«Քաջերի սերունդները քաջեր են» Մ.Խորենացի

Փետրվարի 22, 2017

Դպրոցական անցուդարձ

Հայ ժողովրդի բազմադարյա պատմությունը ու մարտի դաշտում ծավալված վերջին իրադարձությունները մեզ` հայերիս, դարձրել են մի ամբողջություն. ազգովի դարձել ենք հայրենիքի զինվոր` մեր արած գործով ու մեր բաժին նվիրումով:

Այսպիսի նվիրումով սկսվեց մեր՝ Երևանի Մ.Գալշոյանի անվան հ.148 ավագ դպրոցի հունվարի 27-ի միջոցառումը` նվիրված Հայոց բանակի 25- ամյակին:

Միջոցառումը սկսվեց ՀՀ օրհներգի զգաստացնող հնչյունների ներքո:

Իրենց ներկայությամբ ցերեկույթը պատվեցին հարգարժան հյուրեր ՀՀ զինված ուժերի պաշտպանության նախարարի խորհրդական, գեներալ-լեյտենանտ Մուրազ Սարգսյանը, ՀՀ ոստիկանության ներքին աուդիտի վարչության պետ , գնդապետ Վարդան Թունյանը, ՀՀ պաշտպանության նախարարության գլխավոր շտաբի ավագ լեյտենանտ Հարություն Պետրոսյանը, Արցախյան ազատամարտի , կանանց հասարակական խորհրդի նախագահ, բուժծառայության գնդապետ Աիդա Սերոբյանը, մեծանուն գրող Մ. Գալշոյանի այրին` տիկին Ագնեսան, Արաբկիրի վարչական շրջանի կրթության, մշակույթի ու սպորտի բաժնի պետ Գայանե Հարությունյանը, Արաբկիրի վարչական շրջանի ղեկավարի խորհրդատու Արամ Գրիգորյանը, Արաբկիրի վարչական շրջանի ղեկավարի աշխատակազմի քարտուղար Արմեն Բալբաբյանը և դպրոցի տնօրեններ:
Աշակերտների հայրենասիրական խոսքով, խրոխտ երգով ու պարով շարունակվեց միջոցառումը` հանդիսատեսին պարգևելով հուզիչ և ոգևորող ակնթարթներ: Հայ գրողների ստեղծագործություններից, հայոց պատմությունից արձակ և չափածո մեջբերումները, թատերականացված տեսարանները ավելի տպավորիչ ու նպատակային էին դարձնում դահլիճի մթնոլորտը: Բեմում կանգնած տարբեր դասարանների շնորհալի աշակերտների երգն ու պարը արևի ճառագայթների նման տարածվում էին դահլիճում` միահյուսվելով ներկաների սրտի խոսքին, թաքուն հուզմունքին ու նվիրական երազանքին:

Դպրոցի տնօրեն Հ. Դավթյանի անմիջական նախաձեռնությամբ և կազմակերպիչ Աիդա Չիլինգարյանի կազմակերպած այս միջոցառումը տնօրենի գնահատմամբ դպրոցի պատմության մեջ դարձավ նոր էջ` կարևորելով հայրենասիրական դաստիարակության անհրաժեշտությունը, ընդգծելով, ցուցադրելով այն, որ մեր օրերում մեծանում է հզոր, գիտակ, հայրենասեր ոգի ունեցող մի սերունդ, որը այսօր էլ կարող է մի բռունցք դառնալ: Այս գնահատականը ավելի շոշափելի դարձավ, երբ իր սրտաբուխ խոսքով նույնը հավաստեց գեներալ - լեյտենանտ Մուրազ Սարգսյանը: Նա ավելացրեց, որ միջոցառումը հերթական իրողություն է. այս դպրոցում կա հայրենասիրական ոգի և դաստիարակություն: Գեներալ- լեյտենանտ Մուրազ Սարգսյանը պատվոգրով պարգևատրեց դպրոցի տնօրեն Հ. Դավթյանին մատաղ սերնդի դաստիարակության գործում արժանին ներդնելու համար, իսկ աշակերտուհիներ Լիլիթ Գալստյանին (9-րդ Ա դաս.) և Լուսինե Թունյանին (10-րդ Ե դաս.)` ռազմահայրենասիրական միջոցառումներին և կազմակերպչական աշխատանքներին ակտիվ մասնակցություն ցուցաբերելու համար: 

Չափազանց հուզիչ էր, երբ գեներալ-լեյտենանտը իր բերած հուշամեդալը նվիրեց հայոց բանակում այժմ ծառայող, այս պահին արձակուրդում գտնվող, մեր դպրոցի սան Աբրահամ Սիմոնյանին, որը նույնպես ներկա էր միջոցառմանը:

Դպրոցի տնօրենը իր խոսքում նշեց նաև, որ մեր աշակերտների համար ոգևորող է , որ երկրի սահմանները պաշտպանողների մեջ են իրենցից ընդամենը մի քանի տարով մեծ տղաները` մեր դպրոցի երեկվա սաները: Նրանց են ուղարկվել նամակներ, շնորհավորանքի ուղերձներ, իսկ "Նամակ զինվորին" շարադրությունների քաղաքային մրցույթում հաղթող է ճանաչվել 12-րդ Բ դասարանի աշակերտուհի Մարիա Նազարետյանը. նա դպրոցի կողմից պարգևատրվեց պատվոգրով և համեստ հուշանվերով:
Ավարտվեց միջոցառումը` իր հետքը թողնելով հանդիսատեսի վառ հուշերում:

«ԻՆՉ ՄԱՐԴՆ ՈՒ ՆՐԱ ԳՈՐԾԵՐՆ Են, ԱՅՆ ԷԼ ՆՐԱ ՊԱՏՄՈՒԹՅՈՒՆՆ Է» Մ. Խորենացի