«Մեզնից յուրաքանչյուրն իր գործունեությունը պետք է ծառայեցնի մեր պետության հզորացմանը և զարգացմանը». Վահրամ Դումանյան

Հոկտեմբերի 31, 2022

Պաշտոնական

ՀՀ ԿԳՄՍ նախարար Վահրամ Դումանյանը մասնակցել է հոկտեմբերի 28-31-ը Երևանում անցկացվող hամաշխարհային հայկական գագաթնաժողովի «Համառոտ ներկայացում․ կրթություն, առողջապահություն և սոցիալական ապահովություն» խորագրով պանելային քննարկմանը, որի ընթացքում ներկայացրել է կրթության, գիտության, մշակույթի, սպորտի և երիտասարդության ոլորտներում իրականացվող աշխատանքները։

Քննարկվել են նաև Սփյուռքի հետ տարվող աշխատանքները՝ Հայաստանում կրթության, գիտության, մշակույթի, սպորտի և երիտասարդության ոլորտները բարելավելու ուղղություններով, և նախաձեռնված ծրագրերը՝ ՀՀ կրթական համակարգը զարգացնելու ուղղությամբ:

«Հայաստան-Սփյուռք հարաբերություններն այսօր դիտարկվում են նոր հարթության վրա՝ պայմանավորված մեր ժողովրդի և մեր պետության առջև ծառացած խնդիրներով, մարտահրավերներով և հարցերով: Մենք պարտավոր ենք այդ հարցերին գտնել ընդհանուր պատասխաններ, որոնք բոլորիս կողմից կլինեն ընդունելի: Մեզնից յուրաքանչյուրը լինի Հայաստանում, թե Սփյուռքում, պետք է իրեն համարի Հայաստանի Հանրապետության մի մասնիկ, իր գործունեությունը ծառայեցնի մեր պետության հզորացմանը և զարգացմանը»,- նշել է Վահրամ Դումանյանը:

ԿԳՄՍ նախարարը ներկայացրել է նաև նախարարության ծրագրերը, որոնք վերաբերում են սփյուռքահայ ուսուցիչների վերապատրաստմանը, Սփյուռքում գործող կրթօջախներին դասագրքերով ապահովմանը, հայագիտական ուղղվածությամբ ինստիտուտների և կենտրոնների զարգացմանը, նորերի ստեղծմանը:

Համաշխարհային հայկական գագաթնաժողովի ընթացքում Սփյուռքի ներկայացուցիչները տեղացի գործընկերների հետ քննարկել են համընդհանուր նշանակության մարտահրավերներն ու խնդիրները: Որպես փիլիսոփայական հիմք՝ սահմանվել է Հայաստան-Սփյուռք հարաբերությունների պետականակենտրոն գործունեության ամրապնդումը։ Պետությունը պետք է զարգանա Սփյուռքի հետ գործընկերային և սերտ համագործակցությամբ: Հայաստանը ծառայում է որպես հանգույց կամ հիմք, որի վրա կառուցվում են գործընթացներ, ինստիտուտներ և կապեր՝ առաջ մղելու հայության շահերը, նաև զարգացնելու և հզորացնելու Հայաստան-Սփյուռք հարաբերությունները։

Գագաթնաժողովի օրակարգում ընդգրկվել են այնպիսի թեմաներ, ինչպիսիք են ազգային անվտանգությունը, հայկական շահերի պաշտպանությունը, հայրենիքի ռազմավարական ոլորտների զարգացումը, հայրենադարձությունը, ներդրումային ներգրավվածությունը, հայապահպանությունը, Սփյուռքի ինքնակազմակերպումը և այլն։

Երևանում հյուրընկալվել են մոտ 600 մասնակիցներ Սփյուռքի ավելի քան 50 երկրներից, Հայաստանից և Արցախից: Նրանք ներկայացնում են համայնքային կառույցներ, կազմակերպություններ, գիտական, մասնագիտական, գործարար, ուսանողական, երիտասարդական շրջանակներ և այլն:

Նախատեսվում է, որ գագաթնաժողովի ընթացքում հնչեցված առաջարկները, լուծուﬓերն ու արդյունքները համահայկական օրակարգի ստեղծման և առաջմղման հիﬓաքարեր կդառնան:

Համաշխարհային հայկական գագաթնաժողովի կազմակերպիչը ՀՀ սփյուռքի գործերի գլխավոր հանձնակատարի գրասենյակն է:

Նյութի աղբյուրը. ՀՀ կրթության, գիտության, մշակույթի և սպորտի նախարարություն