Մայրենի լեզվի միջազգային օրը

Մարտի 6, 2017

Դպրոցական անցուդարձ

Գեղարքունիքի մարզի  Վարսերի Ռ. Պետրոսյանի անվան միջնակարգ  դպրոցի 7-րդ դասարանը (դասղեկ` Մ. Գալստյան) ներկայացրեց  միջոցառում  նվիրված  Մայրենի լեզվի  միջազգային օրվան` «Լեզուն է ամեն մի ժողովրդի ազգային գոյության և էության ամենախոշոր փաստը, հոգին ու հոգեբանությունը…»  խորագրով։

   Մայրենի լեզվի միջազգային օրվան նվիրված  միջոցառումը  բացվեց Մհերի «Հայաստան»  երգով, որին զուգահեռ էկրանին ցուցադրվում էր տեսանյութ մայրենի լեզվի մասին, այբուբենի ստեղծման պատմությունը, հայ և համաշխարհային  մեծերի խոսքերը հայերի մասին,  հայոց լեզվի անցած պատմության մասին:

    Երգից  հետո հաղորդավարները ներկայացրին օրվա կարևոր խորհուրդը, թե ինչու է հատկապես ՅՈՒՆԵՍԿՕ – ն 1999 թվականի փետրվարի 21-ը հռչակել Մայրենի լեզվի միջազգային օր,  նշեցին նաև,  որ, ըստ  ՅՈՒՆԵՍԿՕ – ի գնահատականի  աշխարհի  6000 լեզուներ կորստի մատնվելու եզրին են:

    Այնուհետև հնչեց ասմունք` Հ. Սահյան` «Հայոց լեզու», Պարույր Սևակ`  «Մայրենի լեզու» և այլ հեղինակների ստեղծագործություններ:  Մայրենի լեզվին նվիրված ասմունքին հաջորդեց խրոխտ, հայրենասիրական, ռազմաշունչ պար: Աշակերտները իրենց ռազմահայրենասիրական պարը պարում էին Սիբիլի «Մեր լեզուն» /խոսք Հ. Սահյան/ երգի ներքո:

    Շնորհավորելով և փառաբանելով  մայրենի  լեզվի  միջազգային  օրը` անդրադարձ կատարվեց մեծ լոռեցու ծննդյան  տարեդարձին և գիրք նվիրելու օրվան:

    Աշակերտները ներկայացրին Հովհ. Թումանյանի գրական, հասարակակակն ազգային գործունեությունը, նրա անուրանալի դերն ու առաքելությունը հայերիս կյանքում և գրականության մեջ:  Միջոցառումը զուգակցվում  էր Թումանյանի զանազան բանաստեղծությունների և խոհափիլիսոփայական քառյակների ասմունքով: Ցերեկույթը եզրափակվեց Ն. Ռոհսինյանի «Կիլիկիա»  երգով, որը, ինչպես նշեցին աշակերտները, Հովհ. Թումանյանի սիրելի երգերից մեկն է եղել, որի ազդեցության տակ բանաստեղծը գրել է «Երբ որ կանցնի ձմեռն  սաստիկ…» բանաստեղծությունը:

Կազմակերպիչ` Հայոց լեզվի և գրականության ուսուցիչ Մ. Գալստյան