Համահայկական կրթական խորհրդաժողովը կնպաստի Հայաստան-Սփյուռք կապերի ամրապնդմանն ու առկա խնդիրների լուծմանը

Օգոստոսի 22, 2022

Սփյուռքի լրատու Լուրեր կազմակերպություններից

Օգոստոսի 16-21-ն Աղվերանում կայացել է ՀՀ կրթության, գիտության, մշակույթի և սպորտի նախարարության կազմակերպած Համահայկական կրթական 10-րդ խորհրդաժողովը, որին մասնակցել են աշխարհի 21 երկրների հայկական կրթական կառույցների, Հայաստանի Հանրապետության, Արցախի Հանրապետության կրթության ոլորտի շուրջ 100 ներկայացուցիչներ, անցկացվել են 8 լիագումար և մասնախմբերի 11 նիստեր:

Խորհրդաժողովի փակման արարողությանը ներկա է եղել ՀՀ ԿԳՄՍ նախարարի տեղակալ Արթուր Մարտիրոսյանը: Նա ողջունել է մասնակից ուսուցիչներին, կրթական ոլորտի ներկայացուցիչներին և բարձր գնահատել վերջիններիս ջանքն ու նվիրումը՝ միտված Սփյուռքում հայապահպանության գործին. «Այս խորհրդաժողովն այն հարթակն է, որը հնարավորություն է տալիս բարձրաձայնելու Սփյուռքում կրթական ոլորտի կազմակերպման և իրականացման խնդիրների մասին, կանխորոշելու ԿԳՄՍ նախարարության հետ համագործակցության ուղիները։ Շարունակե՛ք Սփյուռքում հայ մանուկներին կրթելու ձեր նվիրյալ գործը՝ որպես մեր ինքնության պահպանման մարտիկներ»։

Խորհրդաժողովում ներկայացվել են Հայաստանի Հանրապետության լեզվական քաղաքականության հիմնական ուղղությունները, արևմտահայերենին վերաբերող գիտական աշխատանքները, Կրթական տեխնոլոգիաների ազգային կենտրոնի, Կրթության զարգացման և նորարարությունների ազգային կենտրոնի գործունեությունը, ՀԲԸՄ հայկական վիրտուալ համալսարանի, «Էդիտ Պրինտ» հրատարակչության, ՀՀ կրթության, գիտության, մշակույթի և սպորտի նախարարության կողմից սփյուռքի համար իրականացվող ծրագրերը, համագործակցության հնարավոր ուղիները:

Խորհրդաժողովն ամփոփվել է քննարկումների արդյունքներով պայմանավորված բանաձևի նախագծի ընդունմամբ, որն ուղղորդիչ է դառնալու ՀՀ ԿԳՄՍ նախարարության առաջիկա երկու տարիների գործունեության համար: Ներկայացվել է բանաձևի դեռևս աշխատանքային տարբերակը, որը ենթակա է լրամշակման՝ բոլոր կողմերի առաջարկների և դիտողությունների հիման վրա:

Արձանագրվել են մի շարք խնդիրներ, որոնք վերաբերում են տվյալ երկրում բարենպաստ քաղաքական-իրավական պայմանների առկայությանը, հայագիտական և հայրենագիտական առարկաների միասնական կրթական քաղաքականությանը, մեկօրյա և ամենօրյա դպրոցների համար ուսումնամեթոդական համալիրի՝ կրթական-առարկայական ընդհանուր չափորոշիչների, ուսումնական ծրագրերի, դասագրքերի, ուսումնաօժանդակ նյութերի բացակայությանը և այլն:

Որպես լուծում՝ ընդգծվել են մի շարք անհրաժեշտություններ, այդ թվում՝ հետամուտ լինել հայրենաճանաչությանը, հայկական ինքնության պահպանմանը, հայ դպրոցի և Հայաստան-Սփյուռք կապերի զորացմանը, ազգային, հոգևոր, բարոյական և արժանապատիվ նկարագրով հայի կրթությանն ու դաստիարակությանը, մշակել հայրենագիտական առարկաների կրթական չափորոշիչներ՝ Սփյուռքում առկա կրթական ներուժի օգտագործմամբ և տեղական կարիքների հաշվառմամբ, մշակել և իրականացնել Սփյուռքի համայնքների կարիքներին ուղղված հեռավար ձևաչափով կրթության կազմակերպման ծրագրեր (սկզբնական շրջանում առանձին կրթական ծրագրերի մոդուլների տեսքով), օգտագործել արտաքին քաղաքականության միջոցները՝ ի նպաստ հայեցի կրթության ընդլայնման և բովանդակային զարգացման, նպաստել արևմտահայերենի պահպանմանը և խրախուսել դրա գործածությունը։

Մասնակիցները խորհրդաժողովի անցկացումն ու արդյունքները դրական են գնահատել: Ըստ նրանց՝ սա փորձի փոխանակման, համագործակցության ընդլայնման լավ հնարավորություն է, ինչպես նաև խնդիրների հասցեագրման և դրանց լուծմանն ուղղված գործունեության նոր մեկնարկ:

Նշենք, որ խորհրդաժողովը կազմակերպվում է ՀՀ կառավարության աջակցությամբ և 2 տարվա պարբերականությամբ:

Նյութի աղբյուրը. ՀՀ կրթության, գիտության, մշակույթի և սպորտի նախարարություն