Անունդ անմոռաց է, սխրանքդ անմար՝ Զինվոր քաջարի

Փետրվարի 1, 2021

Դպրոցական անցուդարձ

Գեղարքունիքի  մարզի  Լճաշեն  գյուղի  Ա. Տեր-Գրիգորյանի անվան  միջնակարգ  դպրոցում  անցկացվեց  միջոցառում`  նվիրված  հայոց  բանակի  ստեղծման  29-ամյակին: Դպրոցում  թևածում  էր  հերոսական  ոգին:Ստեղծվել  էր  անկյուն` Արցախյան  ազատամարտի  նահատակների`  անմահ  հերոսների, մեր  շրջանավարտների  նկարներով:

Միջոցառումն  սկսվեց լռության  րոպեով: Էկրանի  վրա  սահում  էին իրենց  կյանքը  սուրբ  հայրենիքին նվիրաբերած  անզուգական  տղաների  նկարները: Մասնակիցները  հուզառատ  խոսքերով  իրենց  խոնարհումը   բերեցին  պատերազմում  նահատակված Հայկ  Դավիթի  Գասպարյանին,  Փայլակ  Դավիթի  Ղազարյանին և  Գևորգ  Սևակի  Բաբայանին:

Նրանք  հավերժ  կապրեն  երախտագետ  սերունդների  հիշողության  մեջ:

Միջոցառման  ընթացքում  մեծարվեցին  բոլոր  նրանք,  ովքեր  այս  պահին  պաշտպանում  են  հայրենիքը  և արժանապատվորեն  կատարում  զինվորական  պարտքը`  հավատարիմ   մնալով իրենց  երդմանն  ու  խղճին: Միջոցառմանը  հրավիրված  էին դպրոցի  շրջանավարտ  զինծառայողներ  Վրեժ  Սիմոնյանը,  Արթուր  Խաչատրյանը, Երվանդ  Սահակյանը,  Արման  Հարությունյանը  և  Անդրանիկ  Ղազարյանը:

Դպրոցի  զինղեկ, փոխգնդապետ  Գառնիկ  Մանուկյանը  շնորհավորեց  ներկաներին և  նշեց , որ  անչափ  կարևոր  է հզոր,  մարտունակ  բանակ ունենալը,  այս  պահին  բանակի  հզորացմանը  նպաստելը  և  զինվորի  կողքին  կանգնելը,  մատաղ  սերնդի հոգիներում հայրենասիրություն  սերմանելը:

Միջոցառման  ավարտին դպրոցի  տնօրեն  Ա. Մուրադյանը նշեց, որ  մերօրյա  սերունդն  ապրեց  դժվար  օրեր,  նրանց աչքի  առաջ  հերոսներ  անմահացան,  սուրբ  նահատակներ.մեր  սիրելի  շրջանավարտներ`  Գևորգ  Բաբայան, Փայլակ  Ղազարյան,  Հայկ  Գասպարյան…

Սրանք այն  քաջերն  էին, որոնք  մատաղ  սերնդի  համար  դարձան  հերոսական  խոսուն  կերպարներ,  որոնց  թափած  սուրբ  արյամբ  կանգուն  մնաց  մեր  հայրենիքը,  մեր  արժանապատվությունը,  հերոսներ,որոնք  մեզ`  ապրողներիս  ու  մատաղ  սերնդին  կարևոր  պատգամ  տվեցին. ապրել, արարել  ու  հզորանալ:

Մեր  տղաները, անխառն  քաջության  օրինակներ  դարձան,  նահատակվեցին  ու  անմահացան: 

Խոնարհվենք  Արցախյան  ազատամարտում  զոհված  բոլոր  նահատակների  միշտ  կենդանի  հիշատակի  առաջ:

Ծ. Կարապետյան
Լճաշեն գյուղի  Ա.Տեր-Գրիգորյանի անվան միջնակարգ դպրոցի
սովորողների հետ դաստիարակչական աշխատանքների կազմակերպիչ