Շնորհավոր տոնդ, Հայոց Բանակ

Հունվարի 30, 2017

Դպրոցական անցուդարձ

Մենք՝ հայերս,երկար ենք երազել պետություն ու այն պաշտպանող բանակ ունենալու մասին: Այսօր դա իրականություն է: Ավելին, հունվարի 28 -ին հայոց բանակի կազմավորման 25 -րդ տարեդարձն է: Այս առիթով 28.01.2017 թ - ին Վանաձորի Ղ. Ալիշանի անվան N 27 հիմնական դպրոցում տեղի ունեցավ համադպրոցական միջոցառում, որը կազմակերպել էին ՄԿԱ փոխտնօրեն՝ Ս. Մալումյանը, ԴԱԿ՝ Հ,Սարգսյանը, ՆԶՊ ուսուցիչ՝ Գ. Պապյանը, դասղեկներ՝ Ց. Մատինյանը, Ա. Զուրաբյանը: Միջոցառումը կայացավ IXա և IX բ դասարանի աշակերտների ակտիվ մասնակցությամբ, որն սկսվեց դպրոցի տնօրենի բացման խոսքով: Տնօրեն՝ Գ. Քարհանյանը շնորհավորեց դպրոցի ուսուցիչներին, աշակերտներին հայոց բանակի 25 -ամյակի առիթով՝ նշելով, որ սա բոլորիս տոնն է: Այն լավ առիթ է վերստին գիտակցելու, որ եթե յուրաքանչյուրս մեր հոգու ուժով զորակցենք հայոց բանակին, այն ավելի կամրանա, դրանով իսկ կամրապնդվի ժողովրդի հույսն ու վստահությունը: Տնօրենը հորդորեց հայորդիներն ոչ միայն գեղեցիկ խոսքերով սիրեն հայրենիքը, այլ աշխատեն գործով ապացուցել, այսինքն չխուսափեն բանակից, երկիր պաշտպանելու պարտքը կրեն իրենց վրա և լինեն խաղաղասեր ու բարի հայ: Տնօրենի ելույթից հետո հայրենասիրական ոգով տոգորված աշակերտները հանդես եկան պարով, ռազմահայրենասիրական երգերով ու արտասանությամբ: Կազմակերպվեց հրաձգության, զենքի քանդման ու հավաքման թիմային և անհատական մրցույթներ: Թիմային մրցույթն ավարտվեց IXբ դասարանի աշակերտների հաղթանակով, իսկ անհատական մրցաշարում հաղթող ճանաչվեց IX ա դասարանի աշակերտ Գոռ Դավթյանը: Հաղթողները տնօրենության կողմից պարգևատրվեցին պատվոգրերով: Միջոցառման վերջում Դավիթ Ամալյանի «Կյանքս կտամ հայրենիքիս, հոգիս՝ Աստծուն, պատիվս՝ ինձ» երգի հնչյունների ներքո հայրենասեր ապագա զինվորները հիշեցին ապրիլյան քառօրյա պատերազմում նահատակված հայոց քաջերին, խոստացան վառ պահել նրանց հիշատակը և շարունակել հայրենիքի պաշտպանության սուրբ գործը: