Տոն մայրենիի

Փետրվարի 24, 2021

Դպրոցական անցուդարձ

ԾՆՎԵՑ , ՈՐ ԾՆՎԵՆՔ

ԵՂԱՎ, ՈՐ ԼԻՆԵՆՔ

ԵՎ ԱՆՄԱՀԱՑԱՎ,

ՈՐ ԱՆՄԱՀԱՆԱՆՔ…

Պարույր Սևակ

Փետրվարի 20-ին Գեղարքունիքի մարզի Լճաշեն գյուղի Ա Տեր - Գրիգորյանի անվան միջնակարգ դպրոցում կազմակերպվել էր միջոցառում «Տոն մայրենիի» խորագրով: Միջոցառումն սկսվեց «Հայոց տառեր» երգով: Այնուհետև իրար հաջորդեցին գեղեցիկ ասմունքն ու մեծերի անմահ խոսքեր… Խոսուն էին ասույթները` «Հայոց լեզուն տունն է հայուն», «Ապրեց մեր լեզուն` Ոսկեղենիկը մեր մեսրոպազուն, շողաց , հուրհրաց նա բոցի նման»: Աշակերտները բեմականացման միջոցով ներկայացրին Տիգրան Մեծի պատգամը. «Ինձանից հետո դու երկու զենքով պետք է պահես երկիրը: Այդ զենքերն են`հայոց լեզուն և հայկյան սուրը: Հիշի՛ր, տղա՛ս, դու կարող ես սուրը պատյանի մեջ դնել, վերստին հանել: Կոտրվելու դեպքում նորը կռել: Սակայն , եթե սխալվես ու հայոց լեզուն դնես պատյանի մեջ, այլևս չես կարող հանել և ստեղծել նորը: Ամեն ինչ կարելի Է կառուցել, վերագտնել բոլոր կորուստները, բայց եթե կորցնես մայրենին, կկորցնես և՛ քեզ, և՛ վարքը հայոց մեծաց, և Հայքը համայն, և ապագան մեր Հայկյան երկրի»: 8-րդԱ դասարանի աշակերտուհիներ Անահիտ Տեր-Գրիգորյանի և Էլեն Հարությունյանի կատարմամբ հնչեցին «Մեր լեզուն» և «Մայրենի լեզու» երգերը:

Օրը մեզ համար տոն դարձրին հայոց լեզվի և գրականության ուսուցչուհի Սալվինազ Սիմոնյանը, ԴԱԿ Ծովինար Կարապետյանը և ուսուցչի օգնական Շուշան Գրիգորյանը: Օրվա խորհուրդն ամբողջական դարձավ Սիլվա Կապուտիկյանի«Երդումով»`«Երդվում եմ կրել քեզ շնչո՛վս, արյունո՛վս, այրումո՛վս և ինձնով տանել –հաղորդե՜լ զավակներիս քո հավերժական կենդանությունը: «Երդվու՛մ եմ»: Միջոցառման մասնակիցներին օրվա կապակցությամբ շնորհավորեց դպրոցի տնօրեն Աիդա Մուրադյանն ու հորդորեց սիրել, փայփայել և գեղեցկացնել մեր հազարագանձ հայոց լեզուն` հայ ժողովրդի հոգևոր հարստությունը,պահպանել մեր Ոսկեղենիկ Մայրենին և անաղարտ ավանդել սերունդներին:

Ծովինար Կարապետյան

Սովորողների հետ դաստիարակչական աշխատանքների կազմակերպիչ