ԵՄ հանուն մշակույթի. առավել ուժեղ համայնքներ և տեղական նախաձեռնություններ

Մարտի 22, 2021

Դպրոցական անցուդարձ

Մարտի 4-ին ՀՀ ԿԳՄՍՆ Գյումրու թիվ 4 արհեստագործական պետական ուսումնարանի ուսանողները Դի-Վի-Վի Ինթերնեյշնալի, Մեդիա նախաձեռնությունների կենտրոնի և Ժողովրդավարական կրթության հայկական կենտրոն- ՍԻՎԻՏԱՍ ՀԿ-ի հետ համատեղ իրականացվող «ԵՄ հանուն մշակույթի. առավել ուժեղ համայնքներ և տեղական նախաձեռնություններ» ծրագրի շրջանակներում առցանց հանդիպում ունեցան ՀՀ տեսչական կրթության մարմնի ղեկավար Ալեքսանդր Շագաֆյանի, ծրագրի համակարգող Տաթև Ասրյանի, առարկայական չափորոշիչների և ծրագրերի մշակման խմբի փորձագետ /արհեստ-արվեստ բնագավառ/ Գայանե Թադևոսյանի, Ժողովրդավարական կրթության հայկական կենտրոն-ՍԻՎԻՏԱՍ ՀԿ-ի գործադիր տնօրեն Կարինե Հարությունյանի հետ։

Ուսանողները ներկայացրեցին Ժողովրդավարական կրթության հայկական կենտրոն-ՍԻՎԻՏԱՍ ՀԿ-ի հետ իրականացրած «Արժևորված արհեստներ» և «Զբոսաշրջությունը Գյումրիում» ենթադրամաշնորհային ծրագրերի արդյունքում կատարված աշխատանքները։

«Մշակութային զբոսաշրջությունը Գյումրիում» ծրագրի թիմի անդամները առաջ քաշեցին հետևյալ խնդիրները․ աշխարհը գլոբալիզացման տանող համացանցային տարվածությունը երիտասարդներին հեռացրել է սեփական երկրի արժեքներից ու մշակութային ժառանգությունից։

 Հայաստանը՝ մասնավորապես Գյումրին, ունի բացառիկ ու բազմազան ժառանգություն, որի պահպանությունն ու անաղարտ փոխանցումը հանրությանը, ինչպես նաև մարզ այցելող զբոսաշրջիկներին՝ յուրաքանչյուրի պարտքն է:

Ծրագրի մասնակիցները հետազոտել և տեղեկատվություն են ձեռք բերել Գյումրուն բնորոշ զարդանախշերի և ճանաչված արվեստագետների մասին, պատրաստել հուշանվերներ, որոնք ցուցադրվելու, վաճառվելու են Գյումրու թանգարաններում՝ քաղաքն ավելի գրավիչ և հյուրընկալ դարձնելու համար: Այդ նպատակով ձեռք են բերվել գործիքներ և նյութեր, պատրաստվել են Մհեր Մկրտչյանին, Հովհաննես Շիրազին և Գյումրուն բնորոշ հուշանվերներ,  տեղեկատվական թերթիկներ, ցուցանակ, շապիկներ։

«Արժևորված արհեստներ» ծրագրի թիմի ուսանողները ներկայացրին գյումրեցի երիտասարդ արվեստագետների, ուսանողների՝ ստեղծագործական կարողությունների լիարժեք ցուցադրման համար բարենպաստ պայմանների և համայնքի՝ ազգաբնակչություն – արհեստագործ - զբոսաշրջիկ հարմարավետ հաղորդակցման ֆիզիկական միջավայրի բացակայության հիմնախնդիրները։ Այս հիմնախնդիրների լուծման համար ուսանողներն իրենց պատրաստած հուշանվերները ցուցադրելու և վաճառելու են Գյումրու՝ զբոսաշրջիկներով հարուստ վայրերում՝ քաղաքի մշակույթը հանրայնացնելու համար: Ծրագրի շրջանակներում նրանք ձեռք են բերել տաղավար, սեղան, աթոռներ, պատրաստել են տեղեկատվական թերթիկներ, ցուցանակ, շապիկներ։

