Բաց դաս՝ Արզականի աշակերտների համար

Փետրվարի 20, 2017

Դպրոցական անցուդարձ Պաշտոնական

ՀՀ կրթության և գիտության նախարար Լևոն Մկրտչյանն փետրվարի 17-ին այցելել է ՀՀ Կոտայքի մարզի Արզական գյուղի միջնակարգ դպրոց, որտեղ վարել է բաց դաս՝ Գիրք նվիրելու և Մայրենի լեզվի միջազգային օրվան ընդառաջ: Նախարարը նշել է, որ հանդիպման համար առիթ է հանդիսացել նաև գիրք նվիրելու օրը, որը, ըստ Լևոն Մկրտչյանի, գեղեցիկ ավանդույթ է դառնում: «Գիրքը շատ կարևոր է, և այն իրար նվիրելով` մարդիկ փոխանցում են քաղաքակրթությունների կողմից դարերի ընթացքում ստեղծած կարևոր և արժանի արդյունք»,-նշել է նախարարը և դիմելով ավագ դպրոցի աշակերտներին` հավելել. «Առաջին ինը տարիների ընթացքում դուք ձեռք եք բերել գիտելիք. այս պահից սկսած` ինքներդ պետք է ձևավորեք ձեր ապագան: Դուք պետք է հստակ գիտակցեք` ինչու է կարևոր ավագ դպրոցի երեք տարին ձեզ համար: Մարդկությունն իր ողջ պատմության ընթացքում ստեղծել է երեք կարևոր արժեք՝ անհատ` իր իրավունքներով, ընտանիք և ազգ: Դարերի ընթացքում այս ձևաչափը խախտելու շատ փորձեր են եղել, բայց դրանք կյանքի քննությունը չեն բռնել, որովհետև բնության հիմնական օրենքը տեսակի պահպանության և շարունակության ապահովման խնդիրն է: Իսկ տեսակը պահպանելու համար պետք է ունենալ գիտելիք և այն փոխանցել: Որպես փոքր ժողովուրդ՝ պետք է հասկանանք, որ մեր տեսակը պետք է պահպանվի, և դուք այդ տեսակի շարունակողը պետք է լինեք»,- նշել է նախարարը` աշակերտներին խորհուրդ տալով առանձնացնել նպատակն ու միջոցը, քանի որ, ըստ Լևոն Մկրտչյանի, նպատակը պետք է լինի մեծ ու հստակ, իսկ միջոցն ուղղակի նպաստի այն իրագործելուն: «Այս ինֆորմացիոն դարաշրջանում պետք է հստակ գիտակցել` գիտելիքն ու տեղեկատվությունն ինչի համար օգտագործել, առաջնայինը և երկրորդականը տարբերակել: Ուսուցիչն էլ պետք  է հստակ գիտակցի իր առաքելությունը. կրթությունն այն գործիքն է, որով ապահովվում է տվյալ տեսակի շարունակությունը: Ինչ չափով բոլորս կգիտակցենք այս առաքելությունը, այնքան էլ արդյունքը կենսունակ կլինի»,-նշել է նախարարը` աշակերտներին խորհուրդ տալով երբեք չվախենալ փոփոխություններից և չհուսահատվել դժվարություններից: 
Բաց դասի ընթացքում աշակերտները մի շարք հարցեր են ուղղել նախարարին, մասնավորապես, նրանց հետաքրքրել է 12-ամյա կրթության, թեմատիկ առաջադրանքների, արտերկրում սովորելու հնարավորության, ապագա մասնագիտության ընտրության հարցերը: 

Բաց դասից հետո նախարարը պատասխանել է նաև լրագրողների հարցերին: Այն հարցին, թե ինչու է ընտրվել հենց այս դպրոցը, Լևոն Մկրտչյանը նշել է, որ խնդիր է դրված եղել ընտրել գյուղական դպրոց. «Մենք հաճախ գնում ենք հայտնի դպրոցներ, սակայն կրթական համակարգի ամուր հենքը հենց գյուղական դպրոցներն են, որտեղ պահպանվել են լավագույն ավանդույթները: Սակայն պետք է ցավով արձանագրել, որ այսօր գյուղական դպրոցների զգալի մասում աշակերտների պակաս կա: Անհրաժեշտ է մշտական ուշադրություն դարձնել այս տիպի դպրոցներին»,-ընդգծել է նախարարը: Լրագրողների մեկ այլ հարցի` ի՞նչ գիրք խորհուրդ կտա ընթերցել նախարարը, Լևոն Մկրտչյանը պատասխանել է, որ իր համար, առհասարակ, շատ կարևոր է գիրք հասկացությունը: «Ես շատ եմ ուրախանում, երբ Երևանում բացվում են սրճարան-գրախանութներ, և այնտեղ շատ երիտասարդներ եմ տեսնում, քանի որ այդ մշակույթը սկսում է վերադառնալ: Առհասարակ, եթե նկատել եք, գրքի նկատմամբ աշխարհում հետաքրքրությունը սկսում է մեծանալ: Ինչ վերաբերում է կոնկրետ ինչ գիրք խորհուրդ կտայի, ասեմ` Մարկեսի «Հարյուր տարվա մենությունը» և Վիլյամ Սարոյանի ցանկացած ստեղծագործություն»,-նշել է նախարարը: 

Լևոն Մկրտչյանը նաև շրջել է դպրոցում, զրուցել ուսուցիչների և աշակերտների հետ, ծանոթացել դպրոցի նյութատեխնիկական բազային և պայմաններին: Նախարարը դպրոցին նվիրել է համակարգչային լսարան և գրքերի խմբաքանակ:

Նյութի աղբյուրը. ՀՀ կրթության և գիտության նախարարություն