Բռնցքամարտի Հայաստանի չեմպիոն մեր Էրիկը

Հոկտեմբերի 17, 2022

Դպրոցական անցուդարձ

ՀՀ Գեղարքունիքի մարզի Լճաշեն գյուղի Ա.Տեր-Գրիգորյանի անվան միջնակարգ դպրոցի 9-րդ «բ» դասարանի աշակերտ Էրիկ Ղազարյանի մարզական հաջողություններն սկսվել են դեռ մանկապարտեզից: Առաջին հաղթական ձեռքբերումը Էրիկն ունեցավ Հրազդան քաղաքում՝ 24 կգ քաշային կարգում: Դիտարժան և միևնույն ժամանակ դժվար էր Մարտունի քաղաքում երկօրյա՝ 30 կգ քաշայինների մրցաշարը, որտեղ Էրիկն արժանացավ երկու ոսկե մեդալի: Հայաստանում անցկացված տարբեր մրցաշարերում մեր չեմպիոնն ունեցել է բազում հաջողություններ:

2016 թ. ամռանը Էրիկը մասնակցել է ապրիլյան պատերազմում նահատակվածների հիշատակին նվիրված մրցաշարին և գրավել առաջին պատվավոր հորիզոնականը:

2021-2022 թթ. Երևանի «Դինամո» մարզադահլիճում մասնակցել է բռնցքամարտի Հայաստանի առաջնությանը՝ մրցելով Կամո Իսկանդարյանի, Արամ Փիլոյանի հետ և արժանացել արծաթե մեդալի:

2021-2022 թթ. Վրաստանի մայրաքաղաք Թբիլիսիում Էրիկը մրցեց վրացի մարզիկի հետ, ունեցավ մեծ հաղթական հաջողություն և պատվով վերադարձավ հայրենի գյուղ:

2022թ. հունիս-հուլիս ամիսներին Էրիկը դուրս եկավ կիսաեզրափակիչ և եզրափակիչ փուլեր գրավելով առաջին հորիզոնականը:

Էրիկն իր մարզումները շարունակեց Օլիմպավանում, որտեղ նրա առաջ բացվեցին մեծ դռներ: Այսօրվանից մեր շնորհաշատ աշակերտը պատրաստվում է մասնակցել 2022թ. հոկտեմբերի 15-16-ը Մարտունի քաղաքում կայանալիք բռնցքամարտի միջազգային մրցումներին, որտեղ մրցելու է վրացի և պարսիկ մարզիկների հետ:

Լճաշեն գյուղի Ա.Տեր-Գրիգորյանի անվան միջնակարգ դպրոցի տնօրեն Աիդա Մուրադյանը և մանկավարժական անձնակազմը հպարտանում են իրենց սիրելի արի ու ուժեղ սանի նվաճումներով և մշտապես ոգեշնչում նրան հերթական հաղթանակների: 

Էրիկի բազում հաղթանակների գաղտնիքը, կախարդական ուժը նրա անսահման աշխատասիրությունն է ու քրտնաջան աշխատանքը,Էրիկի մարզչի, մեր դպրոցի սիրված շրջանավարտ Հրաչիկ Մելիքյանի ավանդը, հարազատ դպրոցի, հայրենի գյուղի, Գեղարքունիքի մարզի և իր երկրի պատիվն ամենուր բարձր պահելը:

Կեցցե'ս, մեր սիրելի Էրիկ:

Ուսուցչի օգնականներ՝ Տաթևիկ Ջոմարդյան, Շուշաննա Գրիգորյան
Սովորողների հետ ԴԱԿ՝ Ծովինար Կարապետյան