Աշխատանքային խորհրդակցություն՝ «ՀՀ վարչապետի գավաթ» սիրողական լողի մրցաշարից առաջ

Հուլիսի 26, 2022

Սպորտային լուրեր

«ՀՀ վարչապետի գավաթ» սիրողական լողի մրցաշարի կազմակերպման հանձնաժողովի անդամները խորհրդակցություն են անցկացրել ԿԳՄՍ նախարարությունում՝ քննարկելու մրցաշարի անցկացմանն առնչվող հարցերը:

Խորհրդակցությանը, որը վարել է ԿԳՄՍ նախարարի տեղակալ, հանձնաժողովի նախագահ Կարեն Գիլոյանը, մասնակցել են ՀՀ Գեղարքունիքի մարզպետի տեղակալ Ռուբիկ Նավոյանը, ՀՀ ոստիկանության հասարակական անվտանգության ապահովման գլխավոր վարչության պետ, ոստիկանության գնդապետ Գեորգի Այվազյանը, Հայաստանի լողի ֆեդերացիայի նախագահ Հովսեփ Մեսրոպյանը, ինչպես նաև շահագրգիռ այլ գերատեսչությունների ներկայացուցիչներ:

Մրցաշարի նախապատրաստման և անցկացման աշխատանքները համակարգում է ՀՀ կրթության, գիտության, մշակույթի և սպորտի նախարարությունը:

Մրցաշարը կանցկացվի 2022 թվականի օգոստոսի 23-ին, Սևանա լճում՝ ՀՀ Գեղարքունիքի մարզի Շողակաթ համայնքին հարակից լողափնյա տարածքում:

Մրցաշարի մասնակիցները մրցավայր կտեղափոխվեն ավտոբուսներով: Մրցաշարի ընթացքում կաշխատեն շտապօգնության մեքենաներ, կգործի նաև բուժկետ՝ անհրաժեշտության դեպքում առաջին բուժօգնությունն ապահովելու նպատակով:

Հանդիպման ընթացքում կարևորվել է նաև մրցաշարի ամբողջ ընթացքում Սևանա լճում ջրափրկարարների և մոտորանավակների առկայության անհրաժեշտությունը: Հանձնաժողովի անդամները պայմանավորվել են առաջիկա օրերին ՀՀ Գեղարքունիքի մարզի Շողակաթ համայնքին հարակից լողափնյա տարածք այցելելու և տեղում ուսումնասիրություններ կատարելու վերաբերյալ, որին կմասնակցի նաև ՀՀ արտակարգ իրավիճակների նախարարության ներկայացուցիչը: ԱԻՆ մասնագետներն ուսումնասիրություններ պետք է կատարեն նաև Սևանա լճի հատակում:

Ոստիկանության գնդապետ Գեորգի Այվազյանը հավաստիացրել է, որ անվտանգության ապահովման հետ կապված որևէ խնդիր չի լինի. ամեն ինչ կարվի մրցաշարը հավուր պատշաճի անցկացնելու համար:

Կարևորվել է նաև հեռարձակման ապահովման հարցը: Կազմակերպչական հարցերով զբաղվող ընկերության ներկայացուցիչն ընդգծել է՝ այդ և կազմակերպչական մյուս հարցերով աշխատանքները սահուն են ընթանում:

Հիշեցնենք՝ ավելի վաղ փոփոխություն էր տեղի ունեցել նաև մրցաշարի հաղթողների պարգևատրման կարգում: Ըստ այդմ՝ դրամական մրցանակներ են նախատեսված 1-ից 10-րդ տեղերը զբաղեցրած մասնակիցների համար:

Դրամական պարգևներ երկու տարիքային խմբերի 1-ից 10-րդ տեղեր գրաված մասնակիցներին՝

1-ին տեղ՝ 1.000.000 ՀՀ դրամ,
2-րդ տեղ՝ 600.000 ՀՀ դրամ,
3-րդ տեղ՝ 400.000 ՀՀ դրամ,
4-րդ տեղ՝ 150.000 ՀՀ դրամ,
5-րդ տեղ՝ 100.000 ՀՀ դրամ,
6-10-րդ տեղերը՝ 75.000 ՀՀ դրամ:

Հարկերը, տուրքերը և պարտադիր վճարները ներառված չեն, ծախսերը կատարվում են ՀՀ պետական բյուջեից հատկացված միջոցների հաշվին:

Մրցաշարը կանցկացվի երկու տարիքային խմբով`

1-ին տարիքային խումբ՝ 18-ից 35 տարեկան (1987-2004 թթ.) կանայք, 18-ից 40 տարեկան (1982-2004 թթ.) տղամարդիկ,
2-րդ տարիքային խումբ՝ 36 տարեկանից (1986 թ. ծնված) բարձր տարիքի կանայք, 41 տարեկանից (1981 թ. ծնված) բարձր տարիքի տղամարդիկ:

Կանայք կմրցեն 1000 մետր, իսկ տղամարդիկ՝ 1500 մետր լողատարածություններում:

 

Նյութի աղբյուրը. ՀՀ կրթության, գիտության, մշակույթի և սպորտի նախարարություն