Դիլիջանի Էդվարդ Միրզոյանի անվան կոմպոզիտորների միության ստեղծագործական տանը կայացել է կոմպոզիտոր, մանկավարժ, ՀՀ և ԽՍՀՄ ժողովրդական արտիստ, մշակութային, հասարակական գործիչ Էդվարդ Միրզոյանի 100-ամյակին նվիրված հոբելյանական համերգը։

Համերգը ՀՀ կրթության, գիտության, մշակույթի և սպորտի նախարարության նախաձեռնությամբ և աջակցությամբ կազմակերպել է Կամերային երաժշտության ազգային կենտրոնը։

Հոբելյանական հանդիսությանը ներկա են եղել ՀՀ ԿԳՄՍ նախարարի տեղակալ Արա Խզմալյանը, Հայաստանի կոմպոզիտորների միության նախագահ Արամ Սաթյանը, բազմաթիվ հյուրեր, մեծանուն կոմպոզիտորի արվեստի երկրպագուներ։

Ողջույնի խոսքում Արա Խզմալյանը շնորհակալություն է հայտնել Կամերային երաժշտության ազգային կենտրոնի աշխատակազմին, մասնավորապես՝ ղեկավար Նորայր Նազարյանին՝ հայ կոմպոզիտորական դպրոցի ամենավառ անհատականություններից մեկի՝ Էդվարդ Միրզոյանի 100-ամյա հոբելյանի համերգին նոր բովանդակություն և իմաստ հաղորդելու համար․ «Ես հույս ունեմ, որ մեծանուն կոմպոզիտորի անունը կրող ստեղծագործական տանը կազմակերպված հոբելյանական համերգով այս կառույցում բուռն ստեղծագործական վերելքի սկիզբը կդրվի»։

Խոսելով կոմպոզիտորի կյանքի և ստեղծագործական ուղու մասին՝ Ա․ Խզմալյանը նկատել է, որ Էդվարդ Միրզոյանը տաղանդավոր էր կյանքի բոլոր ասպարեզներում․ «Զարմանալի է, թե ինչպես կարող էր մարդկային մի կյանքում տեղավորվել այսքան գործ և մեզ թողնել այսքան հարուստ ժառանգություն։ Բոլորս գիտենք, որ ի դեմս Էդվարդ Միրզոյանի՝ գործ ունենք մեծանուն և մեծատաղանդ կոմպոզիտորի հետ․ սա փաստ է։ Հետհայացք նետելով նրա անցած ուղուն՝ կարող ենք ասել, որ ի դեմս Էդվարդ Միրզոյանի՝ մենք գործ ունենք նաև օրինակելի քաղաքացու և զարմանալի հասարակական գործչի հետ։ Նա կարողացել է ստեղծել հարաբերությունների մի այնպիսի որակ, որոնք ապահովել են մշակութային կարևոր ենթակառուցվածքներ։ Այսինքն՝ մենք միաժամանակ գործ ունենք դիվանագիտական հմտություններ և բացառիկ քաղաքական բնազդ ունեցող անհատականության հետ։

Ինքն իր մասին հաճախ ասում էր՝ ես 90 տարեկան տղա եմ։ Եվ հենց այդպես էլ ապրում էր՝ տղայի սիրահարվածությամբ։ Ամենամեծ բանը, որ երիտասարդներս պետք է յուրացնենք նրա անցած ճանապարհից, չհուսահատվելն է։ Պետք է պատասխանատվության զգացում ունենանք նրա թողած մեծ արվեստի հանդեպ։ Սովորենք այն արվեստը, որին այդքան փայլուն տիրապետում էր Էդվարդ Միրզոյանը, իսկ դա ապրելու արվեստն է»։

Դիլիջանի Է․ Միրզոյանի անվան ստեղծագործական տան Բեթհովենի անվան դահլիճի բեմում Հայաստանի պետական կամերային նվագախումբը՝ գեղարվեստական ղեկավար և գլխավոր դիրիժոր Վահան Մարտիրոսյանի ղեկավարությամբ, ներկայացրել է Էդվարդ Միրզոյանի Լարային քառյակ, Սիմֆոնիա լարային նվագախմբի և գոսերի համար, Պոեմ-էպիտաֆիա կամերային նվագախմբի համար ստեղծագործությունները։ Ցուցադրվել է մեծանուն կոմպոզիտորի կյանքի և ստեղծագործական ճանապարհի մասին պատմող փաստավավերագրական ֆիլմ։

Հոբելյանական համերգը Դիլիջանի Էդվարդ Միրզոյանի անվան կոմպոզիտորների միության ստեղծագործական տանն անցկացնելը խորհրդանշական իմաստ ուներ։ Հոբելյանական համերգը ոչ միայն հարգանքի տուրք էր մեծանուն կոմպոզիտորի հիշատակին, այլև նրա անունը կրող ստեղծագործական տան հանրահռչակմանը, ներդրում կատարողների ուշադրությունը գրավելու և կառույցի նորովի վերածննդին նպաստելու նպատակ ուներ։

1963 թվականին հիմնադրված ստեղծագործական տունը 2013 թվականից կրում է ԽՍՀՄ ժողովրդական արտիստ, կոմպոզիտոր Էդվարդ Միրզոյանի անունը։ Ականատեսների պատմելով՝ Էդվարդ Միրզոյանը կարևոր ներդրում է ունեցել կառույցի շինարարական աշխատանքներում․ նա ուշադրությամբ հետևել է շինարարությանը։

Ժամանակին Դիլիջանի կոմպոզիտորների ստեղծագործական տանը հանդես են եկել մի շարք անվանի արտիստներ, որոնք իրենց նպաստն են բերել կառույցի կայացմանը և հեղինակության բարձրացմանը։

Նշենք, որ մինչև համերգը ԿԵԱԿ-ը ստեղծագործական տան հարակից հատվածներում իրականացրել է մաքրման աշխատանքներ։

Համերգի բարձրակարգ հնչողության ապահովման նպատակով Դիլիջան են տեղափոխվել համերգային աննախադեպ տեխնիկա և լուսային սարքավորումներ։