Twinkl միջազգային կրթական հրատարակիչն առաջարկում է

Մայիսի 6, 2020

ՏՀՏ նորություններ

Մեծ Բրիտանիայում հիմնադրված Twinkl միջազգային կրթական հրատարակիչը (https://www.twinkl.co.uk/) ստեղծել է շուրջ 630 000 էլեկտրոնային ռեսուրսներ՝ սկսած տեղեկատվական թերթիկներից ու փաթեթներից, ինտերակտիվ ցուցադրություններից մինչև առցանց կրթական խաղեր ու տեսանյութեր, որոնք համացանցի միջոցով հասանելի են ամբողջ աշխարհում և դրանք օգտագործում են շուրջ 190 երկրների դպրոցներ և ուսուցիչներ։

Քանի որ կորոնավիրուսի կանխարգելման նպատակով դպրոցները պարտադրված փակ են և, ինչպես աշխատակիցները, այնպես էլ աշակերտները ստիպված են ինքնամեկուսանալ, Twinkl-ը, որը դասավանդման և ուսումնառության ամենամեծաքանակ նյութեր ստեղծողներից մեկն է, իր ռեսուրսներն անվճար տրամադրում է տանից ուսուցումն իրականացնելուն աջակցելու նպատակով:

«Լսելով այն անհրաժեշտ նախազգուշական միջոցների մասին, որոնք կորոնավիրուսի պատճառով ձեռնարկվում են ամբողջ աշխարհով, մենք գիտակցեցինք, որ մեր թվային ռեսուրսները կարող են օգնել ուսուցիչներին, ծնողներին և այն երեխաներին, ովքեր չեն կարողանում դպրոց հաճախել», գրում է Twinkl-ի համահիմնադիր և գործադիր տնօրեն Ջոնաթան Սիթոնը և ավելացնում․ «Մեր առաքելությունը եղել և մնում է օգնել նրանց, ովքեր դասավանդում են, և մենք գիտենք, որ դա պետք է ավելի շատ հիմա, քան երբևէ: Այն ամենը, ինչ անում են դպրոցները, ուսուցիչները, ծնողները և խնամողները, իրենց երեխաներին օգնելու համար, անհավատալի է, և մենք հուսով ենք, որ ինչ-որ ձևով կաջակցենք դրան: Մեզ համար նաև կարևոր է, որ երեխաները հնարավորություն ունենան սովորելու, անկախ ցանկացած հանգամանքից և շարունակեն սովորել նաև այս իրավիճակում»:

ՀՀ ԿԳՄՍ նախարարին ուղղած նամակում Ջոնաթան Սիթոնը Twinkl-ի ռեսուրսների անվճար հասանելիության և անմիջական մուտքի առաջարկ է արել, համաձայն որի Հայաստանի ուսուցիչները, ծնողներն ու խնամակալները կարող են ազատ մուտք ունենալ Twinkl կայք՝ այցելելով https://www.twinkl.co.uk/offer, էլեկտրոնային փոստի և գաղտնաբառի հետ միասին մուտքագրելով ARMTWINKLHELPS ծածկագիրը:

Ընկերությունը ուսուցիչների և դպրոցների համար ստեղծել է ուղեցույցներ, որոնք պարունակում է նաև տեղեկություններ այն մասին, թե ինչպես ծնողները կարող են օգնել տնային պայմաններում սովորող երեխաներին։ Ուղեցույցները կարելի է գտնել այս հղումով՝ https://www.twinkl.co.uk/blog/how-to-utilise-twinkl-during-the-coronavirus-shutdown-a-guide-for-schools:

Նյութի աղբյուրը. Հեռավար ուսուցման համալիր էջ