«Նավակ» ճամբարը Կապանի հ․5 հիմնական դպրոցում

Օգոստոսի 10, 2021

Դպրոցական անցուդարձ

Երեխաների ամառային կրթությունը միշտ էլ եղել է Վորլդ Վիժն կազմակերպության ուշադրության կենտրոնում և ի շահ երեխաների, ի նպաստ նրանց առողջ զարգացման, ամենայն կամեցողությամբ իրականացվում է «Նավակ» հանգիստը։

Օգոստոսի 2-ից 7-ը ՎՎ Կապանի գրասենյակի նախաձեռնությամբ և օժանդակությամբ սոցիալական տարբեր խմբերի 56 երեխաներ իրենց ամառային հանգիստն անցկացրին Կապանի N5 հիմնական դպրոցում գործող «Նավակ» ճամբարում։

Դպրոցի տարածքն ու պայմաններն իհարկե, հարմար են նման գործունեություն իրականացնելու համար, սակայն հարկ է նշել, որ մինչև մեկնարկը, կազմակերպիչ օղակի ներկայացուցիչները մի քանի անգամ այցելել են հյուրընկալող դպրոց, ըստ անհրաժեշտության ապահովել ժամանցային գույքով (ձայնարկիչ, բարձրախոս, սպորտային և գրասենյակային պարագաներ), կատարել կահավորման աշխատանքներ։

Ավարտվեց առաջին հերթափոխը և հարկ է ուրախությամբ արձանագրել, որ ամառային անմոռանալի օրերի համար՝ ներգրավված երեխաներն ու նրանց ծնողները հայտնեցին իրենց գոհունակությունը թե սննդի, թե կեցության, թե մանկավարժական կազմի վերաբերյալ։

Ճամբարականների կրթադաստիարակությունն իրականացնում են Նաիրա Ծատրյանը (Քրիստոնեական դաստիարակության կենտրոն), Շուշանիկ Մանուչարյանը (Մանկական կենտրոն), Անի Բաղդասարյանը (Կապանի N1 հիմնական դպրոց) և Արևիկ Հայրապետյանը (Կապանի N5 հիմնական դպրոց), որոնք տարիներ շարունակ աջակցում են ՎՎ գրասենյակի ծրագրերին։

Օգոստոսի 9-ին սկսվեց երկրորդ հերթափոխը։

Կապանի N 5 հիմնական դպրոց