ՀԱՅԿԱԿԱՆ ԿՐԹԱԿԱՆ ՄԻՋԱՎԱՅՐ
ՊՈՐՏԱԼ
ԿՐԹԱԿԱՆ
ՖՈՐՈՒՄ
ՊԱՇԱՐՆԵՐԻ
ՇՏԵՄԱՐԱՆ
ՀԵՌԱՎԱՐ
ՈՒՍՈՒՑՈՒՄ
ԻՆՏԵՐԱԿՏԻՎ
ՈՒՍՈՒՑՈՒՄ
ԿԿՏ
ՀԱՄԱԿԱՐԳ

«Հակամարտությունը չպետք է խոչընդոտի Լեռնային Ղարաբաղում կրթության իրավունքի իրացմանը». ԿԳՄՍ նախարարի տեղակալ Ա. Մարտիրոսյանի ելույթը միջազգային գագաթնաժողովում

Հունիսի 30, 2022
Միջազգային լուրեր

ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը ելույթ է ունեցել Կրթության փոխակերպման գագաթնաժողովի` (Transforming Education Summit) հունիսի 27-30-ը Փարիզում ընթացող նախապատրաստական համաժողովում:

Նախարարի տեղակալը նշել է, որ ՅՈՒՆԵՍԿՕ-ի կողմից կազմակերպված կրթության փոխակերպման հարցերի շուրջ միջազգային մակարդակով այս քննարկումները Հայաստանի համար խիստ այժմեական են, քանի որ դրանք և սեպտեմբերին՝ կայանալիք Կրթության փոխակերպման գագաթնաժողովին ընդառաջ կազմակերպվող ազգային խորհրդակցությունները կսնուցեն մեր երկրում ընթացող կրթական բարեփոխումները, ինչպես նաև կրթության զարգացման երկարաժամկետ ռազմավարական պլանավորման գործընթացը:

Շնորհակալություն հայտնելով կազմակերպիչներին` նախարարի տեղակալը նշել է, որ ազգային խորհրդակցությունների արդյունքում դեռևս կհստակեցվեն Հայաստանի հանձնառությունները կրթության փոխակերպման առումով: Այս համատեքստում նա առանձնացրել է մի շարք կարևոր շեշտադրումներ, որոնք առկա են կրթության բարեփոխումների հիմքում և ներդրվելու են նշված հանձնառություններում:

Մասնավորապես Արթուր Մարտիրոսյանն առանձնացրել է որակյալ և մատչելի կրթության հասանելիությունը, կյանքի բոլոր փուլերում կրթության իրավունքի իրացումը: Փոխնախարարը փաստել է, որ գիտելիքի կողքին շեշտադրվում են նաև արժեքների և վերաբերմունքի ձևավորումը, հմտությունների զարգացումը: Այնպիսի գիտելիքներ և հմտություններ, ինչպիսիք են՝ մեդիագրագիտություն, կիբերգրագիտություն, ֆինանսական գրագիտություն, ակտիվ քաղաքացիություն, հոգատարություն շրջակա միջավայրի հանդեպ և այլն, որոնք այժմ սովորողները ստանում են հիմնականում ոչ ֆորմալ կրթության միջոցով, պետք է տեղ գտնեն ֆորմալ կրթության մեջ։

Նշելով, որ կրթության ռազմավարության առանցքային մոտեցում է սովորողակենտրոն մոտեցումը, Ա․ Մարտիրոսյանը փաստել է, որ որակյալ կրթությունը պետք է հասանելի լինի բոլորին՝ անկախ իրենց տարիքից, աշխարհագրական հեռավորությունից:

«Սա ենթադրում է բոլորի համար որակյալ կրթության հասանելիություն, այդ թվում նաև Հայաստանի հեռավոր և մեկուսացված համայնքներում: Մենք պետք է ապահովենք կրթության իրավունքը և կրթության շարունակականությունը՝ անկախ քաղաքական կոնֆլիկտներից և ճգնաժամային իրավիճակներից»,- ընդգծել է նա:

Արթուր Մարտիրոսյանն անդրադարձել է նաև Լեռնային Ղարաբաղում կրթության իրավունքի լիարժեք իրացման առաջնահերթության խնդրին:

«Անդրադառնալով կոնֆլիկտային իրավիճակներում կրթության իրավունքի վերաբերյալ տիկին Օդրի Ազուլեի՝ առավոտյան նիստում հնչեցրած խոսքերին՝ հարկ եմ համարում ձեր ուշադրությունը հրավիրել Լեռնային Ղարաբաղում սովորողների կրթության իրավունքի վրա։ Իհարկե, հակամարտությունն ակտիվ փուլում չէ, ինչպես 2020 թվականի աշնանը Լեռնային Ղարաբաղի նկատմամբ Ադրբեջանի կողմից սանձազերծված ագրեսիայի ընթացքում, սակայն մենք պետք է ամեն ինչ անենք կրթության իրավունքն ապահովելու համար՝ անկախ նրանից, թե որքան ժամանակ և ջանք կպահանջի հակամարտության երկարաժամկետ հանգուցալուծման ուղիների փնտրտուքը»,- ընդգծել է ԿԳՄՍ փոխնախարարը։

Արթուր Մարտիրոսյանն անդրադարձել է նաև կրթական համակարգի արդյունավետության բարձրացման, աշխատաշուկայի պահանջների բավարարման, կրթության մեջ տեխնոլոգիաների կիրառելիության խնդիրներին, առանձնացրել կրթության փոխակերպման դերը մարդկային կապիտալի զարգացման, ներառական և կայուն տնտեսական աճի, դիմակայուն հասարակության ձևավորման համատեքստում։

