Գիտաժողով՝ նվիրված գերմաներենի դասավանդման նոր մեթոդներին

Հոկտեմբերի 16, 2019

Պաշտոնական

Խ. Աբովյանի անվան հայկական պետական մանկավարժական համալսարանում հոկտեմբերի 14-15-ը տեղի է ունեցել «Սովորողների խոսքի պրոֆիլային վերլուծություն» խորագրով երկօրյա միջազգային գիտաժողով` նվիրված գերմաներենի դասավանդման նոր մեթոդներին և մոտեցումներին:

Գիտաժողովին, որպես հիմնական բանախոս, հրավիրվել է հայտնի գիտնական, դոկտոր, պրոֆեսոր Վիլհելմ Գրիսհաբերը` Գերմանիայից: Նա գիտաժողովին մասնակից ներկա և ապագա մանկավարժներին ներկայացրել է գերմաներենի, որպես օտար լեզվի ուսուցման նոր մեթոդը,  որին մասնագիտական շրջանակները տվել են «Սովորողների խոսքի պրոֆիլային վերլուծություն» անվանումը:

 Դոկտոր, պրոֆեսոր Վիլհելմ Գրիսհաբերը երախտագիտություն է հայտնել  գերմաներեն դասավանդող հայ ուսուցիչներին, որոնք աշակերտների շրջանում նախապես անցկացրել են հարցումներ, կատարել տեքստային առաջադրանքներ և արդյունքները տրամադրել պրոֆեսորին. «Ես այդ աշխատանքներում տեսել եմ, թե ինչպես են Հայաստանում սովորում գերմաներեն»,-նշել է պրոֆեսորը` հույս հայտնելով, որ նոր մեթոդն ուսուցիչների համար կիրառական նշանակություն կունենա:

Գիտաժողովին մասնակցել են Երևանի և մարզերի դպրոցներում գերմաներեն դասավանդող ուսուցիչները: Նրանք կարևորել են նոր մեթոդի կիրառման վերաբերյալ ձեռնարկը և հույս հայտնել, որ այն կնպաստի գերմաներենի դասավանդման արդյունավետության բարձրացմանը:

Գիտաժողովի մասնակիցներից գերմանացի Հոլգեր Շմիդթն արդեն 5 տարի աշխատում է Հայաստանում, գերմաներեն է դասավանդում և´ դպրոցում, և´ քոլեջում: Վստահեցնում է՝ աշխատանքում մշտապես իրականացրել է լեզվի վերլուծություն,  ունի աշակերտների գիտելիքների ստուգման, գնահատման ծրագիր, բայց կարծում է, որ գիտաժողովին մասնակցությունը, նոր մեթոդի կիրառումը նոր հնարավորություններ կընձեռի գերմաներենի դասավանդման ոլորտում:

Գիտաժողովի մասնակիցներին ողջունել են Խ.Աբովյանի անվան հայկական պետական մանկավարժական համալսարանի ուսումնագիտական գծով պրոռեկտոր Սրբուհի Գևորգյանը, օտար լեզուների դասավանդման մեթոդիկայի ամբիոնի վարիչ, պրոֆեսոր Մելանյա Աստվածատրյանը:

Գիտաժողովը կազմակերպել է Խ. Աբովյանի անվան հայկական պետական մանկավարժական համալսարանը` Երևանի գերմանական ուսումնամշակութային կենտրոնի հետ համատեղ՝ Հայաստանում ԳԴՀ դեսպանության աջակցությամբ:

Նյութի աղբյուրը. ՀՀ կրթության, գիտության, մշակույթի և սպորտի նախարարություն