Հովհաննես Շիրազ (ամփոփիչ դաս)

Փետրվարի 1, 2020

Դպրոցական անցուդարձ

Հունվարի 30-ին Կապանի N13 հիմնական դպրոցում տեղի ունեցավ բաց դաս.
Առարկա՝ Գրականություն
Դասարան՝ VII բ
Դասի թեմա՝ Հովհաննես Շիրազ (ամփոփիչ դաս)
Նպատակները՝ Գրական բնագրերի ընթերցում, համեմատում, վերլուծում, բովանդակության վերարտադրում, հեղինակի վարպետության, ոճի և առանձնահատկությունների ընկալում Հայրենիքի արժևորման և աշխարհացիր հայության համախմբման պատգամախոսություն, ազգային սրբազան նպատակների արծարծումներով, անկախ պետականություն ունենալու երազանքով:

Աշակերտները ներկայացրեցին հայ մեծանուն բանաստեղծի ստեղծագործություններն ու կենսագրությունը: Նրանք Շիրազին ներկայացրին այնպես, ասես ողջ կյանքում ուսումնասիրել էին նրա պոեզիան և այն գիտակցմամբ, որ բանաստեղծի գրած յուրաքանչյուր տող ուղղված է հենց իրենց։ Ու նրանց է ուղղված նաև Շիրազի «Կտակը»․

․․․ Քեզ մեր սարն եմ կտակում, որ դուրս բերես սև ամպից, Որ տուն բերես շալակած արդարությամբ մեր անբիծ,
․․․ Քեզ Մասիսն եմ կտակում, որ դու պահես հավիտյան, Որպես լեզուն մեր հայոց, որպես սյունը քո հոր տան։

Հարցազրույցի հրավիրեցին բանաստեղծ Հովհաննես Շիրազին: Ինքնատիպ էր բանաստեղծի մուտքը դասարան. Նա ուղերձով հանդես եկավ ներկաներին: Դպրոցականները արտասանեցին Շիրազի «Թագադրում» բանաստեղծությունը, որի անզուգական տողերի ներքո «բանաստեղծի դերակատարը» օծվեց որպես գարնան թագավոր: Աշակերտները բազմաթիվ հարցեր ուղղեցին հեղինակի աթոռին նստած բանաստեղծին և նրանից լսեցին անկեղծ ու անմիջական պատասխաններ իր կյանքի հիշարժան դրվագների և գրած ստեղծագործությունների վերաբերյալ: Հարցերը զուգակցվում էին Շիրազի բանաստեղծությունների և «Հայոց Դանթեականից» հատվածների արտասանության հետ: Երբեմն այն ընդմիջվում էր Շիրազի մասին մեջբերումներով. «Նա, ժառանգելով իր ժողովրդի տաղանդի բանաստեղծական հատկանիշը, հասունացել է անյքան, լցվել է այնպես, ինչպես Արարատյան դաշտավայրի այն հարուստ վազը, որ հազվադեպ տեսակի է և իր արտասովոր ողկույզների նույնքան արտասովոր շողշողումներով ժպտում է ամեն անցորդի ու չի հարցնում նրա ով լինելը»։ Շիրազը հոյակապ դեմք է մեր պոեզիայի Պառնասում, հորդաբուխ ու ճշմարիտ բանաստեղծ. նրա ամեն մի բանաստեղծությունը մի գյուտ է` զարմանալի պատկերներով: Նա ոչ միայն անբաժան է մեր ժողովրդի հավիտենական երթից, այլև բոլոր հայ մեծերի հետ միասին նրան առաջնորդելու է մեր ազգային մեծ երազանքների իրականացման ճանապարհին:

«Բռունցքվելն է հավերժությունն Հայաստանի». Ահա՛ Շիրազյան պատգամն աշխարհացրիվ հայությանը:

ՄԿԱ գծով փոխտնօրեն Ժաննա Վարդանյան