«Մենք վճռական ենք՝ շարունակելու խորհրդատվությունները բոլոր հիմնական շահագրգիռ կողմերի, այդ թվում՝ նաև երիտասարդության հետ՝ բացահայտելու կրթության փոխակերպման քաղաքականության միջամտությունների ոլորտները, որպեսզի սեպտեմբերին կայանալիք գագաթնաժողովի ընթացքում ունենանք կրթության փոխակերպման ճանապարհային քարտեզը»,- ամփոփել է փոխնախարարը:

Համաժողովի շրջանակում Արթուր Մարտիրոսյանը հանդիպել է հասարակական և հումանիտար գիտությունների գծով ՅՈՒՆԵՍԿՕ-ի գլխավոր տնօրենի տեղակալ Գաբրիելա Ռամոսի հետ և քննարկել երիտասարդության ոլորտում քաղաքականության մշակման ու զարգացման շրջանակում համագործակցությունը։ ՅՈՒՆԵՍԿՕ-ն վերը նշված հարցում կրկին վերահաստատել է իր աջակցությունը Հայաստանին:

ԿԳՄՍ նախարարի տեղակալը հանդիպել է նաև ՅՈՒՆԵՍԿՕ-ի քաղաքականությունների և ցկյանս կրթական համակարգերի բաժնի տնօրեն Բորհեն Չակրունին, ՅՈՒՆԵՍԿՕ-ի կրթության պլանավորման միջազգային ինստիտուտի ներկայացուցիչների հետ:

Հիշեցնենք, որ Փարիզ կատարած աշխատանքային այցի շրջանակում նախօրեին ԿԳՄՍ նախարարի տեղակալ Արթուր Մարտիրոսյանը հանդիպումներ էր ունեցել նաև ՅՈՒՆԵՍԿՕ-ի գլխավոր տնօրենի կրթության հարցերով տեղակալ Ստեֆանիա Ջիանինի և ՅՈՒՆԵՍԿՕ-ի անդամ երկրների հետ կապերի բաժնի ղեկավար Դով Լինչի հետ։ Հանդիպումների ընթացքում քննարկվել են կրթության ոլորտում միջազգային փորձագիտական աջակցության տրամադրմանն առնչվող հարցեր։

 

Նյութի աղբյուրը. ՀՀ կրթության, գիտության, մշակույթի և սպորտի նախարարություն

  • 9-րդ դաս. Բնագիտություն առարկայի քննությունը ուս. նախագծի միջոցով անցկացնելու մասին

    Թեմայի հեղինակ՝ manush

    ՀՀ ԿԳՄՍ նախարարի մարտի 11-ի 2024 թվականի N 07-Լ հրամանով հաստատվել է Հայաստանի Հանրապետության Տավուշի մարզի հանրակրթական ուսումնական հաստատությունների 2023-2024 ուսումնական տարվա 9–րդ դասարանի «Բնագիտություն» («ֆիզիկա», «Քիմիա», «Կենսաբանություն», «Աշխարհագրություն»՝ սովորողի…

  • Նախագծային ուսուցում. Հայեցակարգ և ուսուցիչների վերապատրաստման մոդուլ

    Թեմայի հեղինակ՝ manush

    Հարգելի գործընկերներ, ՀՀ ԿԳՄՍ նախարարի մարտի 11-ի 2024 թվականի N 08-Լ հրամանով հաստատվել է «Նախագծային ուսուցման հայեցակարգը և ուսուցիչների վերապատրաստման մոդուլը»: ՀՀ ԿԳՄՍ նախարարի հրամանը և հավելվածը նախարարության պաշտոնական կայքում…

  • Ուսուցման արդի մեթոդները 2

    Թեմայի հեղինակ՝ manush

    Հեղինակ՝ Ani Hovhannisyan (https://forum.armedu.am/member/9839-ani-hovhannisyan) Այս թեման Անի Հովհաննիսյանի «Ուսուցման արդի մեթոդները որպես սովորողի ուսումնառության մոտիվացիա (https://forum.armedu.am/forum/%D5%AF%D6%80%D5%A9%D5%A1%D5%AF%D5%A1%D5%B6-%D5%B8%D5%AC%D5%B8%D6%80%D5%BF/%D5%B4%D5%A1%D5%BD%D5%B6%D5%A1%D5%A3%D5%A5%D5%BF

  • Ուսուցման արդի մեթոդները

    Թեմայի հեղինակ՝ Ani Hovhannisyan

    Ուսուցման արդի մեթոդները որպես սովորողի ուսումնառության մոտիվացիա Ինչպես ասել է ամերիկացի հոգեբան Ֆրեդերիկ Սքիները «Աշխարհը բարելավելու համար հարկավոր է շրջվել դեպի դրական կրթական մեթոդներ: Այն պահից, եր բացահայտվեն առավել արդյունավետ…

  • Նախագծային ուսուցում

    Թեմայի հեղինակ՝ Մարիետա

    Նախագծային ուսուցումը դասավանդման մեթոդ է, որի միջոցով սովորողները ձեռք են բերում գիտելիքներ և հմտություններ՝ որոշակի ժամանակ հետազոտելով գործնական, համալիր և հրատապ բնույթի հարցեր, խնդիրներ և մարտահրավերներ: Նախագիծը առանձին սովորողների կամ…