Մեր բանակը 25 տարեկան է

Փետրվարի 1, 2017

Դպրոցական անցուդարձ

Եթե ուզում ենք ուժեղ, հզոր և ինքնիշխան պետություն լինել, պետք է ունենանք ուժեղ, հզոր և ինքնուրույն բանակ, ազգային գաղափարներով տոգորված, ազգային արժեքներն արժանապատվորեն կրող ազգային բանակ:

            Եթե ուզում ենք ուժեղ, հզոր  և ինքնիշխան պետություն լինել, պետք է կարողանանք ոչ միայն ստեղծել ու կերտել այդ բանակը, այլև սրբորեն պահել ու պահպանել նրա հզորությունն ու ինքնուրույնությունը, նրա զինվորին ու հրամանատարին:

1992 թվականի հունվարի 28-ին ՀՀ կառավարության ընդունած «ՀՀ պաշտպանության նախարարության մասին» պատմական որոշմամբ մի շարք կազմավորված գնդերի, վաշտերի, երկրապահ կամավորական ջոկատների միավորմամբ դրվեց ազգային բանակի ստեղծման սկիզբը, իսկ 1992թ. մայիսին ՀՀ պաշտպանության նախարարությունը «Զինապարտության մասին» օրենքով սահմանեց բանակը զինծառայողներով համալրելու կարգը:

Մեր անկախ պետության կերտումը և բանակաշինությունը ընթացան նույն զուգահեռներով, իրար կողքի , իրար պահպանելով և պաշտպանելով:

Բանակն է այն գլխավոր և միակ երաշխավորը, որ չի կարող թողնել, որ խարխլեն կամ սասանեն մեր պետության հիմքերը: Այն ամրակուռ է մարտունակ  ու հզոր, ժամանակակից զինտեխնիկայով ու զենքով հագեցած բանակով, և , ամենակարևորը, իր հայրենիքը, իր հողն ու ջուրը անսահմանորեն  սիրող, թշնամուց չերկնչող, սխրանքներ ծնող և ազգային արժանապատվությամբ օժտված զինվորներով:

Ստեղծվեց հայոց բանակը, օրեցօր աճեց, մեծացավ ու հզորացավ և անցավ ծանր ու դժվարին, բայց պատվաբեր ճանապարհ: Հաղթեց թշնամուն, ազատեց մեր պատմական Արցախը՝ շարունակելով պահել ու պաշտպանել Հայոց աշխարհի անդորրը:

Քառօրյա պատերազմի արհավիրքների ու սարսափների միջով անցավ, անցավ հաղթական կեցվածքով՝ միշտ իր բազկի հուժկու ուժին հավատարիմ: Տվեց սրբազան զոհեր, բայց չընկճվեց, չերերաց, մնաց իր հողի վրա ամուր կանգնած, իր հողն ու հային ամուր գրկած:

Այսօր 25 տարեկան է հայոց ազգային բանակը, այդքան երիտասարդ, բայց բազմափորձ ու հերոսական, ազատատար ու պաշտպան, հուսալի երաշխավոր: Նա ի զորու է անառիկ պահել հայրենիքի սահմանները և ցանկացած պահի զինվորական «բացառիկ» դասեր տալ սահմանախախտ հայատյաց թշնամուն՝ ազերի- թուրքին:

Փառք ու պատիվ հայոց բանակին, փառք ու պատիվ հայ զինվորին:

Մենք խոնարհվում ենք նրանց առաջ:

2017թ. հունվարի 30-ին Հրազդանի Վ. Սարոյանի անվան №11 հիմնական դպրոցում կազմակերպվել էր միջոցառում՝ նվիրված հայոց ազգային բանակի ստեղծման 25-րդ տարեդարձին:

Միջոցառումը կազմակերպել և կյանքի են կոչել դպրոցի դաստիարակչական աշխատանքների կազմակերպիչ Լիլիթ Պետրոսյանը, ՄԿԱ գծով տնօրենի տեղակալ Ա. Գրիգորյանը, զինղեկ Վ. Գալստյանը:

Մ. Զաքարյան