Իտալական մշակույթի շունչը Հայաստանում. բացվել է «Մեկ օր Պոմպեյում» խորագրով ցուցահանդեսը

Նոյեմբերի 19, 2021

Մշակութային լուրեր

Հայաստանի ազգային պատկերասրահում տեղի է ունեցել «Մեկ օր Պոմպեյում» ծավալուն ցուցադրության բացման հանդիսավոր արարողությունը:

Միջոցառմանը ներկա են եղել ՀՀ ԱԺ նախագահ Ալեն Սիմոնյանը, ԿԳՄՍ նախարար Վահրամ Դումանյանը, նախարարի տեղակալ Արա Խզմալյանը, Հայաստանի Հանրապետությունում Իտալիայի Հանրապետության արտակարգ և լիազոր դեսպան Ալֆոնսո դի Ռիզոն, դեսպանության բարձրաստիճան ներկայացուցիչներ:

Հայաստանում Իտալիայի մշակույթի շաբաթվա շրջանակում անցկացվող ցուցահանդեսը կազմակերպվել է ՀՀ-ում Իտալիայի դեսպանության, Պոմպեյի հնագիտական արգելոցի ու Հայաստանի ազգային պատկերասրահ համագործակցությամբ և «Glocal Project Consulting» ընկերության աջակցությամբ: «Մեկ օր Պոմպեյում» խորագրով ցուցահանդեսը, ի թիվս այլ նախագծերի, Հայաստանի հանրությանը իտալական պատմության, բարձրարժեք արվեստի ու մշակույթի հարուստ ժառանգությանը հաղորդակից լինելու բացառիկ հնարավորություն է տալիս:

Ցուցահանդեսն ընդգրկում է մ.թ. 79 թվականին Վեզուվի ժայթքման հետևանքով կործանված հռոմեական քաղաքի առօրյան, նիստուկացը, բարքերն ու սովորույթներն արտացոլող կենցաղային իրեր, մարմարե ու բրոնզե արձանիկներ, ոսկե, արծաթե նրբագեղ զարդեր, որմնանկարների բեկորներ և եզակի այլ նմուշներ՝ պատկերացում տալով երբեմնի ծաղկուն քաղաքի կյանքի մասին:

Հայաստանի ազգային պատկերասրահի տնօրեն Մարինա Հակոբյանը ողջունել է հյուրերին, համագործակցության համար շնորհակալություն հայտնել գործընկերներին՝ ի դեմս դեսպան Ալֆոնսո դի Ռիզոյի, և տեղեկացրել, որ հին հռոմեական քաղաքի բարքերն ու նիստուկացը ներկայացվելու է ավելի քան 100 ցուցանմուշով:

«Սա ցուցադրություն է ոչ թե Պոմպեյ քաղաքի վախճանի ու կործանման, այլ կյանքի վերակերտման մասին»,- ընդգծել է Մարինա Հակոբյանը:

ԿԳՄՍ նախարար Վահրամ Դումանյանը ևս հանդես է եկել ողջույնի խոսքով՝ կարևորելով երկու երկրների՝ Հայաստանի և Իտալիայի՝ դարերի պատմություն ունեցող մշակութային համագործակցությունը:

«Վստահ եմ, որ Հայաստանում Իտալիայի մշակույթի շաբաթը և «Մեկ օր Պոմպեյում» ցուցահանդեսը նոր սկիզբ կհանդիսանան հայ-իտալական մշակութային կապերի ընդլայնման և զարգացման համար՝ օգնելով մեզ բացահայտել մեր երկու բարեկամական ազգերի միջև նմանությունները:

Թո՛ւյլ տվեք անձամբ իմ և Հայաստանի Հանրապետության կրթության, գիտության, մշակույթի և սպորտի նախարարության անունից շնորհակալություն հայտնել ՀՀ-ում Իտալիայի Հանրապետության դեսպանությանը՝ ի դեմս արտակարգ և լիազոր դեսպան պարոն Ալֆոնսո դի Ռիզոյի, և հույս հայտնել, որ մեր հետագա համագործակցությունը կշարունակի իր կայուն զարգացումը և տարեցտարի էլ ավելի կամրապնդվի ու կզարգանա»,- ասել է նախարարը:

Ըստ Հայաստանի Հանրապետությունում Իտալիայի Հանրապետության արտակարգ և լիազոր դեսպան Ալֆոնսո դի Ռիզոյի՝ իտալական մշակույթի շաբաթը Հայաստանում նշանավորելու ավելի լավ տարբերակ դժվար էր գտնել, բայց սա միայն սկիզբն է:

«Պոմպեյը դարձավ ողբերգության հոմանիշ, բայց նաև պատուհան բացեց դեպի հին աշխարհ: Հրաբխային ապարների վերմակը ծածկեց այն ամենը, ինչն այսօր պահպանվել է, և այս ցուցադրությունը եզակի հնարավորություն է՝ ծանոթանալու ոչինչ չկասկածող հռոմեացիների կյանքին հենց ողբերգության նախօրեին»,-եզրափակել է դեսպանը և շնորհակալություն հայտնել կողմերին ցուցադրությունը կյանքի կոչելու համար:

Պաշտոնական բացումից հետո պաշտոնատար անձինք և այցելուները շրջել են ցուցասրահներում և ծանոթացել գտածոներին:

Նյութի աղբյուրը. ՀՀ կրթության, գիտության, մշակույթի և սպորտի նախարարություն