Մեր շնորհալիները

Փետրվարի 27, 2017

Դպրոցական անցուդարձ

Լոռու մարզի Ստեփանավանի թիվ 3 հիմնական դպրոցում տեղի ունեցավ միջոցառում «Մեր շնորհալիները» խորագրով: Դեռևս գոյություն ունի այն կարծիքը, թե գեղեցկությունը բնության պարգև է, այն հնարավոր չէ ձեռք բերել: Այսպիսի պատկերացումը սխալ է: Յուրաքանչյուր մարդ գեղեցիկ է յուրովի, և այդ գեղեցկությունը անհրաժեշտ է պահպանել, վերացնելով թերությունները, ընդգծելով անհատական արժեքները: Այս ամենը նշանակում է խոսքի կուլտուրայի, շրջապատում պահվածքի և վերջապես, արտաքին տեսքի՝ մազերի ու հագուստի ներդաշնակ զուգակցում: Այս ամենին պետք է տիրապետի յուրաքանչյուր մարդ՝ թե տղա, և թե աղջիկ:

-Ով ոչ մի բան չի հարցնում, նա ոչ մի բան չի սովորում:

-Ոչ արվեստը, ոչ էլ իմաստությունը չեն կարող ձեռքբերվել առանց դրանց սովորելու:

-Առանց օրինակների հնարավոր չէ ոչ ճիշտ սովորեցնել,ոչ էլ հաջողությամբ սովորել:

Քանի որ յուրաքանչյուր միջոցառում ունի նպատակ սովորեցնելու, ահա այս խորիմաստ ասույթներով էլ սկսեցինք մեր գեղեցիկ մրցույթ միջոցառումը: Միջոցառմանը մասնակցում էին յոթերորդ դասարանի աշակերտները: Գեղեցիկ միջոցառմանը աջակցեցին նաև մեր շնորհալի ծնողները և ուսուցչական կոլեկտիվը: Մրցույթ-միջոցառման ընթացքում կային բազմաթիվ ուսուցողական խաղեր, հարց ու պատասխաններ, մրցույթներ նաև հանդիսատեսների միջև: Խաղերն ու մրցույթները միմյանց հաջորդում էին հետաքրքիր ու անսպասելի անակնկալներով, որը միջոցառմանը ավելի մեծ հետաքրքրություն էր հաղորդում: Օրինակ՝ բեմականացվել էր տղաների վիճաբանություն, որի ընթացքում իբրև պոկվել էին նրանց կոճակները և քանդվել փոխկապները: Մրցույթի ընթացքում տղաները կարեցին կոճակները, աղջիկները կապեցին նրանց փոխկապները: Մի այլ խաղի ընթացքում էլ տղաները մաքրեցին կարտոֆիլ, իսկ աղջիկները մեխեցին մեխեր: Չէինք մոռացել նաև անվտանգության և առաջին բուժօգնության կանոնների մասին: Աղջիկները ցուցադրեցին ինչպես մշակել վերքը: Աշակերտուհիները պատրաստեցին աղցան, ձևավորեցին անձեռոցիկներ և սպասքադրեցին խնջույքի սեղան: Մրցույթին մասնակցեցին նաև մեր շնորհալի մայրիկերը, իրենց տրված ժամանակահատվածում հարդարեցին աղջիկների վարսերը: Իբրև վերջաբան մեր միջոցառումը զարդարեց համով-հոտով և գեղեցիկ ձևավորված ղափաման, որն էլ մատուցվեց ներկաներին տարազով աշակերտուհու կողմից: