«Ընտանիք» կենտրոն. «Բնության տարրերն արվեստում» խորագրով ցուցահանդես Գյումրու Ասլամազյան քույրերի պատկերասրահում

Հոկտեմբերի 9, 2019

Լուրեր կազմակերպություններից

Հոկտեմբերի 1-ին Գյումրու Ասլամազյան քույրերի պատկերասրահում բացվեց ԿԳՄՍՆ «Ընտանիք» մանկապատանեկան ստեղծագործական կենտրոնի կողմից կազմակերպված «Բնության տարրերն արվեստում» խորագրով ցուցահանդեսը, որը շարունակվեց մինչև հոկտեմբերի 7-ը:

Միջոցառման նպատակն էր սաներին ոգեշնչել Մարիամ և Երանուհի Ասլամազյան քույրերի արվեստով, նպաստել հայ միջնադարյան մանրանկարչության արվեստի ճանաչմանը, կապ ստեղծել մշակութային օջախների և սաների միջև, դեռահասներին հաղորդակից դարձնել մշակութային կյանքին:

Պատանի «նկարիչները» հայ միջնադարյան և համաշխարհային գրականության առակագիրների ստեղծագործությունների հիման վրա ստեղծած մանրանկարչական և Ասլամազյան քույրերի արվեստի ոճով ստեղծած վիտրաժային աշխատանքների ցուցադրությանը պատրաստվել էին երկար: Մինչ ստեծագործելը մանրանկարչության խմբակի սաները ծանոթացել էին հայ միջնադարյան և համաշխարհային գրականության առակագիրներին, նրանց ստեղծագործություններին: Իսկ վիտրաժային նկարչության խմբակի սաներն աշխատանքներ ստեղծելու համար սեպտեմբերի 11-ին ուսուցողական այց կատարեցին Ասլամազյան քույրերի պատկերասրահ: Ստեղծագործող պատանիներն ուսումնասիրեցին գյումրեցի նկարչուհիների գեղանկարչական, գրաֆիկական և խեցեգործական աշխատանքները, նրանց արվեստով ոգեշնչված կատարեցին կրկնօրինակումներ և ոճավորված նատյուրմորտներ:

Ցուցադրությանը ներկա էին «Ընտանիք» կենտրոնի տնօրինությունը, Հայաստանի Գրողների Միության Շիրակի մարզային բաժանմունքի անդամներ Արա Արթյանը, Հակոբ Մուշը, արվեստագետներ, ծնողներ, սաներ: Ցուցահանդեսին ներկայացված էին 7-18 տարեկան սաների շուրջ 70 աշխատանք: Ներկաները տպավորված էին սաների ստեղծագործություններով, նրանք գնահատանքի խոսքեր և բարեմաղթանքներ ուղղեցին դեռահասներին և միջոցառման կազմակերպիչներին: Նշենք, որ ցուցադրությունը կշարունակվի նաև հոկտեմբերի 11-ին «Ընտանիք» կենտրոնում:

Վ. Շամամյան