«Փոխել մարդուն, ոչ թե կլիման». ՀՀ ԿԳՄՍ նախարարի տեղակալ Ա. Մարտիրոսյանը ներկա է եղել միջազգային դասընթացների ամփոփմանը

Սեպտեմբերի 17, 2021

Լուրեր կազմակերպություններից

Հայաստանի պետական տնտեսագիտական համալսարանի և գերմանական «Կոպեռնիկուս Բեռլին» ասոցիացիայի համագործակցությամբ անցկացված միջազգային դասընթացների շրջանակում սեպտեմբերի 16-ին Հայաստանի Հանրապետության կրթական քաղաքականությանը նվիրված պանելային քննարկմանը ներկա է եղել նաև ՀՀ կրթության, գիտության, մշակույթի և սպորտի նախարարի տեղակալ Արթուր Մարտիրոսյանը:

Նախարարի տեղակալի ներկայությամբ ամփոփվել է սեպտեմբերի 10-ից անցկացված «Աշխատելու հնարավորությունները» խորագրով սեմինար/դասընթացը, որի մասնակիցներն արժանացել են հավաստագրերի: Այնուհետև մեկնարկել է նոր սեմինար/դասընթացը՝ «Փոխել մարդուն, ոչ թե կլիման» խորագրով:

Ողջունելով Դանիայից, Գերմանիայից, Իսպանիայից, Իտալիայից, Բելգիայից, Ուկրաինայից, Ռուսաստանի Դաշնությունից, Լեհաստանից և այլ երկրներից Հայաստան ժամանած մասնակիցներին՝ նախարարի տեղակալ Ա. Մարտիրոսյանը ողջունել է նմանօրինակ միջոցառումների կազմակերպումը Հայաստանում՝ բարձր կարևորելով «Կոպեռնիկուս Բեռլին»-ի և ՀՊՏՀ-ի համագործակցության արդյունավետ ձևաչափը:

«Մենք ուրախ ենք տեսնել, որ Հայաստանը գնալով ավելի տեսանելի է դառնում եվրոպական տարածքում ուսանողների և երիտասարդների միջև արդյունավետ հաղորդակցման, գաղափարների ու մտքերի փոխանակման և արդյունքում հանրությանը հետաքրքրող հարցերի շուրջ լուծումներ առաջարկելու միջազգային միջոցառումների հարթակ տրամադրող երկրների շարքում: Ուրախալի է նշել, որ այս սեմինարների օրակարգը ներառում է մի շարք հետաքրքիր ուղղություններ՝ սերունդների վրա կլիմայի փոփոխության ազդեցությունից մինչև կրթություն և զբաղվածություն»,- ասել է Ա. Մարտիրոսյանը՝ մասնակիցներին հորդորելով ամրապնդել գիտելիքները, քննարկումներ ծավալել և նախաձեռնողական լինել հանրային կյանքի բոլոր ոլորտներում: Եզրափակելով իր խոսքը՝ նախարարի տեղակալը հանդիպումը գնահատել է բովանդակային ու կառուցողական և նշել, որ նախարարությունը կաջակցի «Կոպեռնիկուս Բեռլին» ասոցիացիայի կողմից իրականացվող ուսանողների փոխանակման և կարողությունների զարգացման աշխատանքներին:

ՀՊՏՀ ռեկտոր Դիանա Գալոյանը նույնպես արժևորել է «Կոպեռնիկուս Բեռլին» ասոցիացիայի հետ արդեն երկրորդ նման նախաձեռնությունը և միջազգային սեմինար/դասընթացների դերը երիտասարդության շրջանում արդիական ու նորաստեղծական գիտելիքի ու փորձի փոխանակման գործընթացում՝ վստահություն հայտնելով, որ մասնակիցները հնարավորություն ունեն քաղելու առավելագույնը:

Մասնակիցներին ողջունել և Տնտեսագիտական համալսարանի հետ համագործակցությունը բարձր է գնահատել նաև «Կոպեռնիկուս Բեռլին» ասոցիացիայի գործադիր տնօրեն Դավիթ Բուդաղյանը՝ շեշտադրելով մասնակիցների մեծ խանդավառությունը, գիտելիքի, հմտության ձեռքբերման հայաստանյան այս հիանալի հնարավորությունը, որը հարթում է մշակութային, աշխարհայացքային ու լեզվական բոլոր անջրպետները:

Պանելային քննարկման ընթացքում ՀՀ ԿԳՄՍ նախարարի տեղակալ Արթուր Մարտիրոսյանը, ՀՊՏՀ ռեկտոր Դիանա Գալոյանը մասնակիցների հետ արծարծել են կրթական քաղաքականությանն ու առաջընթացին, առանձին երկրների հետ փոխանակման ծրագրերին առնչվող հարցեր: Հանդիպման ավարտին սեմինար/դասընթացների մասնակիցները մասնակցել են ՀՊՏՀ ուսանողական խորհրդի կազմակերպած Welcome party-2021-ին։

Նյութի աղբյուրը. ՀՀ կրթության, գիտության, մշակույթի և սպորտի նախարարություն