Սվետլանա Մանուկյանը դարձել է պարածանրամարտի ԵԱ-ի բրոնզե մեդալակիր. հավաքականը մասնակցել է նաև թիմային խառը մրցապայքարին

Սեպտեմբերի 29, 2022

Սպորտային լուրեր

Թբիլիսիում ավարտվել է Եվրոպայի պարածանրամարտի բաց առաջնությունը, որտեղ Հայաստանը ներկայացված է եղել 3 մարզիկով:

Հայաստանի ներկայացուցիչներից լավագույն արդյունքը ցույց է տվել կանանց 50 կգ քաշային կարգում հանդես եկող Սվետլանա Մանուկյանը: Նա Եվրոպայի առաջնությունում զբաղեցրել է 3-րդ հորիզոնականը՝ արժանանով բրոնզե մեդալի: Ի դեպ, գյումրեցի մարզուհու համար սա պրոֆեսիոնալ կարիերայի առաջին միջազգային մրցաշարն էր:

Հայաստանի մյուս ներկայացուցիչ, Հայաստանի բազմակի չեմպիոն, Եվրոպայի փոխչեմպիոն Գրետա Վարդանյանը, հանդես գալով 61 կգ քաշային կարգում, Եվրոպայի մայրցամաքային առաջնությունում զբաղեցրել է 5-րդ, իսկ Եվրոպայի բաց առաջնությունում՝ 6-րդ հորիզոնականը:

Պարածանրորդ Հարություն Մխիթարյանն անհատական մրցապայքարին չի կարողացել մասնակցել կորոնավիրուսային թեստի դրական պատասխանի պատճառով:

Սեպտեմբերի 29-ին արդեն Հայաստանի պարածանրամարտի հավաքականը հանդես է եկել թիմային խառը մրցապայքարում։ Պատվիրված 223.152 միավորից Հայաստանի ներկայացուցիչները կարողացել են վաստակել միայն 82.460 միավոր։ Գրետա Վարդանյանի հաջող մոտեցումից հետո մեր թիմն առաջին հորիզոնականում է եղել, սակայն մյուս երկու մոտեցումներում մեր մարզիկներ Սվետլանա Մանուկյանի և Հարություն Մխիթարյանի բարձրացրած քաշերը համարվել են չբարձրացված, ինչի արդյունքում Հայաստանի հավաքականը միավորներ չի ստացել և չի կարողացել հաղթահարել խմբային փուլի արգելքը։

Թիմային պայքարում սա Հայաստանի ներկայացուցիչների նորամուտն էր:

Մայրցամաքային առաջնություններից հետո Հայաստանի ներկայացուցիչները դեկտեմբերի 10-19-ն Արաբական Միացյալ Էմիրություններում մասնակցելու են աշխարհի գավաթի առաջնությանը, որը նույնպես վարկանիշային է լինելու Փարիզի 2024 թվականի պարաօլիմպիկ խաղերի համար:

 

Նյութի աղբյուրը. ՀՀ կրթության, գիտության, մշակույթի և սպորտի նախարարություն