«Աթաբեկ Խնկոյանը միշտ մեզ հետ է» խորագրով միջոցառում Վանաձորի Դ.Վարուժանի անվան հ.16 հիմնական դպրոցում

Դեկտեմբերի 6, 2016

Դպրոցական անցուդարձ

Դեկտեմբերի երկուսին խնկոյանական շունչն էր թևածոմ Վանաձորի Դ.Վարուժանի անվան №16 հիմնական դպրոցի IIIա դասարանում: Աշակերտները սկզբում ներկայացրին նրա մանկության տարիները, ապա հանդիսատեսին ծանոթացրին «Հասկեր» և «Աղբյուր» ամսագրերի հետ, որտեղ աշխատակցել է Աթաբեկ Խնկոյանը: Միջոցառման մասնակիցները լուսաէկրանին տեսան նաև Աթաբեկ Խնկոյանի կազմած դասագրքերը՝ «Լուսաբեր», «Կարմիր արև» և «Մեր դպրոցը»: Մեծ ոգևորությամբ աշակերտները կատարեցին Խնկոյանի ստեղծագործությունների հիման վրա գրված երգերը՝ «Ծիծեռնակին», «Լորիկը», «Ուղիղ կարգով», «Ձուկն է լողում» և «Բկլիկ ձկնիկը»: Փոքրիկ դերասանները բեմականացրին Խնկոյանի «Սերոբը» պատմվածքը և «Փայտահատն ու մահը» առակը: Միջոցառմանը հմայք և շուք էին հաղորդում թեմային համապատասխան պարերը: Աշակերտները անդրադարձան նաև Խնկոյանի թարգմանություններին և փոխադրություններին: Միջոցառումը եզրափակվեց հայ առակագրության պսակներից մեկի՝ «Մկների ժողովը» առակի տիկնիկային ներկայացմամբ: Իսկ վերջում լուսաէկրանին գրվեց Խնկոյանի մանուկներին ուղղված խոսքը.

Իմ բալիկներ,
Ծով ալիքներ,
Դպրոցն ունի
Նոր-նոր պահանջ.
Պահանջի դեմ-
Ո´չ մի նահանջ:

Հեղինակ՝ Կ.Գասպարյան
Վանաձորի Դ.Վարուժանի անվան հ.16 հիմնական դպրոց