«Քան» ակադեմիան՝ ԵՄ դրամաշնորհային ծրագրի հաղթող

Մայիսի 21, 2021

Լուրեր կազմակերպություններից

«Այբ» կրթական հիմնադրամը ԵՄ Արևելյան գործընկերության երկրների համար COVID-19-ի հետևանքների չեզոքացման աջակցության ծրագրի շրջանակում «Մարդը կարիքի մեջ» (“People In Need”) բարեգործական ՀԿ-ի կողմից ստացել է դրամաշնորհ, որի շնորհիվ «Քան» ակադեմիան ապահովելու է հայալեզու բարձրորակ անվճար կրթություն Շիրակի, Լոռու և Կոտայքի մարզերի աշակերտների և ուսուցիչների համար։

Ծրագրի շրջանակում նախատեսվում է իրականացնել հեռավար և առկա  աշխատարաններ միջին և ավագ դպրոցների շուրջ 1500 աշակերտների և բնագիտական առարկաների և մաթեմատիկայի 150 ուսուցիչների համար։ Ուշադրության կենտրոնում են լինելու մասնավորապես գյուղական համայնքների դպրոցների և Արցախից տեղահանված ուսուցիչներն ու աշակերտները։

Ինչպես գիտեք, «Քան» ակադեմիան համաշխարհային կրթական հարթակ է, որի առաքելությունը բարձրորակ կրթություն ապահովելն է բոլորի համար և ամենուրեք։ «Քան» ակադեմիայի հայկական հարթակի հիմնադրումից ի վեր ավելի քան 35 000 տեսադասեր և 40 000 վարժություններ ու հոդվածներ են տեղայնացվել տարբեր առարկաներից՝ մաթեմատիկա, քիմիա, կենսաբանություն, ֆիզիկա, հումանիտար գիտություններ, համակարգչային գիտություն, ծրագրավորում և այլն։ Այս պահին մեզ համար առաջնահերթություն է ընդլայնել գիտատեխնիկական ոլորտին վերաբերող նյութերը հարթակում և ստեղծել հնարավորություն բոլոր ուսուցիչների և աշակերտների համար՝ կիրառելու դրանք իրենց դասավանդման և ուսումնառության ընթացքում։

ԵՄ ֆինանսավորմամբ իրականացվող ծրագիրն ունենալու է հետևյալ փուլերը․

— Շիրակի, Լոռու և Կոտայքի մարզերի գիտատեխնիկական ոլորտի առարկաների 150 ուսուցիչների հետ վերապատրաստման դասընթացների և աշխատարանների կազմակերպում, ինչը կօգնի հեշտությամբ օգտագործելու «Քան» ակադեմիայի հայկական հարթակի գործիքներն ու նյութերը, փոխելու ուսուցման ներկայիս մեթոդները, իրականացնելու հեռավար և հիբրիդային կրթություն, ինչպես նաև փոխգործուն աշակերտակենտրոն ուսուցում` խթանելով  կրթության նկատմամբ աշակերտների շահադրդումը․

— Շիրակի, Լոռու և Կոտայքի մարզերի միջին և ավագ դպրոցների 1500 աշակերտների հետ աշխատարանների կազմակերպում և շարունակական կրթության նպատակով՝ ինքնակրթության մշակույթի խթանում` խրախուսելով առցանց կրթական հարթակների օգտագործումը որպես կրթության լրացուցիչ միջոց․

— ուսուցիչների շարունակական մենտորության և օժանդակության ապահովում, ինչպես նաև «Քան» ակադեմիայի ուսուցիչների համայնքի ակտիվ անդամների մասնակցությամբ վեբինարների միջոցով փորձի փոխանակում և ծրագրում ընդգրկված մարզերի ուսուցիչների ներգրավում «Քան» ակադեմիայի ուսուցիչների համայնքում։

Համոզված ենք, որ «Քան» ակադեմիայի հարթակի ընդլայնումը ծառայելու է բոլորին և ամենուրեք համաշխարհային մակարդակի բարձրորակ անվճար հայալեզու կրթությամբ ապահովելու մեր նպատակին և կրթության նորարարական մեթոդների շնորհիվ նպաստելու մարզերում գիտատեխնիկական ոլորտի կայուն զարգացմանը, որի առաջամարտիկներից են լինելու ծրագրի միջոցով ստեղծված ուսուցչական և աշակերտական ակտիվ համայնքները։

 

Նյութի աղբյուրը. «Այբ» կրթական հիմնադրամ