Հերթական բաց դասը վարում է փորձաշատ մանկավարժը

Դեկտեմբերի 23, 2016

Դպրոցական անցուդարձ

Չնայած 2016-17 ուսումնական տարվա առաջին կիսամյակը մոտենում է իր ավարտին, բայց դրանով չի թուլանում ուսումնական գործընթացը Հրազդանի Վիլյամ Սարոյանի անվան հ.11 հիմնական դպրոցում:

Բազմաբնույթ միջոցառում-հաշվետվությունները շարունակվում են. ուսումնական կիսամյակի աշխատանքներն ամբողջանում են իրենց արդյունքներով:

Առաջավոր փորձի հերթական բաց դաս էր  III Ա  դասարանում: Դասը վարում էր փորձաշատ մանկավարժ, իր մասնագիտության մեծ գիտակ, սիրված դասվար Յուլյա Մկրտչյանը: Դասն ամփոփիչ էր:

Դասի թեման՝ «Ժողովուրդն իմաստուն է»:

Դասի նպատակն էր  խորացնել աշակերտների գիտելիքները ժողովրդական բանահյուսության, առակի ժանրի մասին, զարգացնել նրանց հիշողությունը, ուշադրությունը  և տրամաբանական մտածողությունը:

Դասի փուլերը միահյուսված էին, մեկը լրացնում էր մյուսին:

Մտագրոհի փուլում աշակերտները ներկայացրին առակի ժանրը, նրա նշանակությունը, խթանման փուլում լուծեցին տրված խաչբառը, իմաստի ընկալման փուլում ներկայացրին, թե ինչպես պատմությունը առակ դարձավ, որն է առակի իմաստը, նպատակը:

Կշռադատման փուլում աշակերտները իմացան, որ առակները ժողովրդական բանահյուսության նմուշներից են:

Կատարվեց խմբային աշխատանք: Չորս խմբի բաժանված աշակերտները ներկայացրին մեծանուն առակագիրներ Մխիթար Գոշին, Վարդան Այգեկցուն, Աթաբեկ Խնկոյանին և Եզոպոսին, նրանց անմահ ստեղծագործություններից յուրաքանչյուրը մեկ առակ պատմեց, տրվեց առակի մեկնությունը, յուրաքանչյուր խումբ բեմականացրեց մի առակ:

Կատարվեց անդրադարձ:Աշակերտները իմացան, որ առակները գեղարվեստական փոքրիկ ստեղծագործություններ են կենդանիների, բույսերի, թռչունների, ինչպես նաև  մարդկանց մասին և ունեն այլաբանական իմաստ:

Դասը շատ հետաքրքիր էր, կազմակերպված  և ուսանելի:   

 

Կ. Ստեփանյան