Այց Անտառամեջ գյուղի միջնակարգ դպրոց

Հոկտեմբերի 15, 2019

ՏՀՏ նորություններ Լուրեր կազմակերպություններից

Այս ուսումնական տարվա ընթացքում Գեղարքունիքի մարզի Անտառամեջ գյուղի միջնակարգ դպրոցի աշակերտները ֆիզիկա առարկան կուսումնասիրեն հեռավար ձևով։

Աշխատանքային տարբեր հարցեր քննարկելու և փորձնական աշխատանքի մեկնարկը կազմակերպելու նպատակով Կրթական տեխնոլոգիաների ազգային կենտրոնի (ԿՏԱԿ) աշխատանքային խումբն այցելեց Անտառամեջ գյուղի միջնակարգ դպրոց, հանդիպեց փոքրաթիվ աշակերտներ ունեցող դպրոցի աշխատակազմի և սովորողների հետ։

ԿՏԱԿ-ի տնօրենի տեղակալ Ա․ Կուլախսզյանը և դպրոցի տնօրեն Ա․ Ազարյանը քննարկեցին գործընթացի կազմակերպչական հարցերը։ Աշակերտների հետ հանդիպման ժամանակ ԿՏԱԿ-ի հեռավար ուսուցման կազմակերպման պատասխանատուներ Մ․ Ավետիսյանն ու Ս․ Գևորգյանը ներկայացրեցին աշխատանքի կազմակերպման ընթացքը, ծանոթացրեցին հեռավար ուսուցման համակարգից օգտվելու հմտություններին, յուրաքանչյուր սովորողին տրամադրվեց մուտքի հնարավորություն։ Այնուհետև դասընթացավար Սիլվա Գրիգորյանն իր նոր և ուշիմ սաների հետ զրուցեց բնագիտական տարբեր երևույթների մասին, նրանց սահուն կերպով առաջնորդեց հեռավար ուսուցման հարթակ՝ իր մշակած ինտերակտիվ նյութերի հետ ծանոթանալու և նրանց ձեռքբերած սկզբնական հմտությունները կիրառելու նպատակով։

 

Կրթական տեխնոլոգիաների ազգային կենտրոնում ստեղծվել է «Հեռավար ուսուցման կենտրոն», որի գործունեության հիմնական նպատակներից մեկն առարկայական մասնագետներ չունեցող դպրոցների աշակերտների համար հեռավար ուսուցման դասընթացների իրականացումն է։

ՀՈւԿ-ի աշխատանքի փորձնական փուլում (2019-2020 ուստարվա ընթացքում) Գեղարքունիքի մարզի Անտառամեջ և Արարատի մարզի Սիսավան համայնքների միջնակարգ դպրոցների աշակերտների համար կկազմակերպվեն ֆիզիկա (Անտառամեջ) և քիմիա (Սիսավան) առարկաների հեռավար դասընթացներ։

Ընտրված դասընթացավարները, հեռավար դասընթացները կկառուցեն ուսումնական ծրագրերին ու առարկայական չափորոշիչներին համապատասխան և կվարեն ՀՈւԿ-ի աշխատակիցների աջակցությամբ։

Որպես աշխատանքային միջավայր կօգտագործվի «Հայկական կրթական միջավայրի» «Հեռավար ուսուցում» համակարգը (https://elearning.armedu.am/)։

Որպես կրթական բովանդակություն դասընթացավարներն, իրենց մշակումներին զուգահեռ, կարող են օգտագործել նաև «Ինտերակտիվ ուսուցում» կայքի (http://esource.armedu.am/) էլեկտրոնային պաշարները (ընտրված առարկաների բոլոր դասարանների համար կայքը պարունակում է տեսական մաս, լաբորատոր և  գործնական աշխատանքներ, ցուցադրական նյութեր)։

Նյութի աղբյուրը. Կրթական տեխնոլոգիաների ազգային կենտրոն