Մայրենիի տոնին նվիրված միջոցառում Հրազդանի Վ. Սարոյանի անվան հ.11 հիմնական դպրոցում

Փետրվարի 23, 2017

Դպրոցական անցուդարձ

1999 թվականի նոյեմբերի 17-ին ՅՈՒՆԵՍԿՕ-ն որոշում է ընդունել մայրենի լեզվի օր սահմանելու մասին:

Օրը սահմանվեց:

2000 թվականի փետրվարի 21-ին ամբողջ աշխարհն սկսեց տոնել իր մայրենի լեզվի միջազգային օրը:

«Ձեզ եմ ասում՝ ձեզ, հայոց նորահաս երիտասարդք, ձեր անունին մեռնիմ, ձեր արևին ղուրբան,տասը լեզու սովորեցեք, ձեր լեզուն, ձեր հավատքը ղայիմ բռնեցեք» (Խ. Աբովյան):

Մեր լեզուն՝ մեր ինքնությունը հաստատող մեր ազգային կնիքը, պետականությունից զրկված մեր ազգին դարեր շարունակ հայ պահեց և հայ է պահում ու հայ է պահելու դարերի հավերժությունում:

Ազգին պահպանողը լեզուն է, լեզվի մահը ազգի մահն է:

«Ես իմ անուշ Հայաստանի արևահամ բառն եմ սիրում...»,

«Հայ լեզուն տունն է հայուն»,

«Մեր շուրջը լեզուներ՝ նոր ու հին,
Մեր շուրջը խոսում են այլորեն,
Ե՛կ խոսենք, եղբա՛յր իմ, հայերեն,
Կուլ չերթանք այս ահեղ լափումին...»:

Հայաստանի Հանրապետության վաստակավոր մանկավարժ Կարինե Ստեփանյանի կազմակերպած միջոցառումը՝ նվիրված հայոց լեզվի տոնին, խորիմաստ էր, հայապատ ու հայալեզու, հայավառ ու հայապաշտ. յուրաքանչյուր հայի պարտքն է պահել ու պաշտպանել մայրենի լեզուն, եթե անգամ «առյուծի արնախում երախում էլ լինի»:

Աշակերտները, իրոք, իրենց տարերքի մեջ էին, հայի ու հայկականի տարերքի մեջ:
Նրանց խոսքի հնչեղությունը հայկական էր, իսկական, մաքուր հայկական, որով ավանդվում էր չխառնել մեր մաքրամաքուր ու առնական լեզուն օտարների հետ:

Նա պիտի մեր առաջին
Ու վերջին սերը լինի,
Ի՞նչ ունենք էլ աշխարհում,
Որ այսքան մերը լինի:

 

Մ. Զաքարյան
Դպրոցի տնօրեն