի անվան միջնակարգ դպրոցի Երկրորդ «Ա» դասարանում (դասվար՝ Արևիկ Դավթյան) անցկացվեց օրինակելի դաս ՝ «Մեր տունը» թեմայով:

Դասն սկսվեց «Մեր տունը» ներկայացնող նկարներով, բնութագրվեց՝ ի՞նչ է ընտանիքը, ովքե՞ր են ապրում այդ ընդհանուր տանիքի տակ:

Դասարանը բաժանված էր խմբերի. «Պապիկ», «Տատիկ», «Հայրիկ», «Մայրիկ», «Քույրիկ», «Եղբայր», իսկ ընդհանուր դասարանը «Հայրենիք»:

Աշակերտներն իրենց գեղեցիկ ասմունքով և թեմատիկ խմբի դաս-պատմություններով ամբողջացրին ընտանիք-հայրենիք եզրույթների փոխկապակցվածությունը և ընտանիք-հայրենիք ամրությունը: Առանձնակի ջերմությամբ ներկայացվեց մեծ տանը՝ հայրենիքին նվիրված դասերը՝ «Ծիծեռնակն ու ծիտիկը», «Երկու ծաղիկ», «Քամին ու մանուշակը»:

Ուսուցչուհին, ամբողջացնելով թեմատիկ խմբի դասերը, հանձնարարեց խմբերից յուրաքանչյուրին գրել հնգական բառ, որոնք կարևոր են ընտանիքում: Աշակերտները եկան այն եզրակացության, որ ամուր ընտանիք ունենալու համար հարկավոր է սեր, համերաշխություն, երջանկություն, փոխադարձ օգնություն, խաղաղություն, անշահախնդիր վերաբերմունք միմյանց նկատմամբ: Նշված բառերը գրվեցին գրատախտակին նկարված գեղեցիկ տնակի մեջ: Տնակում նկարված էր հպարտ զինվոր, որը խորհրդանշում էր մեր հայրենիքի ընտանիքների անդորրը պահպանողն ու պաշտպանը:

Ուսուցչուհին հավելեց, որ մեր երկիրը փոքրիկ, բայց հրաշք երկիր է և ունի բազմադարյան պատմություն:

Թո՛ղ հավերժ լինեն մայր Հայաստանը, մեր ծննդավայրը, մեր օջախները:

Դասի ընթացքում ուսուցչուհին կազմակերպեց բանավեճ, աշակերտները բեմականացրին «Ծիծեռնակն ու ծիտիկը», աշխատանք տարվեց զարգացնելու նրանց գրավոր ու բանավոր խոսքը, ազատ մտքեր արտահայտեցին, միասին քննարկեցին և միմյանց կարծիքն ու խոսքը հարգեցին, միաժամանակ ուշադրություն դարձվեց բարելավելու ընթերցանության որակը, հաճույքով ընթերցեցին՝ հասկանալով ընթերցանության օգտակարությունը:

Ուսանելի դասը երկար կմնա աշակերտների հիշողության մեջ:

Ուսուցչուհու նվիրումով աշխատանքը և վարած դասը բարձր գնահատեց տնօրեն տիկին Մուրադյանը և նշեց, որ Արևիկ Դավթյանն այն դասվարն է, որ ունի դասավանդման հարուստ փորձ, նորովի դասավանդելու մեթոդական հզոր զինանոց, որով աշակերտների համար սովորելը դարձնում է հետաքրքիր ու զվարճալի:

Տարրական կրթության մ/մ նախագահ Հ. Առաքելյան