Մասնագիտական կողմնորոշման համար տարվող աշխատանքները Հրազդանի Վ. Սարոյանի անվան հ.11 հիմնական դպրոցում

Դեկտեմբերի 12, 2016

Դպրոցական անցուդարձ

Այսօր աշխարհում փոփոխությունները շատ արագ են տեղի ունենում: Գիտության ու տեխնիկայի ընձեռնած նորանոր հնարավորությունները մտնում են հասարակական հարաբերությունների տարբեր ոլորտներ առանց բացառությամբ, այդ թվում նաև՝ կրթական ոլորտ:

Մանկավարժական գիտության, կրթական նոր տեխնոլոգիաների զարգացումն էլ ավելի է խթանում դասավանդման նոր մեթոդների, ուսուցման նոր ձևերի մշակմանը:
Խնդիր է առաջանում սովորողի՝ մասնագիտություն ընտրելու հարցում: Այս նպատակով, կարծում եմ, պետք է կազմակերպել բազմաբնույթ միջոցառումներ` դասընթացներ, զրույցներ, այցելություններ տարբեր մասնագիտական կենտրոններ…

Սովորողը մասնագիտության ընտրության հարցում հստակ կողմնորոշվելու հետ միասին պետք է իմանա նաև, որ մասնագիտության ընտրությունը միայն կեցության պայմանների բարելավում չէ. մասնագիտությունը նաև բնավորություն է կերտում: Մասնագիտություններին ծանոթանալու, մասնագիտության ընտրության նկատմամբ կողմնորոշումն ավելի խորացնելու նպատակով Հրազդանի Վ. Սարոյանի անվան հ.11 հիմնական դպրոցի 9-րդ դասարանի աշակերտներն իրենց դասղեկների, ուսումնական գծով տնօրենի տեղակալ Հ. Հակոբյանի և ՄԿԱ գծով տնօրենի տեղակալ Ա. Գրիգորյանի ուղեկցությամբ հերթական այցելությունն են կատարել այս անգամ Հրազդանում գործող երիտասարդական մարզա-մշակութային ուսումնական կենտրոն /ԵՄՄՈՒԿ/:

ԵՄՄՈՒԿ-ում իրականացվում են մի շարք դասընթացներ տարբեր մասնագիտությունների գծով: Մասնավորապես՝ խոհարարական գործ և ձևավորում, կար ու ձև, վարսահարդարում և այլն:

Աշակերտները ծանոթացել են խմբերի կատարած և խմբերում կատարվող աշխատանքներին, լսել խմբավարների բացատրությունները մասնագիտությունների առանձնահատկությունների, առավելությունների և արդյունավետության մասին, տեսել բոլոր խմբերում ստեղծված լավագույն աշխատանքները: Նրանցից շատերի մոտ նույնիսկ ցանկություն է առաջել 9-րդ դասարանն ավարտելուց հետո ընտրել այս կամ այն մասնագիտությունը:

Իհարկե, մասնագիտական կենտրոն կամ կենտրոններ մեկ այցելությամբ կամ մեկ դասընթացի կազմապերպմամբ չի որոշվում մասնագիտության ընտրությունը: Այն պետք է լինի շարունակական:

Բազմաբնույթ աշխատանքների, ուսումնասիրությունների, տարբեր մասնագիտական կենտրոններ, արտադրամասեր այցելությունների միջոցով միայն կարելի է ձևավորել մասնագիտության ընտրության գործոնների, բաղադրիչների վերաբերյալ գիտելիքների հաղորդման ու մասնագիտության ընտրության գործում դրանց արդյունավետ կիրառության կարողությունները:
 

Մ. Զաքարյան