Աշակերտական խորհրդի մասնակցությունը դպրոցի կազմակերպչական և կրթական գործին

Սեպտեմբերի 14, 2016

Դպրոցական անցուդարձ

Սեպտեմբերի 9-ին Կապանի հ.5 հիմնական դպրոցի 6-9-րդ դասարանների աշակերտները աշխատանքային ջերմ մթնոլորտում անցկացրեցին համադպրոցական 15-րդ հաշվետու կոնֆերանսը:

Դպրոցի տնօրեն Ս. Հարությունյանը շնորհավորեց բոլոր ներկաներին` հոբելյանական ժողովի կապակցությամբ, հղեց ամենամյա ուղերձ և աշակերտական բարձրագույն մարմնում ներկայացրեց դպրոցի ներքին գնահատման հաշվետվությունը:

ԱԽ նախագահ Հրաչ Արզումանյանին և փոխնախագահ Դավիթ Սարգսյանին չխանգարեց արդեն Կապանի թիվ 2 ավագ դպրոցի սան լինելու հանգամանքը և անցած ուստարվա վառ հիշողությամբ ու թանկ հուշերով համեմեցին հաշվետու զեկույցը, վստահաբար փաստեցին, որ ԱԽ-ի գործունեությունը նպաստում է աշակերտի` որպես քաղաքացու կայացմանը:

Ախ քարտուղար Միլենա Ղազարյանը բարձր գնահատեց հասարակական աշխատանքի դերը ուսումնառության ընթացքում:
- Առանց հմտությունների գիտելիքն անպաճույճ է և ինքնաննպատակ,- այսպես ավարտեց նա իր հաղորդումը:

Լսելով բոլոր դասարանական նախագահների և 9-րդ ա, 9-րդ բ դասարանների դասղեկներ Ա. Հայրապետյանի և Ս. Մարգարյանի ելույթները, կոնֆերանսը որոշեց`
1. Ուստարվա ընթացքում ի գիտություն ընդունել դպրոցի տնօրենի ուղերձը:
2. ԱԽ-ի մեկ տարվա կատարած աշխատանքները գնահատել լավ:
3. ԱԽ-ի օրինակելի կանոնադրությունն ընդունել որպես գործունեության ուղենիշ և մնալ դրույթներին հավատարիմ:
4. Արձագանքել դպրոցական առօրյայում և համայնքի կյանքում ծագած սովորողներին վերաբերող խնդիրներին:

Կապանի հ.5 հիմնական դպրոցի ԱԽ