Հմտությունների և լավագույն փորձի փոխանակում՝ «Մշակութային ժառանգության պահպանության կազմակերպումը և մշակութային արժեքների վերականգնումը Ֆրանսիայում» վերապատրաստման դասընթացի շրջանակում

Հուլիսի 12, 2022

Մշակութային լուրեր

Հայաստանում Ֆրանսիայի դեսպանությունը և ՀՀ կրթության, գիտության, մշակույթի և սպորտի նախարարությունը մեկնարկել են «Հայաստան․ ժառանգության ուսուցում, պահպանում և արժևորում» ծրագիրը:

Ծրագրի շրջանակում Մեսրոպ Մաշտոցի անվան հին ձեռագրերի գիտահետազոտական ինստիտուտի նիստերի դահլիճում (Մատենադարան) հուլիսի 12-14-ը կանցկացվի «Մշակութային ժառանգության պահպանության կազմակերպումը և մշակութային արժեքների վերականգնումը Ֆրանսիայում» վերապատրաստման դասընթացը, որի առաջին բաղադրիչի մեկնարկը տրվել է ՀՀ ԿԳՄՍ նախարարության մշակութային ժառանգության և ժողովրդական արհեստների վարչության պետ Աստղիկ Մարաբյանի ողջույնի խոսքով:

Ծրագրի այս բաղադրիչն իրականացնում է Ժառանգության ազգային ինստիտուտը՝ Պատմամշակութային ժառանգության գիտահետազոտական կենտրոնի հետ համագործակցությամբ։

Նախագծի շրջանակում նախատեսվում է մշակութային ժառանգության վերականգնման և ամրակայման մասնագետների հմտությունների ամրապնդում և զարգացում՝ շարունակական վերապատրաստման դասընթացների միջոցով։

Եռօրյա վերապատրաստում-դասընթացները նվիրված են մշակութային արժեքների պաշտպանության թեմային: Հանդիպումների շրջանակում կներկայացվի Ֆրանսիայի լավագույն փորձը, որը հնարավորություն կընձեռի քննարկելու և համատեղ մշակելու այն աջակցությունը, որը Ֆրանսիան կարող է տրամադրել քննարկվելիք թեմաների վերաբերյալ:

«Երեք բաղադրիչից կազմված նախագիծն ընդգրկում է մշակութային ժառանգության տարբեր ուղղություններ և հիմնվում է ֆրանսիացի ու հայ գործընկերների հմտությունների և լավագույն փորձի վրա: Ծրագրի օրակարգը ձևավորել ենք նախորդ տարի ֆրանսիացի գործընկերների այցի և այս տարի մեր՝ իմ և «Էրեբունի» պատմահնագիտական արգելոց-թանգարանի տնօրեն Միքայել Բադալյանի Փարիզ այցի ընթացքում: Մեր հավաքած հարցերը և նյութերը համադրելով՝ ձևավորեցինք եռօրյա դասընթացների օրակարգը: Այս երեք օրերի ընթացքում մենք անցկացնելու ենք հիմնականում տեսական դասընթացներ, օրինակ՝ ինչպես են Ֆրանսիայում իրականացվում պատմամշակութային ժառանգության ոլորտում պահպանմանն ուղղված աշխատանքները, այդ համատեքստում՝ տարհանման պլանների մշակում, օրենսդրական աշխատանքների կարգավորում, գործընթացներ, որոնք կարող են նպաստել ոլորտի բարելավմանն ու զարգացմանը: Այստեղ կխոսվի առանձին թանգարանների փորձի, ֆոնդերի ձևավորման և ոլորտային այլ գործընթացների մասին: Պատմամշակութային ժառանգության ոլորտում պահպանությանն ուղղված ֆրանսիացի գործընկերների փորձը մեզ համար շատ հետաքրքիր է: Օրինակ՝ մշակութային արժեքների տարհանման փորձը բացառիկ է, ինչի յուրացման կարիքը կա»,- նշել է «Պատմամշակութային ժառանգության գիտահետազոտական կենտրոն» ՊՈԱԿ-ի տնօրեն Խաչիկ Հարությունյանը և հավելել, որ այս դասընթացի շրջանակում ֆրանսիացի գործընկերների հետ երկուստեք կկիսվեն իրենց հմտություններով և լավագույն փորձով:

Դասընթացի շրջանակում Ֆրանսիայի Ժառանգության ազգային ինստիտուտի տնօրեն Շարլ Պերսոնան «Մշակույթի նախարարությունը և մշակույթի կազմակերպումը Ֆրանսիայում» խորագրով զեկույցի շրջանակում ներկայացրել է ինստիտուցիոնալ կառույցների ձևավորման, մշակութային արժեքների տարհանման, Ֆրանսիայում պատմամշակութային արժեքների պահպանությանն ուղղված մի շարք հարցեր:

Այնուհետև Ժառանգության ազգային ինստիտուտի տնօրենի օգնական, վերականգնման բաժնի հետազոտական աշխատանքների և շարունակական կրթության պատասխանատու Նատալի Պալմադ-Լե Դանթեքը կանցկացնի վերականգնողների և ֆոնդապահների վերապատրաստում։

Ծրագրի երկրորդ օրը կվերաբերի Ֆրանսիայում արտակարգ իրավիճակների ծրագրերի իրականացմանը և կանդրադառնա Կապույտ Վահանի կարևոր դերին, իսկ երրորդ օրը կներկայացվեն ժառանգության պաշտպանության մասին օրենքները՝ գողության, վանդալիզմի, հարձակումների և մշակութային արժեքների ապօրինի շրջանառության դեմ:

Նյութի աղբյուրը. ՀՀ կրթության, գիտության, մշակույթի և սպորտի նախարարություն