Հեռավար հանդիպման ընթացքում ուսանողները ցուցադրեցին պատրաստած հուշանվերները, կիսվեցին իրենց տպավորություններով։ Նրանք հույս հայտնեցին, որ այս երկու ծրագրերը նախադեպ կդառնան Գյումրու արհեստավորների համար՝ սեփական արվեստը հանրությանը ավելի ներկայանալի մատուցելու առումով։

ՀՀ կրթության տեսչական մարմնի ղեկավար Ալեքսանդր Շագաֆյանը ողջունեց ուսանողների նախաձեռնությունները, նշեց․ «Ծրագրերը կնպաստեն զբոսաշրջության զարգացմանը, ստեղծագործող, հավելյալ արժեք ստեղծող մարդիկ իրենց շրջապատը ավելի ներկայանալի կդարձնեն, իսկ թանգարան, զբոսաշրջիկ, արհեստավոր համագործակցությունն ավելի լավ կյանք կապահովի համայնքի համար»։

«ԵՄ հանուն մշակույթի․ առավել ուժեղ համայնքներ և տեղական նախաձեռնություններ» ծրագրի համակարգող Տաթև Ասրյանը հույս հայտնեց, որ այս աշխատանքները կլինեն շարունակական։

 Մհեր Մկրտչյանի հուշատուն - թանգարանում բացվել է ոչ ֆորմալ կրթական լաբորատորիա, որի տարածքը կարելի է օգտագործել՝ ցուցահանդեսներ կազմակերպելու և ուսանողների ստեղծագործական աշխատանքները ներկայացնելու համար։ Ծրագիրը նպաստել է նաև ուսանողների նոր հմտությունների զարգացմանը։

Առարկայական չափորոշիչների և ծրագրերի մշակման խմբի փորձագետ /արհես-արվեստ բնագավառ/ Գայանե Թադևոսյանը ողջունեց ուսանողներին, նշեց, որ մեծ ուշադրություն է դարձվելու մարզերում տվյալ մարզին բնորոշ արհեստի ճյուղերի զարգացմանը, որի շնորհիվ կզարգանան երիտասարդների հմտությունները և գեղագիտական ճաշակը, կկարևորվի թանգարան – կրթություն կապը։ Ողջունելի է, որ ուսանողները կարողացել են ստեղծել այդ կապը և ապահովել զբոսաշրջիկների համար հուշանվերներ։

 Ժողովրդավարական կրթության հայակական կենտրոն-ՍԻՎԻՏԱՍ ՀԿ-ի գործադիր տնօրեն Կարինե Հարությունյանի խոսքերով․ «Ծրագրերը նորարարական բնույթ ունեն, քանի որ նմանատիպ նախաձեռնություն չի եղել, սա մուտք է թանգարանակրթության, արվեստագետների  և զբոսաշրջության միջև՝ մշակութային կապ հաստատելու առումով։ Ստեղծված են յուրահատուկ աշխատանքներ, երևում է ուսանողների պատասխանատվությունը նախաձեռնության նկատմամբ»։

Հանդիպման ավարտին հնչեցին փոխադարձ շնորհակալական խոսքեր և պարտավորվեցին ծրագրերի առաքելությունը շարունակական դարձնել։

«ԵՄ հանուն մշակույթի․ առավել ուժեղ համայնքներ և տեղական նախաձեռնություններ» ծրագիրն իրականացվում է Դի-Վի-Վի Ինթերնեյշնալի, Մեդիա նախաձեռնությունների կենտրոնի, Ժողովրդավարական կրթության հայակական կենտրոն-ՍԻՎԻՏԱՍ ՀԿ և Թանգարանների աշխատողների և բարեկամների ասոցիացիայի կողմից՝  Եվրոպական միության ֆինանսական աջակցությամբ։