«Դու միշտ արթուն, իմ հա՛յ զինվոր»

Փետրվարի 22, 2017

Դպրոցական անցուդարձ

«Ես երդում տված եմ և կպատկանեմ մեկ մարդու, այդ մարդը հայրենիքի ազատության զինվորն է»
Մոնթե Մելքոնյան

Հայոց բանակի կազմավորման 25-ամյակի կապակցությամբ Գյումրու թիվ 4 արհեստագործական պետական ուսումնարանում անցկացվեց «Դու միշտ արթուն, իմ հա՛յ զինվոր» խորագրով միջոցառում:

Միջոցառման նպատակն էր արժևորել հայոց բանակի ստեղծումը՝ որպես պետության անկախության պահպանման երաշխիք, հայ զինվորին և նրա ծնողին՝ որպես հայրենի երկրի խաղաղության պաշտպան: 

Միջոցառման պատվավոր հյուրերն էին ԱԺ պատգամավոր Ս. Ավետիսյանը, ուսումնական հաստատությունների տնօրեններ, ՀՀ ՊՆ Գյումրու կայազորի N զորամասի հրամանատարի տեղակալ, փոխգնդապետ Արմեն Գրիգորյանը, Երկրապահ կամավորականների միության Շիրակի մարզային խորհրդի նախագահ Յուրա Ալեքսանյանը, Երկրապահ կամավորականներ. Գյումրու զինկոմիսարիատի ներկայացուցիչներ, պարտադիր զինծառայության մեջ գտնվող ուսանողների  45  ծնող, 2016 թվականին զորացրված, արցախյան պատերազմի մասնակից, բազմաթիվ պարգևների արժանացած ուսումնարանի շրջանավարտներ:

Միջոցառման սկիզբն ազդարարվեց պատվո պահակախմբի կողմից ՀՀ պետական դրոշի հանդիսավոր ներսբերումով և ՀՀ ազգային օրհներգով՝ Գյումրու կայազորի փողային նվագախմբի կատարմամբ:

Խորհրդանշական էր խոհախրատական բեմականացումը, որը ևս մեկ անգամ ապացուցեց  հայ ժողովրդի դարավոր պայքարի համար փրկարար փարոս դարձած ու պատմության խորքից ժառանգություն ստացած գրի, հավատի և ուժի զորությունը: 

Միջոցառման մասնակիցները, լինելով անկախության սերունդ, հպարտորեն ներկայացրին պատերազմների բովում թրծված և հաղթանակած 25-ամյա Հայոց բանակի կազմավորման պատմությունը՝ իմաստավորելով Հայրենիք, Անկախություն, Զինվոր վեհ գաղափարները:

Ներկաներին հուզեց զինվոր որդու երդումը մայր հայրենիքին, որը քաջասիրտ բազեի ճախրանքով ամրացավ յուրաքանչյուրի սրտում:

Հայրենասիրական խրոխտ երգն ու  պարը, հայրենաշունչ բանաստեղծությունները վկայակոչեցին, որ  բոլոր ժամանակների հայ զինվորը բանակ է տանում իր կամքը, արիությունը, որդիական սերը սեփական երկրի հանդեպ։

Մեծարանքի խոսք հղվեց ապրիլյան քառօրյա պատերազմին մասնակից, կրթօջախի շրջանավարտ զինվորներին, ովքեր կրտսեր ընկերներին պատգամեցին երբեք չերկնչել և պահպանել արյան գնով ձեռք բերած անկախությունը:

Հուզառատ էր հատկապես այն պահը, երբ հերոսացած շրջանավարտները ծաղիկներ նվիրեցին այժմ ծառայության մեջ գտնվող զինվորների ծնողներին՝ մաղթելով Հայաստան աշխարհին խաղաղություն, իսկ որդիներին՝ բարի վերադարձ:

Եվ  նժդեհաշունչ գաղափարները հնչեցին որպես զորակոչ՝ Լույսի, Ոգու, Ապագայի....

Ուսմասվար՝   Ս. Էլբակյան